5
ⵅ ⵓⴷⴻⴱⴱⴰⵔ ⵏ ⵜⵎⴻⵙⵎⵓⵏⵜ
1 ⵡⴰⵔ ⵜⵉⵍⵉⴷ ⵜⴻⵡⵄⴰⵔⴻⴷ ⵉ ⵓⵡⴻⵙⵙⴰⵔ, ⵎⴰⵛⴰ ⵏⴻⵙⵃ ⵉ-ⵜ ⴰⵎ ⴱⴰⴱⴰⵛ, ⵓⵛⴰ ⵉⴱⵍⵉⵖⴻⵏ ⴰⵎ ⵡⴰⵡⵎⴰⵜⴻⵏ ⵏⵏⴻⵛ,
2 ⵜⵉⵡⴻⵙⵙⵓⵔⴰ ⴰⵎ ⵜⵉⵢⴻⵎⵎⴰⵜⵉⵏ, ⵓⵛⴰ ⵜⵉⵄⴻⵣⵔⵉⵢⵢⵉⵏ ⴰⵎ ⵙⵓⵢᵉⵜⵎⴰⵛ ⵏⵏⴻⵛ, ⵙ ⵎⴰⵔⵔⴰ ⵍⴻⵚⴼⴰⵢⴻⵜ.
3 ⵡⴻⵇⵇⴰⵔ ⵜⵉⵊⵊⴰⵍ, ⵜⵉⵏⵏⵉ ⴷ ⵜⵉⴷⴻⵜⵜ ⴵⴰⵏⵜ ⴷ ⵜⵉⵊⵊⴰⵍ.
4 ⵎⴰⵍⴰ ⵛⴰ ⵏ ⵜⴰⵊⵊⴰⵍⵜ ⵖⴰⵔⴻⵙ ⵉⵃⴻⵏⵊⵉⵔⴻⵏ ⵏⵉⵖ ⴰⵢⵢⴰⵡⴻⵏ, ⴻⵊⵊ ⵉ-ⵜⴻⵏ ⴰⴷ ⵍⴻⵎⴷⴻⵏ ⴷ ⴰⵎⴻⵣⵡⴰⵔ ⵎⴰⵃⴻⵏⴷ ⴰⴷ ⴳⴳⴻⵏ ⵎⵉⵏ ⵉⵜⵜⵍⵉⵇⴻⵏ ⴷⵉ ⵟⵟⵡⴻⵄ ⵏ ⵍⴰⴵ ⵏⵙⴻⵏ, ⴰⴷ ⴷⴷ-ⴰⵔⵔⴻⵏ ⵉ ⵍⵡⴰⵍⵉⴷⵉⵏ ⵎⵉⵏ ⵜⵜⵓⵔⵙⴻⵏ, ⵎⵉⵏⵣⵉ ⴷⴷⴻⴳⴳⴰ ⵢⵓⵙⴰ-ⴷⴷ ⵅ ⵍⵅⴰⴹⴰⵔ ⵏ ⴰⵔⴻⴱⴱⵉ.
5 ⵎⴰⵛⴰ ⵜⴰⵊⵊⴰⵍⵜ ⵏⵉⵛⴰⵏ ⴷ ⵜⴻⵏⵏⵉ ⵉⴵⴰⵏ ⵡⴻⵃⵃⴷⴻⵙ, ⵜⴻⵙⵙⵉⵜⵉⵎ ⴷⵉ ⴰⵔⴻⴱⴱⵉ ⵓⵛⴰ ⵜⵚⴻⴱⴱⴰⵔ ⴷⵉ ⵜⵓⵜⵔⴰ ⴷ ⵜⵥⴰⴵⵉⵜⵉⵏ, ⴵⵉⵍⴻⵜ ⴷ ⵡⴰⵙⵙ.
6 ⵎⴰⵛⴰ ⵜⴻⵏⵏⵉ ⵉⵡⴹⴰⵏ ⴷⵉ ⵜⵓⴷⴰⵔⵜ ⵏ ⵏⵏⴻⵛⵡⴻⵜ, ⴰⵇⴰ ⵜⴻⵎⵎⵓⵜ ⵡⴰⵅⵅⴰ ⵜⴻⴷⴷⴰⵔ.
