19
Hali mu̱handu̱ wa bahi̱i̱mi̱. Zabbu̱li̱ gya Dau̱di̱.
1 Iguru kalitenda ki̱ti̱i̱ni̱sa kya Ruhanga!
Bya mu mwanya kabi̱tebya byakora.
2 B̯uli kiro ki̱tebeerya kiro ki̱i̱ra ha ki̱ti̱i̱ni̱sa kya Ruhanga,
kandi i̱jolo li̱mwei̱ lyegesya i̱jolo lindi kubba na magezi̱.
3 Tihaloho lubazu habbe lulimi,
hali iraka lyab̯u li̱tadoori̱.
4 Iraka lyab̯u li̱rarangi̱ri̱ hensei̱,
bigambu byab̯u bi̱doori̱ ha nsaru za nsi.
Heema gya lyoba Ruhanga yaagi̱teeri̱ mwiguru,
5 nka mugole kwahuluka mu ki̱si̱i̱ka kyamwe,
nka mu̱ku̱gu̱ wa mbiro akugyenda ha mpaka.
6 Lyoba lihuluka mwiguru ha rubaju lu̱mwei̱
nilirabayo niligwa ha rubaju lundi.
Tihaloho kitadweb̯wa kingeere kya lyo.
7 Biragiro bya Mukama biicala bi̱terekereru̱,
bi̱hu̱u̱mu̱u̱lya mutima,
bigambu bya Mukama bibba bya mananu,
bileetera mpwi̱se magezi̱,
8 ndagiiro za Mukama zibba zirungi,
zileetera mutima kusemererwa,
biragiro bya Mukama byabiribiri,
bimulikira mei̱so,
9 ku̱ti̱i̱na Mukama ki̱doori̱,
kyakwicalaho biro na biro,
micwere mya Mukama mibba mya mananu,
kandi myenseenya myab̯winganiza.
10 Byakwegomba kukira na zaabbu,
na kukira zaabbu gi̱sengeeje ginene,
binuliira kukira na b̯uhooki
na kukiraho manyondo gaab̯wo.
11 Kukira maani byobyo bihab̯ura muheereza waamu,
mu kubihondera halimwo mpeera ginyamaani.
12 Naani yaakusobora kwetegereza nsobi̱ za mutima gwamwe?
Nganyira bibii bi̱nyaakoori̱ mub̯uteega.
13 Otandeka, gya muheereza waamu kukora bibii mbi̱gyendereeri̱.
Oteikiriza nibikanfuga.
B̯u̱b̯wo mwomwo ndibba ntakujunaanwa
kandi ntali na musangu gunyamaani hoi̱.
14 Ikirizanga bigambu byange na biteekerezu byange,
ai̱ Mukama, Lubbaali lwange kandi Mu̱cu̱ngu̱ri̱ wange.