20
Авраамо тай Сарра Авимелехостэ
Котар Авраамо пэрэджиля дэ пхув Негево тай джювэлас машкар Кадешо тай Шуро. Вов савись вряма джювэлас дэ Гераро. Котэ вов пхэнэлас всаворэнди, со Сарра сля лэхкири пхэнь. Авимелехо, тхагари Герарохкиро, бичялда пала Сарра тай лиля ла пэстэ. Ай ратяґа дэ сунэ Авимелехостэ авиля Дэвэл тай пхэнда лэсти:
— Тутэ авэла мэримо пала джювли, савля ту лилян пэстэ: вой пала ром.
Нэ Авимелехо на лэласпэ латэ, тай пала када вов пхэнда:
— Хулай, Ту жэ на умарэґа навуджило народо? Вов жэ пхэнда манди, со вой лэхкири пхэнь, тай вой пхэнда, со вов латиро пхрал. Катэ мэ на тердом бэзэх на ды годи, на ды рындуря.
Дэвэл пхэнда лэсти дэ сунэ:
— Чяче, Мэ джянав, со годи тири жужи: када Мэ урицардом тут бэзэхатар англа Мандэ, тай на дэнём тути тэ лэпэ латэ. Кана рисар ромня ромэсти, пала када со вов — англунари. Вов помангэлапэ пала тут, тай ту ачеґапэ джювдо. Ай сар ту на рисарэґа ла, джян, со тути тай тирэсти родости тэ на унашэ мэриматар.
Пэ авэр диво дэнзор Авимелехо стидэня всаворэн пэхкирэн пашутнэн тай роспхэнда лэнди, со тердапэ, тай вонэ фартэ дарэне. Тунчи Авимелехо акхарда Авраамо тай пхэнда:
— Со ту амэнца тердан? Саво врытимо мэ тути тердом, со ту андан кацави пхари дош пэ ман тай пэ муро тхагаримо? Ту тердан манца кади, сар нащи тэ терэ.
10 Тай Авимелехо пхучля Авраамостар:
— Со сля тутэ пэ годи, кала ту тердан кацаво?
11 Авраамо пхэнда:
— Мэ подумисардом: « Дэ кадыва тхан, чяче, нинай дар Дэвлэхкиро, тай мануша умарэна ман пала муря ромня». 12 Ай инте, вой чяче мури пхэнь, чей мурэ дадэсти, ай на муря датар. Вой ачиля муряґа ромняґа. 13 Кала Дэвэл бичялда ман мурэ дадэхкирэ цэрэстар тэ пхирэ пав пхув, мэ пхэндом лати: «Стер манди кацаво лачё рындо: тев бы амэ на авиле, пхэн пала ман, со мэ тиро пхрал.
14 Тунчи Авимелехо анда цыкно тай баро ското, копылен тай копыльницэн тай дэня лэн Авраамости. Вов инте рисарда лэсти лэхкиря ромня Сарра. 15 Авимелехо пхэнда:
— Мури пхув англа тутэ: джюв, тев камэх.
16 Саррати вов пхэнда:
— Мэ дэнём тирэсти пхралэсти пхангли шэкели рупь, соб тэ ушаравэ тири холи дэ якхэн всаворэн, ко дэ тиро цэр. Тири патив кана упалэ жужи.
17 Авраамо помангляпэ Дэвлэсти, тай Дэвэл састярда Авимелехо, лэхкиря ромня тай копыльницэн, тай вонэ упалэ ачиле тэ бэянэ чяворэн. 18 Ай дыкалэ РАЙ на дэлас ни екх джювляти дэ Авимелехохкиро цэр тэ бэянэ, пала када со Авимелехо лиля пэсти Сарра, Авраамохкиря ромня.