21
Исаако
1 Сар Вов и пхэнда, РАЙ сикавда мила Саррати тай срицарда Пэхкиро лав.
2 Кала Авраамо ужэ ачиля пурано, Сарра ачиля пхари тай бэянда лэсти чявэ, дэ кодыя вряма, сар пхэнда Дэвэл.
3 Авраамо дэня чяворэсти, савэ бэянда лэсти Сарра, лав Исаако.
4 Кала лэхкирэсти чявэсти Исаакости ачиля охто дивэ, Авраамо обчинда лэ, сар прыпхэнда лэсти Дэвэл.
5 Авраамости сля шэл бэрш, кала лэстэ бэяндапэ чяво Исаако.
6 Сарра пхэнда:
— Дэвэл заачявда ман тэ асапэ. Кожно, ко ушунэла пала када, розасалапэ екхтханэ манца.
7 — Тай допхэнда: — Ко б пхэнда Авраамости, со Сарра авэла тэ парварэ колинаґа? Ай мэ бэяндом лэсти чявэ дэ лэхкиро пхуранимо.
8 Чяворо выбариля тай сля отлито колинатар. Дэ кадыва диво, кала Исаако сля отлито колинатар, Авраамо стерда баро сэрбатори.
Авраамо вытрадэл Агаря Измаилоґа
9 Сарра удыкхля, со чяво, савэ бэянда Авраамости Агарь Египтостар, подасалпэ Исаакостар,
10 тай пхэнда Авраамости:
— Вытрадэ кадыла копыльница тай латирэ чявэ, пала када со чяво кадылатиро копыльницатиро на лэла амаро хулаемо екхтханэ мурэґа чявэґа Исаакоґа.
11 Авраамо сля фартэ холямо, пала кода со и кадыва сля лэхкиро чяво.
12 Ай Дэвэл пхэнда лэсти:
— На холяв пала чяворэ тай копыльницатэ. Пошунпэ Сарра тай стер вса, сар вой пхэнэл, пала када со порода тутэ джяла Исаакостар.
13 Ай чявэстар копыльницатирэстар Мэ стерава инте народо, пала када со вов тиро чяво.
14 Пэ аврэ дивэ фартэ дэнзор Авраамо лиля хамо, пани дэ бурдюко тай дэня Агаряти: тховда лати пэ пхикэн тай отбичялда котар ла тай чяворэ. Вой джиля тай пхирэлас пав шуки пхув Вирсавия.
15 Кала пани дэ бурдюко на ачиля, вой ачявда чяворэ тала рандёры,
16 отджиля надур тай прэбэшля пэ дром, сар урял стрела лукостар. Вой думисарэлас: «На авава тэ дыкхэ, сар чяворо мэрэл». Кала вой бэшэлас котэ, розровиняпэ фартэ.
17 Дэвэл ушунда чяворэхкиро ровимо, тай Дэвлэхкиро ангело ачиля тэ дэдумэ болыбнатар Агарятэ:
— Со туґа, Агарь? На дар, Дэвэл ушунда, сар ровэл чяворо котэ, тев вов пашлёл.
18 Вщи, ваздэ лэ, лэ чяворэ пала вастэ. Мэ вылиджява лэстар баро народо.
19 Дэвэл оттерда лати якха, тай вой удыкхля ханинг панеґа. Вой джиля, пхэрдиля бурдюко панеґа тай дэня тэ пэ чяворэсти.
20 Дэвэл сля чяворэґа. Измаило выбариля тай ачиля тэ джювэ дэ шуки пхув. Вов фартэ мишто марэлас лукостар.
21 Вов джюда дэ шуки пхув Парано, тай дэй лиля важ лэсти ромня Египтостар.
Авраамохкиро допхэнимо Авимелехоґа дэ Вирсавия
22 Дэ кодыя вряма Авимелехо тай Фихоло, барэдэр рай дэ лэхкирэ войско, пхэндэ Авраамости:
— Дэвэл туґа дэ вса, со ту терэх.
23 Дэ солах манди катэ англа Дэвлэ, со ту на хохавэґа ни ман, ни мурэн чяворэн, ни мурэн потомконэн. Стер манди тай пхуяти, дэ сави ту екхатар джювэх, кодыя жэ мила, сави мэ стердом тути.
24 Авраамо пхэнда:
— Дав солах.
25 Тунчи Авраамо выпхэнда Авимелехости пала ханинг панеґа, саво копыли Авимелехохкирэ лиле зораґа.
26 Ай Авимелехо пхэнда:
— Мэ на джянав, ко када стерда. Ту на дэдуманян, и дыкалэ мэ на шундом пала када.
27 Авраамо анда цыкно тай баро ското, дэня лэн Авимелехости, тай вонэ стердэ екх екхэґа допхэнимо.
28 Авраамо отлиля гуртостар ефта тэрнэн бакрорэн,
29 тай Авимелехо пхучля Авраамостар:
— Со када за ефта тэрнэ бакрорэн, савэн ту отлилян?
30 Авраамо пхэнда:
— Прылэ мандар ефта кадылэн тэрнэн бакрорэн дэ знако, со мэ выґанавдом кадыва ханинг тай со вов муро.
31 Авраамо акхарда кодэва тхан Вирсавия, пала кода со вонэ дуйджинэ дэне котэ солах.
32 Тунчи сар вонэ допхэндэпэ дэ Вирсавия, Авимелехо тай Фихоло, барэдэр рай дэ лэхкирэ войско, рисардэпэ дэ пхув филистимлянэндири.
33 Дэ Вирсавия Авраамо чюта дэ пхув рандь-тамариско тай прыакхарда котэ лав РАЕХКИРО, Дэвлэхкиро Вечнонэ.
34 Авраамо джюда пэ филистимско пхув бут вряма.