11
1 Mukama anoba bi̱pi̱myo bi̱tadoori̱,
bei̱tu̱ asi̱i̱ma bi̱doori̱.
2 Hei̱nyu̱ma wa myepanku, hei̱zaho nsoni̱,
bei̱tu̱ mu kub̯undaara halimwo magezi̱.
3 Bananu Beega mu̱li̱ngo gwa kukora bi̱doori̱,
bei̱tu̱ bateesigwa, balihwerekeera.
4 Itungu tililimugasa ha kiro kya kumucwera musangu,
bei̱tu̱ b̯urungi b̯wa mutima b̯ulimujuna lu̱ku̱u̱.
5 Muntu murungi yeega mu̱li̱ngo gwa kukora bi̱dooori̱,
bei̱tu̱ mubiibi yeeletera ku̱zi̱ka.
6 Barungi bajunwa hab̯wa kukora mananu,
bei̱tu̱ bateesigwa balikwatirwa mu bibeegomba.
7 Mubiibi akwa na byeni̱hi̱zo byamwe,
na bi̱yani̱hi̱rengi̱ kutunga ni̱bi̱syera.
8 B̯unanu wa muntu b̯umujuna bizib̯u,
bei̱tu̱ ni̱bi̱i̱ri̱ra babiibi.
9 Kanwa kaateegi̱ri̱ Ruhanga kahwerekeereerya bataahi̱,
bei̱tu̱ kwetegereza kwa barungi kubajunambe.
10 Mi̱gi̱sa mya barungi mi̱bi̱mba rub̯uga,
ku̱kwa kwa babiibi kuleeta kusemererwa.
11 Barungi baleetera rub̯uga kuhanda,
bei̱tu̱ bya babiibi babaza biluletera kuhwerekeera.
12 Mugaya bei̱ra abba mudoma,
bei̱tu̱ mu̱gezi̱ yeerinda kalimi kaamwe.
13 Warugambu yensei̱ alu̱mbu̱u̱la nsita,
bei̱tu̱ mwesigwa agibbumbirambe.
14 Ihanga b̯ulitabba na mwebemberi̱ mu̱gezi̱ lihwerekeerambe,
bei̱tu̱ hali bakuhab̯ura banene habbaho b̯u̱si̱nge.
15 Yemerera munyamahanga abba nakweletera bizub̯u,
bei̱tu̱ asuula kumuha b̯wema abba na b̯u̱si̱nge.
16 Mu̱kali̱ wa mbabazi̱ aheeb̯wa ki̱ti̱i̱ni̱sa,
bei̱tu̱ badulu batemu batunga itungu lisa.
17 Mudulu wa mbabazi̱, asagirwa mbabazi̱ zaamwe,
bei̱tu̱ babiibi beeleetera bizub̯u.
18 Itungu lya mubiibi tilicalaho,
bei̱tu̱ akora birungi atunga bi̱mu̱semereeri̱.
19 Akwatira ki̱mwei̱ kukora bi̱doori̱ alyomeera,
bei̱tu̱ aku̱toolya b̯ubiibi ali̱zi̱ka.
20 Mukama anoba bateekereza bibiibi,
bei̱tu̱ yendya bakora birungi.
21 Mu mananu babiibi balifubirwa,
bei̱tu̱ barungi, kabii tikalibadwaho.
22 Ndengeeti̱ gitali na ngesu,
giisana mpi̱ta gya zaabbu mu nni̱ndo gya mpunu.
23 Barungi bibeegomba bibaleetera birungi,
bei̱tu̱ bya babiibi bani̱hi̱ra bibarugirwamwo kubakwatirwa ki̱ni̱ga.
24 Haloho agaba na b̯wenda naateeryaho b̯u̱teerya itungu lyamwe,
wondi naanakuhara hab̯wa b̯wi̱mi̱ b̯wamwe.
25 Ali mwenda ali̱gu̱du̱hara,
na akonyera bantu yoodede alikonyerwa.
26 Abi̱sa bidyo bi̱bakwendya kugula, bamubaza kubiibi,
bei̱tu̱ atundira habakubyetagira aheeb̯wa mu̱gi̱sa.
27 Atoolya birungi yaagya birungi,
bei̱tu̱ b̯ubiibi b̯wi̱zi̱ra aku̱b̯u̱toolya.
28 Yeesiga b̯u̱gu̱u̱da b̯wamwe alikunkumuka nka bikoora bi̱hotoku̱,
bei̱tu̱ barungi balyomeera nka bikoora bibisi.
29 Atuntuza maka gaamwe, tali na kyalitunga,
kandi mudoma afugwa mu̱gezi̱ biro byensei̱.
30 B̯urungi b̯uleeta b̯womi,
mu̱gezi̱ asika mitima mya bantu.
31 Barungi bakabba na mpeera gyab̯u mumu mu nsi,
na nkori̱ za bibii zi̱kwi̱za kufubirwa!