3
ⵜⴰⵥⴰⴵⵉⵜ ⵏ ⵃⴰⴱⴰⵇⵇⵓⵇ
1 ⵜⴰⵥⴰⴵⵉⵜ ⵏ ⵃⴰⴱⴰⵇⵇⵓⵇ, ⴰⵏⴰⴱⵉ, ⴷⴻⴳ ⵡⴰⵟⵟⴰⵙ ⵏ ⵜⵎⵉⵊⵊⵉⵡⵉⵏ.
2 ⴰ ⵙⵉⴷⵉ, ⵓⵎⵉ ⵙⵍⵉⵖ ⵍⴻⵅⴱⴰⵔ ⵏⵏⴻⵛ,
ⵜⵓⵖⴰ ⵜⵜⴻⴳⴳⵯⴻⴷⴻⵖ.
ⴰ ⵙⵉⴷⵉ, ⵙⵏⴻⴷⴷⴰⵔ ⵍⵅⴻⴷⵎⴻⵜ ⵏⵏⴻⵛ ⵄⴰⵡⴻⴷ
ⴷⵉ ⵍⵡⴻⵙⵟ ⵏ ⵉⵙⴻⴳⴳⵯⵓⵙⴰ,
ⵙⴻⵛⵛⴻⵏ ⵉ-ⵜⵜ ⴷⵉ ⵍⵡⴻⵙⵟ ⵏ ⵉⵙⴻⴳⴳⵯⵓⵙⴰ,
ⴷⴻⴳ ⵡⴻⵖⴹⴰⴱ ⵄⵇⴻⵍ ⵅ ⵍⴻⵃⵏⵓⵏⴻⵛⵜ ⵏⵏⴻⵛ.
3 ⴰⵔⴻⴱⴱⵉ ⵢⵓⵙⴰ-ⴷⴷ ⵣⵉ ⵜⴰⵢⵎⴰⵏ ⵓ ⴰⵎⵇⴻⴷⴷⴰⵙ
ⵣⴻⴳ ⵡⴻⴷⵔⴰⵔ ⵏ ⴼⴰⵔⴰⵏ. ⵙⵉⵍⴰⵀ.
ⵍⵄⴰⴹⴰⵎⴰ ⵏⵏⴻⵙ ⵜⴻⴷⵍⴰ ⵉⵊⴻⵏⵡⴰⵏ
ⵓ ⴰⵚⴻⴱⴱⴻⵃ ⵏⵏⴻⵙ ⵉⵛⵛⵓⵔ ⵜⴰⵎⵎⵓⵔⵜ.
4 ⵜⵓⵖⴰ ⴷⵉⵏ ⵉⵛⵜ ⵏ ⵜⴻⵙⵙⵉⵇⵜ ⴰⵎ ⵜⴼⴰⵡⵜ,
ⴼⴼⵖⴻⵏⵜ-ⵉ-ⴷⴷ ⴼⵍⵉⵜⵛⴰⵜ ⵏ ⵡⴰⵙⵙⴰⵎ
ⵣⴻⴳ ⵓⴼⵓⵙ ⵏⵏⴻⵙ,
ⴰⵇⴰ-ⵜⴻⵏⵜ ⵖⴰⵔⴻⵙ,
ⵓ ⴷⴰⵢⵙⴻⵏⵜ ⵜⵏⵓⴼⴼⴰⵔ ⵜⵣⴻⵎⵎⴰⵔ ⵏⵏⴻⵙ.
5 ⵟⵟⴰⵄⵓⵏ ⵉⵜⵜⵉⵣⵡⴰⵔ ⵉ ⵡⵓⴷⴻⵎ ⵏⵏⴻⵙ,
ⵍⵃⴰⴷⵓⵇ ⵏ ⵜⵎⴻⵙⵙⵉ ⵉⴼⴼⴻⵖ-ⴷⴷ
ⵣⴻⴳ ⵉⴹⴰⵔⴻⵏ ⵏⵏⴻⵙ.
6 ⵏⴻⵜⵜⴰ ⵉⴽⴽⴰⵔ ⵓⵛⴰ ⵢⴰⵔⵔⴰ ⵜⴰⵎⵎⵓⵔⵜ ⵜᵉⵜⵜⴻⵏⵀⴻⵣⵣⴰ,
ⵏⴻⵜⵜⴰ ⵉⵥⵔⴰ ⵓ ⵉⴳⴳⴰ ⴰⴷ ⴰⵔⵊⵉⵊⴻⵏ ⵍⴻⴳⵏⵓⵙ!
ⵉⴷⵓⵔⴰⵔ ⵏ ⵣⵉⵛ ⵜⵜⵡⴰⵍⴻⴱⵣⴻⵏ
ⴰⵍⴰⵎⵉ ⴷⴻⵡⵍⴻⵏ ⴷ ⵜⴰⵄⴻⵊⵊⴰⵊⵜ,
ⵜⵉⵡⵔⵉⵔⵉⵏ ⵣⵉ ⵎⴻⵛⵃⴰⵍ ⵓⵢⴰ ⵖⴻⵏⵙⴻⵏⵜ!
