18
ⵜⴰⵎⵎⵓⵔⵜ ⵏ ⴽⵓⵛ ⴰⴷ ⵜⵙⴻⵍⵍⴻⵎ ⵉⵅⴻⴼ ⵏⵏⴻⵙ ⵉ ⵙⵉⴷⵉ ⴰⵔⴻⴱⴱⵉ
1 “ⵓⵛⵜ ⵅ ⵜⴻⵎⵎⵓⵔⵜ ⵏ ⵍⵃⴻⵙⵙ ⵏ ⵡⴰⴼⵔⵉⵡⴻⵏ, ⵜⴻⵏⵏⵉ ⵖⴰⵔ ⵓⵔⴻⵏⴷⴰⴷ ⵉⵖⴻⵣⵔⴰⵏ ⵏ ⵜⴻⵎⵎⵓⵔⵜ ⵏ ⴽⵓⵛ,
2 ⵜⴻⵏⵏⵉ ⵉⵙⵙⴻⴽⴽⴻⵏ ⵉⵎⵙⴻⴽⴽⴰⵏ ⵏⵏⴻⵙ ⵅ ⵍⴻⴱⵃⴰⵔ, ⴷⵉ ⵜⵖⴰⵔⵔⴰⴱⵓⵜⵉⵏ ⵏ ⵓⵖⴰⵏⵉⵎ ⵜⵉⵡⴰ ⵉ ⵡⴰⵎⴰⵏ.
ⵓⵢⵓⵔⴻⵎ, ⴰ ⴽⴻⵏⵏⵉⵡ ⵉⵔⴻⵇⵇⴰⵙⴻⵏ ⵉⴼⵙⵓⵙⴻⵏ, ⵖⴰⵔ ⵉⵊⵊ ⵏ ⵍⴳⴻⵏⵙ ⵉⵣⵣⵓⴳⴳⴰⵔⵜⴻⵏ ⵓ ⵉⵜⵜⵡⴻⵙⵙⴳⴻⵏ ⵏ ⵜⴻⵍⵎⴻⵛⵜ, ⵖⴰⵔ ⵉⵊⵊ ⵏ ⵍⴳⴻⵏⵙ ⵏⵏⵉ ⵣⵉ ⴳⴳⵯⴻⴷⴻⵏ ⵣⴻⴳ ⵡⴰⵎⵉ ⵉⴵⴰ ⵓ ⵣⵉ ⵙⵙⴰ ⵜⵙⴰⵡⴻⵏⵜ, ⵖⴰⵔ ⵍⴳⴻⵏⵙ ⵏⵏⵉ ⵉⵜⵜⴰⵎⴰⵔⴰⵏ ⵍⴻⴱⴷⴰ ⵓ ⵉⵄⴻⴼⴼⴻⵙ, ⵡⴻⵏⵏⵉ ⵣⵉ ⵇⴻⴹⵄⴻⵏ ⵉⵖⴻⵣⵔⴰⵏ ⵜⴰⵎⵎⵓⵔⵜ ⵏⵏⴻⵙ.
3 ⴰ ⴽⴻⵏⵏⵉⵡ ⵎⴰⵔⵔⴰ ⵉⵎⴻⵣⴷⴰⵖ ⵏ ⴷⴷⵓⵏⴻⵛⵜ ⴷ ⵢⵉⵏⵏⵉ ⵉⵣⴻⴷⴷⵖⴻⵏ ⴷⵉ ⵜⴻⵎⵎⵓⵔⵜ, ⵅⵎⵉ ⵖⴰ ⵙⵙⴳⴻⵄⵄⴷⴻⵏ ⵜⴰⵄⴻⴵⴰⵏⵜ ⵅ ⵉⴷⵓⵔⴰⵔ, ⵅⴻⵏⵏⵉ ⴰⴷ ⵜ ⵜⵥⴰⵔⴻⵎ, ⵓ ⵅⵎⵉ ⵖⴰ ⵙⵓⴹⴻⵏ ⴷⴻⴳ ⵓⵢⵉⵛⵛ ⵏ ⵉⵛⴰⵔⵔⵉ, ⴰⴷ ⵜ ⵜⴻⵙⵍⴻⵎ!”
4 “ⵎⴰⵖⴰⵔ ⴰⵎⵎⵓ ⵉ ⴷ ⵖⴰⵔⵉ ⵉⵏⵏⴰ ⵙⵉⴷⵉ: ‘ⵏⴻⵛⵛ ⴰⴷ ⵃⴹⵉⵖ ⴷⵉ ⵍⵀⵓⴷⵏⴻⵜ ⵅ ⵍⵄⴰⵔⵛ ⵉⵏⵓ, ⴰⵎ ⵍⴻⵀⵎⵓ ⵢⴰⵔⴻⵇⵇⴻⵏ ⵖⴰⵔ ⵟⵟⵃⴰ ⵏ ⵓⵣⵉⵍ, ⴰⵎ ⵓⵙⴻⵢⵏⵓ ⵉⵛⵛⵓⵔⴻⵏ ⵙ ⵏⵏⴹⴰ ⵖⴰⵔ ⵍⴻⵀⵎⵓ ⵏ ⵚⵚⴰⴱⴻⵜ.’
