12
1 Yendya kwega, anywana magezi̱,
bei̱tu̱ anoba kuhab̯urwa abba mudoma.
2 Mukama asi̱i̱ma barungi,
bei̱tu̱ anoba bakora bya b̯u̱jeemu̱.
3 B̯ubiibi tib̯uleeta b̯u̱si̱nge,
bei̱tu̱ murungi abba mu̱si̱gi̱ku̱.
4 Mu̱kali̱ mwegyenderezi̱ aheesya i̱ba ki̱ti̱i̱ni̱sa,
bei̱tu̱ mu̱hemu̱ri̱ eisana kookoro mu maku̱ha gaamwe.
5 Biteekerezu bya barungi byolokya b̯winganiza,
bei̱tu̱ kuhab̯ura kwa babiibi b̯ubba b̯u̱gobya
6 Babiibi babaza bya b̯wi̱ti̱,
bei̱tu̱ kubaza kwa barungi kujuna bantu.
7 Babiibi bahwerekeera ni̱basyeraho,
bei̱tu̱ nnyu̱mba gya barungi gilyomeera.
8 Ali na magezi̱ asi̱i̱mwambe,
bei̱tu̱ wa biteekerezu bibiibi agayuwambe
9 Kirungi kub̯undaara nooli na kyoli nakyo,
kukira kwehaariiza otali na kyakudya.
10 Muntu murungi mutima agumaara ha bisolo byamwe,
bei̱tu̱ mubiibi tabba na mbabazi̱ nabyo.
11 Akwekamba kulima abba na bidyo binene,
bei̱tu̱ ei̱ru̱kya bitakugasa abba mudoma.
12 Babiibi tibabba na b̯u̱si̱gi̱ki̱ro,
bei̱tu̱ barungi babba basi̱gi̱ku̱ nka ikolo lya musaali.
13 Kanwa kabiibi kabonebonesya mukamako,
bei̱tu̱ murungi akena kabii.
14 Bigambu birungi bi̱si̱i̱mwa na birungi,
bikorwa birungi biheeb̯wa mpeera gyabyo.
15 Mudoma ateekereza b̯uli byakora bibba bi̱doori̱,
bei̱tu̱ mu̱gezi̱ yeetegeerya bibakumuhab̯ura.
16 Ki̱ni̱ga kya mudoma ti̱kyebi̱sa,
bei̱tu̱ mu̱gezi̱ baalu̱ma nagaya b̯u̱gayi̱.
17 Mu̱kei̱so wa mazima aleetaho b̯winganiza,
bei̱tu̱ mu̱gobya abaza b̯u̱gobya.
18 Bigambu bya b̯ugwagwa bi̱tu̱u̱ta nka mpirima,
bei̱tu̱ kalimi ka mu̱gezi̱ kaleeta kuhona.
19 B̯u̱gobya b̯wicalaho b̯wi̱re b̯u̱dooli̱,
bei̱tu̱ mazima biro na biro.
20 Nkori̱ za bibii zitekereza mu kukora bibiibi,
bei̱tu̱ bateekereza birungi babba na kusemererwa.
21 Murungi talidweb̯waho kabii,
bei̱tu̱ babiibi beicala nibawonawona.
22 Mukama annoba babaza b̯u̱gobya,
kyonkei asi̱i̱ma bananu.
23 Mu̱gezi̱ ti̱yolokya kwetegereza kwamwe,
bei̱tu̱ mudoma ararangya b̯udoma b̯wamwe.
24 Kwekamba kufoora bantu kubba beebemberi̱,
b̯ugarei nib̯ubaha kubba beiru.
25 Kwelalikiira kuleetera muntu b̯ujune,
bei̱tu̱ bigambu birungi bimuha kusemererwa.
26 Murungi aterekereerya bei̱ra baamwe,
bei̱tu̱ mubiibi abahabya b̯u̱habya.
27 Mwolo alemwa kadi ku̱ti̱mba byamwe,
bei̱tu̱ mwekambi̱ atunga b̯inene.
28 Muhanda gwa bananu gutwala mu b̯womi,
hatali mu lu̱ku̱u̱.