ⵉⴱⵔⵉⴷⴻⵏ ⵉⵜⵜⴷⵓⵎⴰⵏ ⵉ ⵍⴻⴱⴷⴰ ⴰⵇⴰ ⴰⵜⴻⵏ ⵏⵏⴻⵙ.
7 ⵏⴻⵛⵛ ⵥⵔⵉⵖ ⵉⵇⵉⴹⴰⵏ ⵏ ⴽⵓⵛⴰⵏ ⵜⵜⵡⴰⵃⵚⴰⵔⴻⵏ,
ⵜⵉⵊⴰⵔⵜⵉⵍⵉⵏ ⵏ ⵉⵇⵉⴹⴰⵏ ⵏ ⵜⴻⵎⵎⵓⵔⵜ ⵏ ⵎⵉⴷⵢⴰⵏ
ⵉⵜⵜⴰⵡⵉ ⵜⴻⵏⵜ ⵓⵙⴻⵎⵎⵉⴹ ⵙ ⵊⵊⴻⵀⴷ.
8 ⵎⴰ ⵢⴰⵔⵖⴰ ⵡⴻⵖⴹⴰⴱ ⵏ ⵙⵉⴷⵉ ⵅ ⵉⵖⴻⵣⵔⴰⵏ?
ⵎⴰ ⵜⵓⵖⴰ ⴰⵖⴹⴰⴱ ⵏⵏⴻⵛ ⴹⵉⴷⴷ ⵉ ⵉⵖⴻⵣⵔⴰⵏ?
ⵎⴰ ⵜⵓⵖⴰ ⴰⴷⵓⵇⵇⴻⵣ ⵏⵏⴻⵛ ⵏ ⵓⴼⵓⴳⴻⵎ
ⴹⵉⴷⴷ ⵉ ⵍⴻⴱⵃⴰⵔ,
ⵍⴰⵎⵉ ⵜⵏⴻⴷⵀⴻⴷ ⵅ ⵢⴻⵢⵙⴰⵏ ⵏⵏⴻⵛ,
ⵅ ⵉⴽⴰⵔⵔⵓⵜⴻⵏ ⵏⵏⴻⵛ ⵏ ⵓⵙⴻⵏⵊⴻⵎ?
9 ⵍⵇⴻⵡⵙ ⵏⵏⴻⵛ ⵉⵜⵜⵡⴰⵄⴰⵔⵔⴰ ⵎⴰⵔⵔⴰ,
ⵜⵉⵊⴰⴵⵉⵜⵉⵏ ⵉ ⵜⴻⵙⵙⵉⵡⵍⴻⴷ ⵜⵓⵖⴰ ⴰⵜⴻⵏⵜ
ⴷ ⵉⵄⵓⵎⴰⴷ ⵏⴻⵛⵛ ⵉ ⵓⵙⴻⵇⵙⴰⵃ. ⵙⵉⵍⴰⵀ.
ⵜⴼⴻⴵⵇⴻⴷ ⵜⴰⵎⵎⵓⵔⵜ ⵙ ⵉⵖⴻⵣⵔⴰⵏ.
10 ⵍⴰⵎⵉ ⵛⴻⴽ ⵥⵔⵉⵏ ⵉⴷⵓⵔⴰⵔ, ⵉⵍⵇⴻⴼ ⵉ-ⵜⴻⵏ ⵍⴻⵡⵊⴻⵄ,
ⵍⵃⴻⵎⵍⴻⵜ ⵏ ⵡⴰⵎⴰⵏ ⵜⵓⵖⴰ ⵜⵄⴻⴷⴷⵓ,
ⴰⵎⴰⵏ ⵉⵀⴻⵡⵍⴻⵏ ⴰⵔⵔⵉⵏ
ⵜⵎⵉⵊⵊⴰ ⵏⵙⴻⵏ ⵜᵉⵜⵜⵡⴰⵙⴻⵍ,
ⴳⴻⵄⵄⴷⴻⵏ ⵉⴼⴰⵙⵙⴻⵏ ⵏⵙⴻⵏ ⵖⴰⵔ ⵓⵊⴻⵏⵏⴰ.
11 ⵜⴰⴼⵓⵛⵜ, ⵓⵍⴰ ⴷ ⵓⵢⵓⵔ,
ⵇⵇⵉⵎⴻⵏ ⴱⴻⴷⴷⴻⵏ ⴷⵉ ⵜⵣⴻⴷⴷⵉⵖⵜ ⵏⵙⴻⵏ.
ⴰⵇⴰ ⵔⵓⵃⴻⵏ ⵣⵉ ⵙⵙⵉⴱⴱⴻⵜ ⵏ ⵜⴼⴰⵡⵜ
ⵏ ⴼⵍⵉⵜⵛⴰⵜ ⵏ ⵍⵇⴻⵡⵙ ⵏⵏⴻⵛ,
ⵣⵉ ⵙⵙⵉⴱⴱⴻⵜ ⵏ ⵜⵉⵙⵙⵉⵇⵜ
ⵏ ⵍⴰⵏⵙⴰ ⵏⵏⴻⵛ ⵉⵜⵜⴻⵃⴷⵓⴷⵓⵇⴻⵏ.
