31
Hali mu̱handu̱ wa bahi̱i̱mi̱. Zabbu̱li̱ gya Dau̱di̱.
1 Ai̱ Mukama mu weewe, hooho nzi̱ru̱ki̱i̱ri̱, otandeka nkaswara,
onjune hab̯wa mananu gaamu.
2 Ntegera mapokopo gaamu,
onjune b̯wangu!
Mbeera lubbaali lwa kwebi̱si̱ramwo,
obbe lugo lunyamaani lwa kunjuna.
3 Bba lubbaali lwange kandi lugo lwange,
kandi hab̯wa ibara lyamu onyeebembera nonterekereerya.
4 Nzahuura mitegu mi̱bantegi̱ri̱,
kubba weewe b̯wi̱ru̱ki̱ro b̯wange.
5 Mwozo gwange ngu̱teeri̱ mu ngalu gyamu,
ai̱ Mukama, Ruhanga mwesigwa, oncu̱ngwi̱ri̱.
6 Nnoba baramya bi̱si̱sani̱ bitali na mugasu,
bei̱tu̱ nyeesiga Mukama.
7 Nkwi̱za kusemererwa kandi nyeesi̱i̱mi̱re mu ngonzi zaamu zinene,
hab̯wakubba oweeni̱ kuwonawona kwange,
weeteegereza b̯u̱ru̱mi̱ b̯wa mutima gwange.
8 Ompeeri̱yo kwahi mu mikono mya banyanzigwa bange,
bei̱tu̱ oteeri̱ magulu gange mu kiikaru kigali.
9 Ai̱ Mukama, nkwatira kisa,
hab̯wakubba ndi mu b̯u̱ru̱mi̱ b̯unene,
mei̱so gange gampohi̱ri̱ hab̯wa b̯ujune,
mutima gwange na mubiri gwange bili na b̯u̱ru̱mi̱.
10 B̯womi b̯wange b̯wicala mu b̯ujune,
myaka myange mya kuwonawona,
maani gammali̱ki̱i̱ri̱ hab̯wa kibii kyange,
na maku̱ha gange gaceki̱ri̱.
11 Mbeeri̱ kya kugaywa hali bataahi̱ bange,
hab̯wa banyanzigwa bange bensei̱,
hali banywani bange nyaabba kihemu,
bambona mu ngu̱u̱do banzi̱ru̱ka b̯wi̱ru̱ki̱.
12 Banzebereeri̱ nka muntu nyaakwi̱ri̱,
ndi nka lutaana.
13 Nkwegwa banene bakumpangiira,
nihaloho ntaru b̯uli nsonda,
zi̱bategeki̱ri̱ kunkoraho
na rukwe lwa ku̱nzi̱ta.
14 Bei̱tu̱ gya nkwesi̱gi̱ri̱ ai̱ Mukama,
ndimu kukoba, “Weewe Ruhanga wange.”
15 B̯womi wange b̯uli mu mikono myamu,
njuna banyanzigwa bange na bab̯wo baku̱mpi̱i̱ga.
16 Ngiira kisa gya muheereza waamu,
onjune hab̯wa ngonzi zaamu zinene!
17 Ai̱ Mukama, otandeka nkaswara,
kubba nkukunga weewe,
leka babiibi boobo basware,
bagoromoke kuzumu mu nsita.
18 Leka mi̱nwa mi̱gobya mijale,
mikabaza b̯ubiibi hali bamananu,
mu̱kwetembya na nkwe.
19 Ee, b̯urungi b̯wamu ka b̯unene,
b̯wobi̱ki̱i̱ri̱ baku̱ti̱i̱na,
kandi bei̱ru̱ki̱ra muli we,
baana ba bantu bakyegi̱ri̱ nka kwolinda bab̯wo bakwesiga!
20 Weewe mu̱tu̱ntu̱lu̱ gu̱babi̱sa,
baataru̱mbwa nkwe za bantu
noobeecaalya mu nnyu̱mba gyamu
aleke bataterana na ba ngambu.
21 Mukama ahaariizwe
hab̯wakubba yanzolokeerye mu ngonzi zaamwe zinene bya mahanu
b̯u̱nyaaru̱mbi̱i̱rwe mu rub̯uga.
22 Nyaaku̱u̱ti̱ri̱ nduulu nyakoba yati,
“Ndi hadei nawe ndu̱gi̱ri̱ mu̱mei̱so gaamu.”
Bei̱tu̱ weegweri̱ iraka lya kutaaga kwange kwa kisa,
b̯u̱nyaku̱li̱ri̱i̱ri̱ ni̱nkwendya onjune.
23 Mwendye Mukama, nywensei̱ bantu baamwe!
Mukama alinda beesigwa,
bei̱tu̱ naahoora bab̯wo beetembya.
24 Mu̱bbe bamaani, mu̱tati̱i̱re mitima,
nywensei̱ bali̱ndi̱ri̱i̱ri̱ Mukama!