115
1 Ai̱ Mukama twetwe kwahi, twetwe kwahi,
bei̱tu̱ ibara lyamu lyolyo litunge ki̱ti̱i̱ni̱sa,
hab̯wa ngonzi zinene na b̯wesigwa b̯wamu!
2 Hab̯waki mahanga gakoba nti,
“Ruhanga waab̯u ali hanya?”
3 Ruhanga weetu̱ ali mwiguru,
akora byensei̱ nka kuyenderye.
4 Bi̱si̱sani̱ byab̯u bi̱baramya bib̯umbe kuruga mu feeza na zaabbu,
bikorwa b̯ukorwa mikono mya bantu.
5 Bili na mi̱nwa, bei̱tu̱ tibibaza,
bili na mei̱so, bei̱tu̱ tibiwona.
6 Bili na mapokopo, bei̱tu̱ ti̱byegwa,
bili na nni̱ndo, bei̱tu̱ tibikaga.
7 Bili na ngalu, bei̱tu̱ tibikwata kintu,
magulu gaabyo tigalibata,
mu mimiro myabyo tihaloho iraka lihulukamwo.
8 Bab̯wo babikora nabo kwokwo beisana,
na bab̯wo bensei̱ babyesiga kwokwo bali.
9 Ai̱ I̱saleeri̱, mwesiga Mukama!
Yooyo mu̱ju̱ni̱ kandi ngab̯u gyenyu̱.
10 Ai̱ we nnyu̱mba gya Alooni̱ mwesige Mukama!
Yooyo mu̱ju̱ni̱ kandi ngab̯u gyenyu̱.
11 Nywe batamwo Mukama ki̱ti̱i̱ni̱sa, mumwesige Mukama!
Yooyo mu̱ju̱ni̱ kandi ngab̯u gyenyu̱.
12 Mukama aku̱twi̱zu̱ka kandi alituha mu̱gi̱sa,
aliha nnyu̱mba gyʼI̱saleeri̱ mu̱gi̱sa,
aliha nnyu̱mba gya Alooni̱ mu̱gi̱sa,
13 bab̯wo batamwo Mukama ki̱ti̱i̱ni̱sa, Mukama alibaha mu̱gi̱sa,
atasoroori̱mwo bato na bahandu̱.
14 Mukama akuhe baana,
na beizukulu baamu abahe baana!
15 Mukama munyakuhanga iguru na nsi,
abahe mu̱gi̱sa!
16 Iguru lya Mukama yankei
bei̱tu̱ nsi yaagi̱heeri̱ bantu.
17 Baku̱u̱ tibahaariiza Mukama,
nab̯ubakubba bab̯wo bagyenda mu nsi gya baku̱u̱.
18 Bei̱tu̱ tu̱kwi̱za kuhaariiza Mukama,
hataati̱ na biro byensei̱.
Haari̱i̱ze Mukama!