12 ⵙ ⵡⴻⵙⵅⴻⴹ ⵜⴻⵚⵚⵓⵔⵓⴼⴻⴷ ⵜⵉⵡⴰ ⵉ ⵜⴻⵎⵎⵓⵔⵜ,
ⵙ ⵡⴻⵖⴹⴰⴱ ⵏⵏⴻⵛ ⵜⵄⴻⴼⵙⴻⴷ ⵅ ⵍⴻⴳⵏⵓⵙ.
13 ⵛⴻⴽ ⵜⴻⴼⴼⵖⴻⴷ ⵉ ⵓⵙⴻⵏⵊⴻⵎ ⵏ ⵍⴳⴻⵏⵙ ⵏⵏⴻⵛ,
ⵉ ⵓⵙⴻⵏⵊⴻⵎ ⵏ ⵓⵎⴻⴷⵀⵓⵏ ⵏⵏⴻⵛ.
ⴰⵇⴰ ⵛⴻⴽ ⵜⵇⴻⴵⵄⴻⴷ
ⵜⴰⵣⴻⵇⵇⴰ ⵏ ⵜⴰⴷⴷⴰⵔⵜ ⵏ ⵓⵄⴻⴼⴼⴰⵏ,
ⵜⵄⴰⵔⵔⵉⴷ ⴷⵙⴰⵙ ⴰⵍ ⵉⵔⵉ. ⵙⵉⵍⴰⵀ.
14 ⴰⵣⴻⴵⵉⴼ ⵏ ⵉⵄⴻⵙⴽⴰⵔⵉⵢⵢⴻⵏ ⵏⵏⴻⵙ ⵉⵎⴻⵣⵡⵓⵔⴰ,
ⴰⵇⴰ ⵜⴻⵙⵙⵏⵓⵇⵇⴱⴻⴷ ⵉ-ⵜ ⵙ ⵍⴰⵏⵙⴰⵜ ⵏⵙⴻⵏ.
ⵏⵉⵜⵏⵉ ⵓⵙⵉⵏ-ⴷⴷ ⵄⴻⵍⴼⴻⵏ-ⴷⴷ
ⵎⴰⵃⴻⵏⴷ ⴰⴷ ⴰⵢⵉ ⵣⴻⴵⵄⴻⵏ.
ⴰⵇⴰ ⴷ ⵎⴻⵥⵔⵉ ⵏⵙⴻⵏ
ⵎⴰⵍⴰ ⵣⴻⵎⵎⴰⵔⴻⵏ
ⴰⴷ ⵛⵛⴻⵏ ⵍⵎⴻⵙⴽⵉⵏ ⵙ ⵜⵏⵓⴼⴼⵔⴰ.
15 ⴰⴽ-ⴷ ⵉⵢⵙⴰⵏ ⵏⵏⴻⵛ ⵜᵉⵟⵟⴼⴻⴷ ⴰⴱⵔⵉⴷ ⴷⵉ ⵍⴻⴱⵃⴰⵔ,
ⴰⴽⵓⴼⴼⵓ ⵏ ⵡⴰⵎⴰⵏ ⵉⵎⴻⵇⵇⵔⴰⵏⴻⵏ.
16 ⵍⴰⵎⵉ ⵙⵍⵉⵖ, ⵢⴰⵔⵊⵉⵊ ⵓⵄⴻⴷⴷⵉⵙ ⵉⵏⵓ.
ⵓⵎⵉ ⵙⵍⵉⵖ ⵍⵃⴻⵙⵙ ⵏⵏⵉ, ⴰⵔⵊⵉⵊⴻⵏ ⵉⵢⴻⵏⵛⵉⵛⴻⵏ ⵉⵏⵓ,
ⴰⵅⴻⵙⵙⴰⵔ ⵢⵓⴷⴻⴼ ⵖⴰⵔ ⵉⵖⵙⴰⵏ ⵉⵏⵓ,
ⵓ ⵏⴻⵛⵛ ⴰⵔⵊⵉⵊⴻⵖ ⴷⴻⴳ ⵡⴻⵎⵛⴰⵏ ⵉⵏⵓ.
ⵡⴰⵅⵅⴰ ⴰⵎⴻⵏⵏⵉ ⴰⴷ ⵔⴰⵊⵉⵖ ⴷⵉ ⵍⵅⴰⴹⴰⵔ
ⵅ ⵡⴰⵙⵙ ⵏ ⵍⴻⵃⵚⴰⵔⴻⵜ,
ⵅⵎⵉ ⵖⴰ ⵉⵙⵙⴳⴻⵄⵄⴻⴷ ⵅ ⵍⴳⴻⵏⵙ,
ⵓ ⴰⴷ ⴰⵏⴻⵖ ⵉⵃⵚⴰⵔ ⴰⴽ-ⴷ ⴱⴰⵏⴷⵉⵢⵢⴰⵜ ⵏⵏⴻⵙ.
ⵍⴻⴼⵔⴰⵃⴻⵜ ⵏ ⵃⴰⴱⴰⵇⵇⵓⵇ
17 ⵡⴰⵅⵅⴰ ