17
1 ⵍⵃⵓⴽⵎ ⵉⵙⵙⴰⴳⴳⵯⴰⴷⴻⵏ ⵅ ⴷⵉⵎⴰⵛⵇ.
“ⴰⵇⴰ ⴷⴰ, ⴷⵉⵎⴰⵛⵇ ⵡⴰⵔ ⵜᵉⵜⵜⵉⵍⵉ ⵄⴰⴷ ⴷ ⵜⴰⵏⴷⵉⵏⵜ, ⴰⴷ ⵜⴻⴷⵡⴻⵍ ⴷ ⵍⵅⴰⵔⴱⴻⵜ ⵉⵜⵜⵡⴰⵀⴻⴷⵎⴻⵏ.
2 ⵜⵉⵏⴻⴷⴷⴰⵎ ⵏ ⵄⴰⵔⵓⵄⵉⵔ ⴰⴷ ⴷⴻⵡⵍⴻⵏⵜ ⵅⵍⴰⵏⵜ, ⴰⴷ ⵉⵍⵉⵏⵜ ⵉ ⵜⵃⵉⵎⵔⵉⵡⵉⵏ. ⵜⵉⵏⴰ ⴰⴷ ⴷⵉⵏⵏⵉ ⵣⵣⵍⴻⵏⵜ ⵓⵛⴰ ⵓⵍⴰ ⴷ ⵉⵊⵊⴻⵏ ⵡⴰⵔ ⵜⴻⵏⵜ ⵉⵙⵙⴼⴻⵄⴼⵉⵄ.
3 ⴰⴷ ⵜᵉⵜⵜⵡⴰⵇⴹⴰ ⵅ ⵍⵇⴻⵍⵄⴰ ⵣⵉ ⵉⴼⵔⴰⵢⵉⵎ ⵓⵍⴰ ⵅ ⵜⴰⴳⴻⵍⴷⵉⵜ ⵣⵉ ⴷⵉⵎⴰⵛⵇ ⵓ ⵅ ⵎⵉⵏ ⵉⵇⵇⵉⵎⴻⵏ ⵏ ⴰⵔⴰⵎ. ⵏⵉⵜⵏⵉ ⴰⴷ ⴰⵙⴻⵏ ⵉⵎⵙⴰⵔ ⴰⵎ ⵎⴰⵎⵎⴻⵛ ⵉⵎⵙⴰⵔ ⵉ ⵓⵄⵓⴵⵉ ⵏ ⴰⵢⵜ ⵏ ⵉⵙⵔⴰⵉⵍ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ.”
4 “ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵙⵍⴰⵡ ⵓⵄⵓⴵⵉ ⵏ ⵢⴰⵄⵇⵓⴱ ⵓⵛⴰ ⴰⴷ ⵜⴻⴷⵡⴻⵍ ⵜⴰⴷⵓⵏⵜ ⵏ ⴰⵔⵔⵉⵎⴻⵜ ⵏⵏⴻⵙ ⵜⴻⵇⵇⵉⴵⴻⵜ.
5 ⴰⴷ ⵢⵉⵍⵉ ⴰⵅⵎⵉ ⵉⵜⵜⵇⴻⴱⴱⴻⴹ ⵡⴻⵏⵏⵉ ⵉⵎⴻⵊⵊⴰⵔⴻⵏ ⵉⵎⴻⵏⴷⵉ ⵉⴱⴻⴷⴷⴻⵏ ⵓⵛⴰ ⵉⵎⴻⵊⵊⴰⵔ ⵓⵖⵉⵍ ⵏⵏⴻⵙ ⵜⵉⴷⵔⵉⵏ, ⴰⴷ ⵢⵉⵍⵉ ⴰⵅⵎⵉ ⵉⵊⵊ ⵉⵍⴻⵇⵇⴻⴹ ⵜⵉⴷⵔⵉⵏ ⴷⵉ ⵜⴻⵖⵣⵓⵔⵜ ⵏ ⵉⵔⴰⴼⴰⵡⵉⵢⵢⴻⵏ.
6 ⴰⴷ ⵉⵇⵇⵉⵎ ⵎⵖⵉⵔ ⵉⵊⵊ ⵏ ⵓⵛⴻⵟⵟⵉ ⵉ ⵡⴻⵍⵇⴰⴹ, ⴰⵎ ⵖⴰⵔ ⵡⴻⵣⵡⴰⴹ ⵏ ⵉⵣⴻⵎⵎⵓⵔⴻⵏ, ⵜⵏⴰⵢⴻⵏ ⵏⵉⵖ ⵜⵍⴰⵜⴰ ⵏ ⵜⵣⵉⵜⵓⵏⵉⵏ ⵖⴰⵔ ⵜⵇⵉⵛⵛⴻⵜ ⵏ ⵜⴰⵙⴻⵟⵟⴰ ⵙⴻⵏⵏⴻⵊ, ⵓⵛⴰ ⴰⵔⴻⴱⵄⴰ ⵏⵉⵖ ⵅⴻⵎⵙⴰ ⵖⴰⵔ ⵜⵉⵙⴻⴹⵡⵉⵏ ⵉⵖⴻⵎⵎⴰⵢⴻⵏ ⴰⵟⵟⴰⵙ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ.”
7 “ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵅⵣⴰⵔ ⴱⵏⴰⴷⴻⵎ ⵅ ⵡⴻⵏⵏⵉ ⵜ ⵉⴳⴳⵉⵏ ⵓ ⵜⵉⵟⵟⴰⵡⵉⵏ ⵏⵏⴻⵙ ⴰⴷ ⵥⴰⵔⴻⵏ ⴰⵎⵇⴻⴷⴷⴰⵙ ⵏ ⵉⵙⵔⴰⵉⵍ.
8 ⵡⴰⵔ ⵉⵜⵜⵡⴰⵍⵉ ⵉⵄⴰⵍⵟⴰⵔⴻⵏ, ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵙ, ⵓⵍⴰ ⴷ ⵎⵉⵏ ⵉⴳⴳⵉⵏ ⵉⴹⴻⵡⴹⴰⵏ ⵏⵏⴻⵙ ⵡⴰⵔ ⵜ ⵉⵥⵥⴰⵔ, ⵜⵉⵔⴻⴱⴱⵉⵏ ⵏ ⵛⵡⴰⵔⵜⵉ ⵍⵍⴰ ⵓⵍⴰ ⴷ ⵉⴱⵉⵍⴰⵔⴻⵏ ⵏ ⴰⵔⴻⴱⴱⵉ ⵏ ⵜⴼⵓⵛⵜ ⵍⵍⴰ.”
9 “ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵍⵉⵏⵜ ⵜⵏⴻⴷⴷⴰⵎ ⵏⵏⴻⵙ ⵉⴼⴰⵔⵢⴻⵏ ⴰⵎ ⵡⴻⵎⵛⴰⵏ ⵉⵅⵍⴰ ⴷⴻⴳ ⵡⴻⵣⵖⴰⵔ ⵓ ⵜⴰⵇⵉⵛⵛⴻⵜ ⵏ ⵡⴻⴷⵔⴰⵔ ⵏⵏⵉ ⵊⵊⵉⵏ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⴰⵢⵜ ⵏ ⵉⵙⵔⴰⵉⵍ, ⴰⴷ ⵢⵉⵍⵉ ⴷ ⴰⵎⵛⴰⵏ ⵉⵜⵜⵡⴰⵔⴻⴷⴷⴵⴻⵏ.
10 ⵎⴰⵖⴰⵔ ⵛⴻⴽ ⵜᵉⵜⵜⵓⴷ ⴰⵔⴻⴱⴱⵉ ⵏ ⵓⵙⴻⵏⵊⴻⵎ ⵏⵏⴻⵛ, ⵡⴰⵔ ⵜⴻⵄⵇⵉⵍⴻⴷ ⵅ ⵜⴻⵚⴹⴰⵔⵜ ⵏⵏⴻⵛ ⵉⵊⴻⵀⴷⴻⵏ. ⵅ ⵓⵢⴰ ⵜᵉⵜⵜⴻⵥⵥⵓⴷ ⴰⵖⴻⵎⵎⵓⵢ ⵉⴹⴰⵔⴼⴻⵏ ⵓⵛⴰ ⵜⵣⴰⵔⵔⵄⴻⴷ ⵜⵉⵖⴻⴷⴷⵓⵜⵉⵏ ⵜⵉⴱⴰⵔⵔⴰⵏⵉⵢⵢⵉⵏ.
