116
1 Nyendya Mukama, hab̯wakubba yeegwi̱ri̱
iraka lyange na kwesengereerya kwange.
2 Hab̯wakubba yantegeeri̱ ipokopo,
b̯undibba nicaali mwomi nkwi̱za kumusabanga.
3 Nyaaboheerwe miguha mya lu̱ku̱u̱,
kandi b̯u̱ru̱mi̱ b̯wa kuzumu b̯wakwata,
nyawonawona na b̯ujune na kusaalirwa.
4 Mwomwo nyaaku̱ngi̱ri̱ ibara lya Mukama ninkoba yati,
“Ai̱ Mukama, nku̱kwesengereerya, ncungura!”
5 Mukama wa mbabazi̱ kandi wa munanu,
Ruhanga weetu̱ wa kisa.
6 Mukama alinda bab̯u̱ndaaru̱,
kabii b̯u̱kanzi̱zi̱i̱ri̱, yanju̱ni̱ri̱.
7 Ai̱ mwozo gwange, huumula,
hab̯wa birungi bya Mukama aku̱koleeri̱.
8 Ai̱ Mukama, weewe ohoneerye b̯womi b̯wange lu̱ku̱u̱,
mei̱so gange kulira mali̱ga,
magulu gange kukiibbala,
9 aleke ndibatirenge mu mei̱so ga Mukama,
mu nsi gya boomi.
10 Nyei̱ki̱ri̱ri̱i̱ze muliwe, ninkoba yati,
“Ndi mu b̯ujune b̯unene hoi̱,”
11 kambe nyaabazi̱ri̱ mu b̯utagyendeera ninkoba yati,
“Tihaloho mwesigwa.”
12 Hab̯wa birungi byankoleeri̱,
kikyani gya kindiha Mukama?
13 Ndikuha vi̱i̱no nka kihongwa hab̯wa kujunwa kwange,
kandi ndyeta ibara lya Mukama.
14 Ndi̱doosereerya bi̱byo bi̱nyamu̱ragani̱si̱i̱rye,
mu mei̱so ga bantu baamwe bensei̱.
15 Kya muhendu mu mei̱so ga Mukama,
bantu barungi b̯u̱bakwa.
16 Ai̱ Mukama, ndi muheereza waamu,
nka mmaama kuyaali muheereza waamu.
Osu̱u̱mu̱rwi̱ri̱ kuruga mu njegere
17 Ndikuhongera kyonzira kya ku̱ku̱si̱i̱ma,
kandi ndyeta ibara lya Mukama.
18 Ndi̱doosereerya miragu myange hali Mukama,
mu mei̱so ga bantu baamwe bensei̱,
19 mu zi̱gati̱ gya nnyu̱mba gya Mukama,
hakati̱ na hakati̱, gyamu, ai̱ Yeru̱salemu̱.
Haari̱i̱ze Mukama!