7 ⵡⴻⵚⵚⴰ ⵉ-ⵜⴻⵏⵜ ⵜⵉⵎⴻⵙⵍⴰⵢⵉⵏ-ⴰ, ⵃⵉⵎⴰ ⴰⴷ ⵉⵍⵉⵏⵜ ⴱⵍⴰ ⵍⵄⵉⴱ.
8 ⵎⵉⵏⵣⵉ ⵎⴰⵍⴰ ⵛⴰ ⵏ ⵢⵉⵊⵊ ⵡⴰⵔ ⵉⵜⵜⵀⵉⵍⵍⵉ ⵛⴰ ⴷⵉ ⵡⵉ ⵉⴵⴰⵏ ⵏⵏⴻⵙ, ⴷ ⴰⵎⴻⵡⴰⵔⵓ ⴷⴻⴳ ⵢⵉⵏⵏⵉ ⵉⴵⴰⵏ ⴷ ⴰⵢⵜⴱⴰⴱ ⵏ ⵜⴰⴷⴷⴰⵔⵜ ⵏ ⴼⴰⵎⵉⵍⵢⴰ ⵏ ⵢⵉⵏⵏⵉ ⵢⵓⵎⵏⴻⵏ, ⴰⵇⴰ ⵡⴰⵏⵉⵜⴰ ⵉⵎⵎⴻⵏⴹⴰⵔ ⵍ’ⵉⵎⴰⵏ ⵓⵛⴰ ⵏⴻⵜⵜⴰ ⵎⴰⵀⵓ ⵅ ⵢⵉⵏⵏⵉ ⵡⴰⵔ ⵢⵓⵎⵉⵏⴻⵏ ⵛⴰ.
9 ⵉⵅⴹⴰⵔ ⵅⴻⵏⵏⵉ ⵉⵛⵜ ⵏ ⵜⴰⵊⵊⴰⵍⵜ ⵉⵍⵍⴰ ⵎⴰⵍⴰ ⵖⴰⵔⴻⵙ ⵣⵉ ⵙⴻⵜⵜⵉⵏ ⵏ ⵉⵙⴻⴳⴳⵯⵓⵙⴰ ⴰⵍ ⵜⵙⴰⵡⴻⵏⵜ, ⵉⵛⵜ ⵏ ⵜⴰⵊⵊⴰⵍⵜ ⵏⵏⵉ ⵜⵓⵖⴰ ⴷ ⵜⴰⵎⵖⴰⵔⵜ ⵏ ⵉⵊⵊ ⵏ ⵡⴻⵔⵢⴰⵣ,
10 ⵜⴻⵏⵏⵉ ⵖⴰⵔ ⵜⴻⴵⴰ ⵛⵛⵀⴰⴷⴻⵜ ⴰⵇⴰ ⵜⴻⴳⴳⴰ ⵍⴻⵅⴷⴰⵢⴻⵎ ⵜⵉⵚⴻⴱⵃⴰⵏⵉⵏ: ⵏⵉⵖ ⵜⴻⵙⵙⴻⵢⵎⵉ ⵉⵃⴻⵏⵊⵉⵔⴻⵏ ⵏⵏⴻⵙ, ⵏⵉⵖ ⵜⴰⵔⴻⵃⵃⴻⴱ ⵙ ⵉⴱⴰⵔⵔⴰⵏⵉⵢⵢⴻⵏ, ⵏⵉⵖ ⵜⴻⵙⵙⵉⵔⴻⴷ ⵉⴹⴰⵔⴻⵏ ⵏ ⵉⵎⵇⴻⴷⴷⴰⵙⴻⵏ, ⵏⵉⵖ ⵜⴻⵡⵛⴰ ⴼⵓⵙ ⵉ ⵢⵉⵏⵏⵉ ⵉⵜⵜⵡⴰⵃⵚⴰⵔⴻⵏ, ⵡⴰⵀ, ⴰⵇⴰ ⵜⴻⴳⴳⴰ ⵎⴰⵔⵔⴰ ⵍⵅⴻⴷⵎⴻⵜ ⵜⴰⵚⴻⴱⵃⴰⵏⵜ.
