27
Zabbu̱li̱ gya Dau̱di̱.
1 Mukama yooyo kyererezi̱ na kujunwa kwange,
naani yogwo gi̱ndi̱ti̱i̱na?
Mukama yooyo maani ga b̯womi b̯wange,
naani ali̱nkankani̱a?
2 Babiibi b̯u̱bali̱ndu̱mba,
kuntaagura,
banyanzigwa bange na bannoba,
balikibbala nibagwa.
3 Kadi i̱he b̯ulilingota,
mutima gwange ti̱gu̱li̱ti̱i̱na,
kadi b̯ulibba b̯wemi̱,
nab̯wo ndibba mutatiro.
4 Kintu ki̱mwei̱ kinsaba Mukama,
kinyaatoolyanga,
ncaare mu nnyu̱mba gya Mukama,
biro bya b̯womi b̯wange b̯wensei̱,
mbone b̯urungi b̯wamwe,
mpumulire mu Yeekaru nnyu̱mba gyamwe.
5 Mu biro bya b̯ujune,
alimbumba na mu̱tu̱ntu̱lu̱ gwa heema gyamwe,
ali̱mbi̱sa mu heema gyamwe,
kandi antembye ha lubbaali.
6 Mwomwo ndyeb̯ugira banyanzigwa bangoti̱ri̱,
kandi mu heema gyamwe nyaahongangamwo
kihongwa na kusemererwa kunene,
nkwi̱za ku̱hi̱i̱ma nimpaariiza Mukama.
7 Nzegwa, ai̱ Mukama b̯unkukunga na maani,
Mmbeera wa kisa, onzi̱remwo.
8 Okobi̱ri̱ yati, “Toolya mei̱so gange.”
Mutima gwange gukuteekereza yati, “Mei̱so gaamu, Mukama, googo nyatoolyanga.”
9 Otambumbira mei̱so gaamu,
otabinga muheereza waamu hab̯wa ki̱ni̱ga,
oi̱ceeri̱ nonjuna.
Otansuula, otandekeera,
Ruhanga Mu̱ju̱ni̱ wange.
10 Bbaabba na mmaama nab̯ubakabbanga bandeki̱ri̱,
Mukama akwi̱za kuntangiira.
11 Ai̱ Mukama, Nzegesya mihanda myamu, ai̱ Mukama,
ondi̱batyenge nterekereeri̱
hab̯wa bampi̱gani̱a.
12 Otaleka banyanzigwa bange kunkora ku̱bakwendya,
kubba bakei̱so ba b̯u̱gobya bambyokeeri̱,
bali na b̯wemi̱ b̯unene.
13 Nkwikiriza nti nkwi̱za kuwona b̯urungi b̯wa Mukama
mu nsi gya boomi.
14 Lindiira Mukama,
bba wa maani otatiire,
olindiire Mukama.