5 ⵎⴰⵖⴰⵔ ⵇⴱⴻⵍ ⵚⵚⴰⴱⴻⵜ, ⵅⵎⵉ ⵖⴰ ⵉⴽⴻⵎⵎⴻⵍ ⵏⵏⵓⵡⵡⴰⵔ, ⵜⴻⴷⵡⴻⵍ ⵜⵏⴻⵡⵡⴰⵔⵜ ⴷ ⴰⴹⵉⵍ ⵉⵏⴻⵏⵏⴰ, ⴰⴷ ⵉⵣⴱⴰⵔ ⵏⴻⵜⵜⴰ ⵉⵣⴱⵉⵔⴻⵏ ⵙ ⵉⵊⴻⵇⵇⴰⴹⴻⵏ ⵏ ⵡⴻⵣⴱⴰⵔ, ⴰⴷ ⵉⴽⴽⴻⵙ ⴰⵔⴱⵉⴱⴻⵏ, ⴰⴷ ⵜⴻⵏ ⵉⵇⴹⵓ.
6 ⵏⵉⵜⵏⵉ ⵎⴰⵔⵔⴰ ⴰⴷ ⵜⵜⵡⴰⵊⵊⴻⵏ ⵉ ⵉⵊⴹⴰⴹ ⵉⵜⵜⴽⴻⵛⵛⴰⴹⴻⵏ ⵅ ⵉⴷⵓⵔⴰⵔ ⵓ ⵉ ⵍⴻⵡⵃⵓⵛ ⵏ ⵜⴻⵎⵎⵓⵔⵜ. ⴷⴻⴳ ⵓⵏⴻⴱⴷⵓ ⴰⴷ ⵅⴰⵙⴻⵏ ⴰⵔⵙⴻⵏ ⵉⵊⴹⴰⴹ ⵉⵜⵜⴽⴻⵛⵛⴰⴹⴻⵏ ⵓ ⴷⵉ ⵍⵎⴻⵛⵜⴰ ⴰⴷ ⵅⴰⵙⴻⵏ ⴰⵔⵙⴻⵏ ⵍⴻⵡⵃⵓⵛ ⵏ ⵍⴻⵅⵔⴰ.
7 ⴷⵉ ⵍⵡⴻⵇⵜ ⵏⵏⵉ ⴰⴷ ⴰⵡⵢⴻⵏ ⵉⵛⵜ ⵏ ⵜⴰⵔⵣⴻⴼⵜ ⵉ ⵙⵉⴷⵉ ⵏ ⵍⵄⴻⵙⴽⴰⵔⴰⵜ: ⵉⵊⵊ ⵏ ⵍⴳⴻⵏⵙ ⵉⵣⵣⵓⴳⴳⴰⵔⵜⴻⵏ ⴷ ⵉⵜⵜⵡⴻⵙⵙⴳⴻⵏ ⵏ ⵜⴻⵍⵎⴻⵛⵜ - ⵓ ⵎⴰⵏ ⴰⵢⴰ ⵣⴻⴳ ⵉⵊⵊ ⵏ ⵍⴳⴻⵏⵙ ⵉⵎⴻⴳⴳⵯⴻⴷ ⵣⵣⴰⵢⴻⵙ ⵣⴻⴳ ⵡⴰⵎⵉ ⵉⴵⴰ ⴷ ⵜⵙⴰⵡⴻⵏⵜ, ⵣⴻⴳ ⵉⵊⵊ ⵏ ⵍⴳⴻⵏⵙ ⵏⵏⵉ ⵉⵜⵜⴰⵎⴰⵔⴻⵏ ⵍⴻⴱⴷⴰ ⵓ ⵉⵄⴻⴼⴼⴻⵙ, ⵏⵏⵉ ⵣⵉ ⵇⴻⴹⵄⴻⵏ ⵉⵖⴻⵣⵔⴰⵏ ⵜⴰⵎⵎⵓⵔⵜ ⵏⵏⴻⵙ - ⵖⴰⵔ ⵡⴻⵎⵛⴰⵏ ⵏ ⵢⵉⵙⴻⵎ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ: ⵖⴰⵔ ⵡⴻⴷⵔⴰⵔ ⵏ ⵚⵉⵀⵢⵓⵏ.”