11 ⵎⴰⵛⴰ ⵡⴰⵔ ⵇⴻⴱⴱⴻⵍ ⵜⵉⵊⵊⴰⵍ ⵜⵉⵎⴻⵥⵢⴰⵏⵉⵏ, ⵎⵉⵏⵣⵉ ⵏⵉⵜⴻⵏⵜⵉ ⵜⵜⴻⵅⵙⴻⵏⵜ ⴰⴷ ⵙⵙⴰⵔⵅⵓⵏⵜ ⵉ ⵍⵎⴰⵙⵉⵃ ⵙ ⵏⵏⴻⵛⵡⴰⵜ ⵏⵙⴻⵏⵜ, ⴰⵔⴻⵣⵣⵓⵏⵜ ⵅ ⵉⵊⵊ ⵏ ⵡⴻⵔⵢⴰⵣ.
12 ⴰⵇⴰ ⵛⵛⵔⴻⵄ ⵏⵙⴻⵏⵜ ⵉⵎⵜⴻⵏ, ⵎⵉⵏⵣⵉ ⵙⵙⴰⵔⵙⴻⵏⵜ ⵍ’ⵉⵎⴰⵏ ⵏⵙⴻⵏⵜ ⴰⵎⴻⵣⵡⴰⵔ ⵖⴰⵔ ⵓⵖⴻⵣⴷⵉⵙ.
13 ⵎⴰⵖⴰⵔ ⵏⵉⵜⴻⵏⵜⵉ ⵙⵙⵍⴻⵎⴷⴻⵏⵜ ⵉⵏⵏⴻⵖⵏⵉ ⵍⴻⵄⵇⴻⵣ ⴰⵎ ⴳⴳⵓⵔⴻⵏⵜ ⵅ ⵜⵓⴷⵔⵉⵏ, ⵡⴰⵔ ⵉⴵⵉ ⵙⵙⵍⴻⵎⴷⴻⵏⵜ ⵡⴰⵀⴰ ⵍⴻⵄⴳⴻⵣ, ⵎⴰⵛⴰ ⵏⵉⵜⴻⵏⵜⵉ ⵜⵜⵄⴰⵡⴰⴷⴻⵏⵜ ⵍⴻⵅⴱⵓⵔⴰⵜ, ⵜⵜⴰⴷⴼⴻⵏⵜ ⴷⵉ ⵛⵖⵓⵍⴰⵜ ⵏ ⵎⵉⴷⴷⴻⵏ, ⵇⵇⴰⵔⴻⵏⵜ ⵎⵉⵏ ⵡⴰⵔ ⵉⵛⵓⵡⵡⴰⵔⴻⵏ.
14 ⵙ ⵓⵢⴻⵏⵏⵉ ⵅⵙⴻⵖ ⴰⴷ ⵎⴻⵍⵛⴻⵏⵜ ⵜⵉⵊⵊⴰⵍ ⵜⵉⵎⴻⵥⵢⴰⵏⵉⵏ, ⴰⴷ ⴷⴷ-ⵊⵊⴻⵏⵜ ⵉⵃⴻⵏⵊⵉⵔⴻⵏ, ⴰⴷ ⵙⵙⵓⵢⵓⵔⴻⵏⵜ ⵜⴰⴷⴷⴰⵔⵜ ⵏⵙⴻⵏ, ⵡⴰⵔ ⵜⵜⴻⵊⵊⵉⵏⵜ ⵛⴰ ⵉ ⵍⴻⵄⴷⵓ ⵙⵙⵉⴱⴱⴻⵜ ⵃⵉⵎⴰ ⴰⴷ ⵉⵛⴻⵇⵇⴻⴼ.
15 ⵎⵉⵏⵣⵉ ⴰⵇⴰ ⵛⴰ ⵣⵣⴰⵢⵙⴻⵏⵜ ⴱⴷⴰⵏⵜ ⴰⴷ ⴼⴼⵖⴻⵏⵜ ⴰⴱⵔⵉⴷ, ⴹⴻⴼⴼⴰⵔⴻⵏⵜ ⵛⵛⵉⵟⴰⵏ.
