60
Hali mu̱handu̱ wa bahi̱i̱mi̱. Zabbu̱li̱ gya Dau̱di̱. Ni̱gi̱si̱gi̱ki̱ra hali Su̱sani̱ Edu̱sa. Mpandiika gya Dau̱di̱ yankei, hab̯wa kwegesya, b̯u̱yaalweni̱ na Aramu naharai̱mu̱ na Aramu zobba kandi Jowabbu b̯u̱yeetangi̱ri̱ akei̱ta badulu mutwaru gu̱mwei̱ na nku̱mi̱ ibiri bʼEdomu̱ mu kihanga kya kisura.
1 Ai̱ Ruhanga, otu̱nu̱gi̱ri̱, watubinya ntege,
oi̱ceeri̱ na ki̱ni̱ga, caali tu̱ganyi̱re.
2 Oheeri̱ nsi kutengeeta wagibinyabinyamwo,
su̱ngi̱i̱ra mi̱nyangaara byagyo kubba gikudengeeta.
3 Oheeri̱ bantu baamu kuwonawona bintu byakalaseeni̱,
otu̱heeri̱ vi̱i̱no gi̱ku̱tu̱tami̱i̱rya.
4 Woolokeerye b̯u̱bonero b̯wamu hali bab̯wo baku̱ti̱i̱na,
aleke basobore kukena kabii.
5 Cungura bawendya,
obajune na mukono gwamu gwab̯udyo, kandi otwi̱remwo!
6 Ruhanga abazi̱ri̱ nali mu kiikaru kyamwe ki̱syanu̱,
naakoba yati, “Mu kusemererwa kunene ndi̱bagaani̱amwo Sekemu̱,
kandi ngabire bantu bange kihanga kya Su̱koosi̱.
7 Gi̱ryadi̱, nsi gyange, Manaase de gyange,
Efu̱rayi̱mu̱, kyoma kilinda mu̱twe gwange,
Yu̱da, mubbeere gwa b̯ukama b̯wange.
8 Mowaabbu gyogyo kalaaya gyange haanabi̱ra,
Edomu̱ hooho nzi̱ca nkei̱to zange,
mu Fi̱ri̱si̱ti̱ hooho nyeb̯uga hab̯wa b̯u̱si̱ngu̱zi̱.”
9 Naani alintwala mu rub̯uga lunyamaani?
Akanyebembera kugyenda mu Edomu̱?
10 Ai̱ Mukama, mali̱ otu̱nu̱gi̱ri̱ kwahi?
Kotakwebembera mahe geetu̱?
11 Beiraba tu̱ju̱ne hali banyanzigwa beetu̱,
kubba kujuna kwa bantu tikugasa!
12 Ruhanga nka kwali ha rubaju lwetu̱ tu̱ku̱si̱ngu̱ra,
yooyo akuziginiira banyanzigwa beetu̱.