11 ⴷⴻⴳ ⵡⴰⵙⵙ ⵏⵏⵉ ⴷⵉ ⵜⴻⵏⵜ ⵜⴻⵥⵥⵓⴹ, ⴰⴷ ⵜⴻⵏⵜ ⵜⴼⴰⵔⵢⴻⴷ, ⵓ ⵖⴰⵔ ⵓⵜⴻⴼⴼⵓ ⵜⴻⵊⵊⵉⴷ ⵣⵣⴰⵔⵉⵄⴻⵜ ⵏⵏⴻⵎ ⴰⴷ ⵜⴻⵙⵙⴼⵓⴼⴼⵉ: ⴷ ⵎⴰⵏ ⴰⵢⴰ ⴷ ⵜⴰⵎⴻⵊⵔⴰ ⵉⵄⵓⵔⵔⵛⴻⵏ ⴷⴻⴳ ⵡⴰⵙⵙ ⵏ ⵍⴻⵃⵍⴰⵛ ⵏⵏⴻⵛ ⴷ ⵍⴻⵃⵔⵉⵇ ⵡⴰⵔ ⵉⵜⵜⴳⴻⵏⴼⵉⵏ.”
12 “ⵓⵛⵜ ⵅ ⵓⴱⴰⵔⵔⵓ ⵏ ⵍⴻⴳⵏⵓⵙ ⵏⵏⵉ ⵉⵣⴻⵀⵀⴰⵔⴻⵏ ⴰⵎ ⵣⴻⵀⵀⴰⵔⴻⵏ ⵍⴻⴱⵃⵓⵔ, ⵓⵍⴰ ⵓⵛⵜ ⵅ ⴷⴷⵔⵉⵣ ⵏ ⵛⵛⵓⵄⵓⴱ ⵏⵏⵉ ⵉⴳⴳⵉⵏ ⴰⵎ ⵍⴻⵃⵡⴻⵍ ⵏ ⵡⴰⵎⴰⵏ ⵉⵎⴻⵇⵇⵔⴰⵏⴻⵏ ⵉⵏⵀⴻⵡⵍⴻⵏ!
13 ⴰⴷ ⵀⴻⵡⵍⴻⵏ ⵛⵛⵓⵄⵓⴱ ⴰⵎ ⵍⴻⵃⵡⴻⵍ ⵏ ⵡⴰⵎⴰⵏ ⵉⵎⴻⵇⵇⵔⴰⵏⴻⵏ, ⵎⴰⵛⴰ ⵏⴻⵜⵜⴰ ⴰⴷ ⵜⴻⵏ ⵢⴰⵔⴻⴱⴱⴰ ⵓ ⵏⵉⵜⵏⵉ ⴰⴷ ⴰⵔⴻⵡⵍⴻⵏ ⵖⴰⵔ ⵍⴰⴳⴳⵯⴰⵊ. ⴰⴷ ⵉⵜⵜⵡⴰⵄⴰⵔⵏ ⵓⴱⴰⵔⵔⵓ ⵏ ⵍⴻⴳⵏⵓⵙ ⴰⵎ ⵓⵍⵓⵎ ⵅ ⵉⴷⵓⵔⴰⵔ ⵉⵜⵜⵡⴰⵄⴰⵔⵏⴻⵏ ⵣⴻⴳ ⵓⵙⴻⵎⵎⵉⴹ, ⴰⵎ ⵓⵙⴻⵢⵏⵓ ⵏ ⵜⵄⴻⵊⵊⴰⵊⵜ ⵜⴻⵏⵏⴻⴹ ⴰⵙ-ⴷⴷ ⵜⵃⴰⵔⵢⴰⴹⵜ.
14 ⵖⴰⵔ ⵍⵡⴻⵇⵜ ⵏ ⵜⵎⴻⴷⴷⵉⵜ, ⵅⵣⴰⵔ, ⴰⵏⴻⵅⵍⵉⵄ! ⵇⴱⴻⵍ ⵎⴰ ⴰⴷ ⵉⵚⴱⴻⵃ ⵍⵃⴰⵍ, ⵡⴰⵔ ⵉⴵⵉ ⵏⴻⵜⵜⴰ ⵄⴰⴷ. ⵜⴰ ⴷ ⵜⴰⵙⵖⴰⵔⵜ ⵏ ⵢⵉⵏⵏⵉ ⴷ ⴰⵏⴻⵖ ⵉⴽⴻⵛⵛⴹⴻⵏ, ⵣⵣⵀⴰⵔ ⵏ ⵢⵉⵏⵏⵉ ⴷ ⴰⵏⴻⵖ ⵢⵓⵛⴰⵔⴻⵏ.”