16 ⵎⴰⵍⴰ ⴷⵉⵏ ⵉⵔⵢⴰⵣⴻⵏ ⵏⵉⵖ ⵜⵉⵎⵖⴰⵔⵉⵏ ⵢⵓⵎⵏⴻⵏ ⵖⴰⵔⵙⴻⵏ ⵜⵉⵊⵊⴰⵍ, ⴻⵊⵊ ⵉ-ⵜⴻⵏ ⴰⴷ ⴷⴰⵢⵙⴻⵏⵜ ⵜⵀⵉⵍⵍⴰⵏ, ⵎⴰⵃⴻⵏⴷ ⵡⴰⵔ ⵉⵜⵜⵉⵍⵉ ⴷⴷⵇⴻⵍ ⵄⴰⴷ ⵅ ⵜⵎⴻⵙⵎⵓⵏⵜ, ⵃⵉⵎⴰ ⵜⴰⵎⴻⵙⵎⵓⵏⵜ ⴰⴷ ⵖⴰⵔⴻⵙ ⵢⵉⵍⵉ ⵎⴰⵃⴻⵏⴷ ⴰⴷ ⵜⵄⴰⵡⴻⵏ ⵜⵉⵏⵏⵉ ⵉⴵⴰⵏ ⴷ ⵜⵉⵊⵊⴰⵍ ⵙ ⵜⵉⴷⴻⵜⵜ.
ⵉⵎⵖⴰⵔⴻⵏ ⵏ ⵜⵎⴻⵙⵎⵓⵏⵜ
17 ⵉⵎⵖⴰⵔⴻⵏ ⵏⵏⵉ ⵉⵜⵜⴹⴻⴱⴱⴰⵔⴰⵏ ⵎⵍⵉⵃ, ⵙⴷⴰⵀⴵⴻⵏ ⴰⵡⴻⵇⵇⴰⵔ ⵜⵏⴰⵢⴻⵏ ⵏ ⵉⵎⵓⵔⴻⵏ, ⴰⴱⴻⵄⴷⴰ ⵉⵏⵏⵉ ⵉⵅⴻⴷⴷⵎⴻⵏ ⴷⴻⴳ ⵡⴰⵡⴰⵍ ⵓ ⴷⴻⴳ ⵓⵙⴻⵍⵎⴻⴷ.
18 ⵎⵉⵏⵣⵉ ⵜⵉⵔⴰ ⵉⵇⴻⴷⴷⵙⴻⵏ ⵇⵇⴰⵔⴻⵏⵜ: “ⵡⴰⵔ ⵜⵜⴻⴳⴳ ⵜⴰⵛⵎⴰⵏⵜ ⵉ ⵓⵢⴻⵏⴷⵓⵣ ⵉⵙⵙⴰⵔⵡⴰⵜⴻⵏ!”, ⵓ: “ⴰⵅⴻⴷⴷⴰⵎ ⵉⵙⴷⴰⵀⴻⴵ ⵍⵎⵓⵏⴻⵜ ⵏⵏⴻⵙ!”
19 ⵡⴰⵔ ⵇⴻⴱⴱⴻⵍ ⵛⴰ ⵜⴰⵏⴼⵓⵍⵜ ⴹⵉⴷⴷ ⵉ ⵓⵎⵖⴰⵔ, ⵎⵖⵉⵔ ⵅ ⵓⵇⴻⵎⵎⵓⵎ ⵏ ⵜⵏⴰⵢⴻⵏ ⵏⵉⵖ ⵏ ⵜⵍⴰⵜⴰ ⵏ ⵍⴻⵛⵀⵓⴷ.
20 ⵉⵏⵏⵉ ⵉⵅⴹⴰⵏ, ⵄⴻⵢⵢⴻⴱ ⵉ-ⵜⴻⵏ ⵣⵣⴰⵜ ⵉ ⵎⴰⵔⵔⴰ, ⵃⵉⵎⴰ ⵉⵏⵏⴻⵖⵏⵉ ⴰⴷ ⴳⴳⵯⴻⴷⴻⵏ ⵄⴰⵡⴻⴷ.
