96
1 Mu̱hi̱i̱mi̱re Mukama kyembu kihyaka,
mu̱hi̱i̱mi̱re Mukama nywe nsi gyensei̱!
2 Mu̱hi̱i̱mi̱re Mukama, muhaariize ibara lyamwe,
mu̱bazenge ha kujunwa kwamwe b̯uli kiro.
3 Mu̱rangi̱i̱renge ki̱ti̱i̱ni̱sa kyamwe mu mahanga,
na byamahanu byamwe mu bantu benseenya!
4 Kubba Mukama wa maani kandi aki̱i̱rayo kuhaariizib̯wa,
akusemeera ku̱ti̱i̱nwa kukiraho baruhanga bensei̱.
5 Hab̯wakubba baruhanga bensei̱ ba mahanga bi̱si̱sani̱ kwankei,
bei̱tu̱ Mukama yooyo munyakuhanga iguru.
6 Ali na ki̱ti̱i̱ni̱sa na mananu!
Mu kiikaru kyamwe kitongoole, halimwo b̯u̱sobozi̱ na kusemera.
7 Mu̱haari̱i̱ze Mukama, nywe bantu bensei̱,
mu̱haari̱i̱ze Mukama hab̯wa ki̱ti̱i̱ni̱sa na b̯u̱sobozi̱ b̯wamwe.
8 Mu̱haari̱i̱ze ibara lya Mukama lya ki̱ti̱i̱ni̱sa,
muleete kihongwa Mwi̱ngi̱re mu Yeekaaru̱ gyamwe!
9 Mu̱ramye Mukama hab̯wa ki̱ti̱i̱ni̱sa kyamwe kitongoole,
nsi gyensei̱ mujegeje mu mei̱so gaamwe.
10 Muweere mahanga gensei̱ yati, “Mukama ahaariizwe!
Nsi gyensei̱ yaagi̱taati̱i̱rye tigisobora ku̱zi̱ngi̱zi̱ka,
alicwera bantu bensei̱ musangu na b̯winganiza.”
11 Leka iguru lisemererwe, na nsi gyegonze,
itaka na byensei̱ bigicalamwo, bihuure,
12 leka misiri na bilimwa byensei̱ byebbune!
Kasi misaali myensei̱ mya mu kibira myezi̱ngi̱i̱zye na kusemererwa.
13 Bali̱hi̱i̱ma mu mei̱so ga Mukama,
kubba akwi̱za kucwera nsi musangu,
alicwera nsi mu mananu gaamwe,
na bantu mu b̯wesigwa b̯wamwe.