59
Hali mu̱handu̱ wa bahi̱i̱mi̱. Mwiraka lya “Otahwerekereerya.” Zabbu̱li̱ gya Dau̱di̱. Sau̱lo b̯u̱yaatu̱mi̱ri̱ badulu kutata nnyu̱mba gya Dau̱di̱ naakwendya ku̱mwi̱ta.
1 Ai̱ Ruhanga, ncungura kuruga mu banyanzigwa bange,
ondinde hali bab̯wo baku̱mbyokeera.
2 Njuna kuruga mu nkori̱ za bibii,
kandi onsi̱ngu̱ri̱sye kuruga mu batemu.
3 Kubba bandali̱ri̱i̱ri̱ ku̱nzi̱ta,
badulu bakabi bambyokeeryeho ntaru.
Ai̱ Mukama, ntali na nsobi̱ rundi kabii kensei̱,
4 nab̯untali nabo musangu, bei̱tu̱ bo beicala banyeci̱i̱ki̱i̱ri̱.
Si̱si̱mu̱ka, oi̱ze ondombe, kandi owone.
5 We Mukama Ruhanga wa mahe, oli Ruhanga wʼI̱saleeri̱.
Byokiramwo kufubira, mahanga gensei̱,
otakeni̱a noomwei̱ mu batab̯ura nkwe za b̯ubii.
6 B̯uli joojolo bei̱ra, nibaturuuma nka mbwene,
nibalibatalibata mu rub̯uga.
7 Babaza bigambo bya kuntinisiriirya ku̱nzi̱ta
na mpirima mu mi̱nwa myab̯u,
nibaniihira tihaloho aku̱beegwa.
8 Ai̱ Mukama, oseke b̯u̱seki̱,
mahanga gensei̱ gaku̱jeemera.
9 Ai̱ Ruhanga, weewe maani gange,
na b̯wi̱ru̱ki̱ro b̯wange b̯unyesiga.
10 Ruhanga wange, mu ngonzi zaamu zinene,
olinyebembera kandi nsi̱ngu̱re banyanzigwa bange.
11 Otabei̱ta bensei̱ kubba bantu bange handaki bebeere b̯wangu bi̱waakoori̱,
basasaani̱e habwa maani gaamu kandi obasi̱ngu̱re,
ai̱ Mukama, ngab̯u gyetu̱!
12 Hab̯wa kibii kya mi̱nwa myab̯u, bigambu bya ndimi zaab̯u,
leka bakwatwe mu marara gaab̯u,
hab̯wa kukyena na b̯u̱gobya b̯ubabaza.
13 Bahwerekereerye mu ki̱ni̱ga,
mpaka bamali̱ki̱ri̱ho,
kwokwo beege nti Ruhanga alema Yakobbo,
kumaaliiro gya nsi.
14 B̯uli joojolo bei̱ra, nibaturuuma nka mbwene,
nibalibatalibata mu rub̯uga.
15 Bandaara ni̱baku̱toolereerya bidyo
benghurunghuutya b̯u̱balemwa kubyagya.
16 Bei̱tu̱ nku̱hi̱i̱ma kuhaariiza maani gaamu,
b̯uli mwakya karei, mmpi̱i̱ma na maani hab̯wa ngonzi zaamu zinene,
kubba oicala b̯wi̱ru̱ki̱ro b̯wange na mu̱tu̱ntu̱lu̱ gwange mu b̯wi̱re b̯wa kizib̯u.
17 Ai̱ Ruhanga, weewe maani gange, nku̱ku̱hi̱i̱mi̱ra nkuhaariize,
kubba weewe oicala b̯wi̱ru̱ki̱ro b̯wange,
Ruhanga anzolokya ngonzi zinene.