18
Hali Mu̱handu̱ wa Bahi̱i̱mi̱. Zabbu̱li̱ gya Dau̱di̱, muheereza wa Mukama, gili na bigambu bya kyembu kya Dau̱di̱ nka ku̱yaabi̱weereeri̱ Mukama ha kiro kya Mukama b̯u̱yaamu̱cu̱ngwi̱ri̱ kuruga mu ngalu za banyanzigwa baamwe bensei̱ na mu ngalu gya Sau̱lo. Dau̱di̱ abaza naakoba yati.
1 Ai̱ Mukama, ka nnkwendya! Weewe maani gange.
2 Mukama weewe lubbaali lwange, lugo lwange, kandi Mu̱ju̱ni̱ wange,
Ruhanga wange yooyo b̯wingira b̯wange hali nzi̱ru̱ki̱ra,
ngab̯u gyange kandi b̯wi̱ru̱ki̱ro b̯wange, andwaniira.
3 Nkunga weewe Mukama, asemereeri̱ kuhaariizwa,
anjuna banyanzigwa bange.
4 Nyaali mbohaboheerye miguha mya lu̱ku̱u̱,
nku̱taku̱ti̱i̱rwe bijanga byaku̱nzi̱kya b̯u̱zi̱kya,
5 miguha mya kuzumu mi̱nzi̱ngazi̱ngi̱ri̱,
mitegu mya lu̱ku̱u̱ mi̱nkweti̱.
6 Mu kuwonawona kwange, nyaaku̱ngi̱ri̱ Mukama,
nyeesengereerya Ruhanga wange anjuna.
Yeegwi̱ri̱ iraka lyange mu Yeekaru gyamwe,
yeegwa kusaba kwange.
7 Mwomwo nsi gyakankana kandi gyazi̱ngi̱zi̱ka,
na mi̱si̱nge mya nsahu myakaruka
kandi myatengeeta hab̯wa ki̱ni̱ga kyamwe.
8 Mwi̱ca gwatu̱u̱ki̱ri̱ kuruga mu nni̱ndo gyamwe,
na mworo gu̱kwokya gwaruga mu mu̱nwa gwamwe,
makala gagegeeri̱ b̯u̱gegeeri̱ gaacuumuuka kuruga hali yo.
9 Yaani̱i̱nu̱ki̱ri̱ iguru yei̱za hansi,
nti̱ti̱ gi̱kwati̱i̱ri̱ ki̱mwei̱ hansi wa magulu gaamwe.
10 Yaani̱i̱ni̱ri̱ malayika keru̱bbi̱ yaadu̱du̱u̱ka,
yei̱za b̯wangu ha bimpaha bya mpehu.
11 Yaakora nti̱ti̱ gyamubbumba, yeeweeka hensei̱ bikaka biguma ndagali̱.
12 Kuruga mu kyererezi̱ kinyakubba mu mei̱so gaamwe,
hei̱zi̱ri̱ho bikaka byamwe biwa makala ga mworo na ndagali̱ giwa mahi̱ga.
13 Mukama yaabbwatu̱ki̱ri̱ mwiguru,
Waahakyendi̱ Hoi̱ yaahu̱lu̱kya iraka lye,
lyaguma ndagali̱ giwa mahi̱ga na makala ga mworo.
14 Yaalasa mbasi zaamwe, yaasaasaani̱a banyanzigwa baamwe,
yaabbwatula nkuba gyabasaraani̱a.
15 Mwomwo bi̱longi̱ro byeitaka byab̯u̱ku̱li̱i̱rwe,
na mi̱si̱nge mya nsi myasigala hasyanu̱,
ai̱ Mukama hab̯wa rwami̱ryo lwamu,
na hab̯wa ki̱ni̱ga kya rwoya lwamu.
16 Mukama, wa heiguru, yei̱zi̱ri̱ hansi yanjuna,
yansika mu meezi̱ galei.
17 Yanju̱ni̱ri̱ munyanzigwa wange munyamaani
na bab̯wo banyakunnoba,
hab̯wakubba baali nibakunkira maani.
18 Bandu̱mbi̱ri̱ mu kasu̱mi̱ ka b̯ujune,
bei̱tu̱ Mukama yandwani̱ri̱i̱ri̱.
19 Yanju̱ni̱ri̱ yantwala hagali,
yaancungura nikuli ku̱nsi̱i̱ma.
20 Mukama yampeeri̱ mpeera gya mananu gange,
yampa mu̱gi̱sa hab̯wa b̯utabba na musangu.
21 Hab̯wakubba mpondera mihanda mya Mukama,
timpuguka kuruga hali Ruhanga wange.
