135
1 Haari̱i̱ze Mukama!
Haari̱i̱ze ibara lya Mukama,
mu̱mu̱haari̱i̱ze nywe baheereza ba Mukama,
2 nywe bab̯wo beemeera mu nnyu̱mba gya Mukama,
mu zi̱gati̱ gya nnyu̱mba gya Ruhanga weetu̱!
3 Haari̱i̱ze Mukama, kubba Mukama abba murungi,
mu̱ku̱gi̱ze ibara lyamwe, hab̯wakubba wa mbabazi̱!
4 Mukama yeekomeeri̱ yankei Yakobbo,
I̱saleeri̱ abbe waamwe yankei.
5 Kiki nkyegi̱ri̱ nti, Mukama wamaani,
kandi nti Mukama weetu̱ akira baruhanga bensei̱.
6 B̯uli kyensei̱ kya Mukama ki̱yendya kukora
mwiguru na ha nsi akikora b̯u̱kori̱,
mwitaka na mu ndi̱ha.
7 Yooyo aragira bikaka biruge ha mmaliriro gya nsi.
Yooyo aha nkuba kubbwatuka mu ndagali̱
kandi yooyo aleeta mpehu kuruga mwibiikiro lyamwe.
8 Yooyo yei̱ti̱ri̱ mi̱zegei̱zo mya Mi̱si̱ri̱,
myensei̱ mya bantu na bisolo,
9 muli weewe, Mi̱si̱ri̱, hooho yaasi̱ndi̱ki̱ri̱
b̯uwoneru na byamahanu,
naakufubira Faraaho na baheereza baamwe.
10 Yaazi̱ki̱i̱rye mahanga ganene,
yei̱ta bakama bamaani nka,
11 Si̱honi̱, mukama wʼAbamooli̱,
Ogi̱, mukama wa Bbasaani̱,
na bakama bensei̱ ba Kanaani̱,
12 yaahayo nsi gyab̯u nka mugab̯u,
yaagi̱heeri̱yo nka mugab̯u hali bantu baamwe Bei̱saleeri̱.
13 Ibara lyamu, ai̱ Mukama, lya biro na biro
kaku̱u̱mi̱i̱re kaamu, ai̱ Mukama, kabbangaho biro na biro.
14 Kubba Mukama alitoolaho bantu baamwe musangu,
kandi baheereza baamwe alibagiira mbabazi̱.
15 Bi̱si̱sani̱ bya mahanga bi̱baramya bib̯umbe kuruga mu feeza na zaabbu,
bikorwa b̯ukorwa mikono mya bantu.
16 Bili na mi̱nwa, bei̱tu̱ tibibaza,
bili na mei̱so, bei̱tu̱ tibiwona.
17 Bili na mapokopo, bei̱tu̱ ti̱byegwa,
habbe kubba na rwoya mu mi̱nwa myab̯u.
18 Bab̯wo babikora nabo kwokwo beisana,
na bab̯wo bensei̱ babyesiga kwokwo bali.
19 Nywe ba nnyu̱mba gyʼI̱saleeri̱, mu̱haari̱i̱ze Mukama!
Nywe ba nnyu̱mba gyʼAlooni̱, mu̱haari̱i̱ze Mukama!
20 Nywe ba nnyu̱mba gya Leevi̱, mu̱haari̱i̱ze Mukama!
Nywe batamwo Mukama ki̱ti̱i̱ni̱sa, mu̱haari̱i̱ze Mukama!
21 Mukama ahaariizwe mu Sayu̱u̱ni̱,
yogwo eicala mu Yeru̱salemu̱!
Haari̱i̱ze Mukama.