21 ⵣⵉⵢⵢⴰⵔⴻⵖ ⵅⴰⴽ ⵣⵣⴰⵜ ⵉ ⴰⵔⴻⴱⴱⵉ ⴷ ⵙⵉⴷⵉⵜⵏⴻⵖ ⵢⴰⵙⵓⵄ ⵍⵎⴰⵙⵉⵃ ⴷ ⵍⵎⴰⵍⴰⴽⴰⵜ ⵏⵏⴻⵙ ⵉⵜⵜⵡⴰⴼⴰⵔⵣⴻⵏ, ⴰⴷ ⵜⴻⵃⴹⵉⴷ ⵎⴰⵏ ⴰⵢⴰ ⴱⵍⴰ ⵍⴼⴰⵔⵣ, ⵡⴰⵔ ⵜⵜⴻⴳⴳ ⵓⵍⴰ ⴷ ⵉⵛⵜ ⵏ ⵜⵎⴻⵙⵍⴰⵛⵜ ⵄⵍⴰⵃⵙⴰⴱ ⵓⴷⵎⴰⵡⴻⵏ.
22 ⵡⴰⵔ ⵙⵙⵔⵓⵙⴰ ⵉⴼⴰⵙⵙⴻⵏ ⵏⵏⴻⵛ ⵅ ⵃⴻⴷ ⵙ ⵓⵇⴻⴵⴻⵇ, ⵡⴰⵔ ⵛⴰⵔⵔⴻⵛ ⴷⵉ ⴷⴷⵏⵓⴱ ⵏ ⵉⵏⵏⴻⵖⵏⵉ, ⵃⴹⴰ ⵉⵅⴻⴼ ⵏⵏⴻⵛ ⴷⵉ ⵍⴻⵚⴼⴰⵢⴻⵜ.
23 ⵡⴰⵔ ⵙⴻⵙⵙ ⴰⵎⴰⵏ ⵡⴰⵀⴰ, ⵎⴰⵛⴰ ⵙⵓ ⴷⵔⵓⵙ ⵏ ⴱⵉⵏⵓ ⵉ ⵙⵜⵓⵎⴰⵖⵓ ⵏⵏⴻⵛ ⵓ ⵉ ⵍⴻⵃⵍⴰⵛ ⵏⵏⴻⵛ ⴰⵣⵉⵔⴰⵔ.
24 ⴰⵇⴰ ⴷⵉⵏ ⵉⵡⴷⴰⵏ ⵉ ⵖⴰⵔ ⵉⴵⴰ ⴷⴷⵏⵓⴱ ⵏⵙⴻⵏ ⴱⴰⵏⴻⵏ ⵎⵍⵉⵃ ⴷⴻⵖⵢⴰ, ⴰⵇⴰ ⴷⴷⵏⵓⴱ ⵏⵙⴻⵏ ⵜⵜⵉⵣⵣⴰⵔⴻⵏ ⴰⵙⴻⵏ ⵖⴰⵔ ⵛⵛⵔⴻⵄ, ⵓⵛⴰ ⴰⵇⴰ ⴷⵉⵏ ⵛⴰ ⵏⵏⴻⵖⵏⵉ ⴹⴻⴼⴼⴰⵔⴻⵏ ⵜⴻⵏ ⴷⴷⵏⵓⴱ ⵏⵙⴻⵏ.
25 ⴰⵎⵎⵓ ⴷⴷ-ⴱⴰⵏⴻⵏⵜ ⵓⵍⴰ ⴷ ⵍⴻⵅⴷⴰⵢⴻⵎ ⵜⵉⵚⴻⴱⵃⴰⵏⵉⵏ, ⵎⴰⵛⴰ ⵓⵍⴰ ⴷ ⵜⵉⵏⵏⵉ ⵉ ⵡⴰⵔ ⵉⴵⵉⵏ ⴰⵎⵎⵓ, ⵡⴰⵔ ⵣⴻⵎⵎⴰⵔⴻⵏⵜ ⴰⴷ ⵇⵇⵉⵎⴻⵏⵜ ⵏⵏⵓⴼⴼⴰⵔⴻⵏⵜ.