22 Hab̯wakubba biragiro byamwe byensei̱ mbyegi̱ri̱,
na mateeka gaamwe tinkagasuulanga.
23 Tingira kakuu kensei̱ mu mei̱so gaamwe,
nyeerinda kubba na musangu mu mutima gwange.
24 Nahab̯waki̱kyo Mukama ampeeri̱ mpeera hab̯wa mananu gange,
hab̯wakubba ngalu zange zi̱syanu̱ mu mei̱so gaamwe.
25 Obba wambabazi̱ hali ali na mbabazi̱,
obba mu̱terekereru̱ hali ali mu̱terekereru̱,
26 hali ali na mitima gu̱syanu̱, b̯wolokya mutima gu̱syanu̱,
bei̱tu̱ obba munyanzigwa wa nkori̱ gya bibii.
27 Hab̯wakubba ojuna batali na myehembu,
bei̱tu̱ banyamyepanku obeerya hansi.
28 Hab̯wakubba weewe kyererezi̱ kya taara kyange,
Mukama Ruhanga wange oleeta kyererezi̱ kumalaho nti̱ti̱.
29 Hab̯wa maani gaamu nkusobora ku̱ru̱mba i̱he,
na hab̯wa Ruhanga wange nkusobora ku̱gu̱su̱ka ki̱si̱i̱ka kya banyanzigwa.
30 Bei̱tu̱ yo Ruhanga, abba wa mihanda mi̱terekereru̱,
kigambu kya Mukama kiicala kyesigwa.
Yooyo ngab̯u gya bab̯wo bensei̱ bamwesiga.
31 Mukama yooyo Ruhanga yankei,
kandi Ruhanga yankei, yooyo atulwaniira.
32 Yooyo Ruhanga antamwo maani,
aterekereerya mihanda myange.
33 Yaahangi̱ri̱ magulu gange nka ga mparaaki,
yampa kwemeera hakyendi̱ wa lusahu.
34 Atendeka ngalu zange kulwana,
na mikono myange kureega b̯uta b̯wa kyoma.
35 Ompa ngab̯u gya kujunwa kwamu,
onsagika na mukono gwamu gwab̯udyo,
nompa kubba wa maani.
36 Ongali̱hi̱ri̱i̱rye muhanda hanyaaraba,
aleke magulu gange gatatereb̯uka.
37 Nzi̱ru̱u̱kya banyanzigwa bange nimbakwata,
ti̱nzi̱ra i̱nyu̱ma ku̱doosya b̯umbamaliraho ki̱mwei̱.
38 Mbakuutira ki̱mwei̱ aleke batabyoka,
bagwa nibalaala hansi mu magulu gange.
39 Ompa maani ga kulwana,
okuutira ki̱mwei̱ bandu̱mba noobamalaho.
40 Oha banyanzigwa bange ku̱nzi̱ru̱ka,
na bannoba mbakuuta ni̱mbazi̱kya.
41 Beesengereerye babajune, bei̱tu̱ hatakabbeho aku̱bei̱ramwo,
baateeri̱ho na kusaba Mukama abacungure, bei̱tu̱ atakabajune.
42 Mbakuuta nimbafoora icuucu litwalwa mpehu,
nimbazigazigina nka bitogodo mu muhanda.
43 Oncu̱ngwi̱ri̱ hali bantu bandu̱mba,
wanfoora mwebemberi̱ wa mahanga,
bantu banteegi̱ri̱ bampeerezanga.
44 B̯u̱baakanzegwanga baaku̱ndanga malu̱ nibantamwo ki̱ti̱i̱ni̱sa,
Banyamahanga bangonderanga.
45 Bakwatwa b̯u̱ti̱i̱ni̱,
nibaruga mu bigo byab̯u nibakukankana.
46 Mukama mwomi! Asi̱i̱mwe lubbaali lwange!
Ahaariizwe Ruhanga Mu̱ju̱ni̱ wange!
47 Yooyo Ruhanga ahoora nzi̱go hab̯wange,
ampa kufuga mahanga,
48 anjuna hali banyanzigwa bange.
Kwokwo ontu̱mbwi̱ri̱ hali banyaku̱ndwani̱sya,
oju̱ni̱ri̱ kuruga hali bantu beetagu̱.
49 Nahab̯waki̱kyo, ai̱ Mukama, nyaaku̱si̱i̱manga mu mahanga,
nyaahi̱i̱manga nimpaariiza ibara lyamu.
50 Ruhanga aha mukama mutongoole waamwe ku̱si̱ngu̱ra ntaru zinene,
abba wa ngonzi zinene hali yo,
hali Dau̱di̱, na ba mu lula lwamwe, biro na biro.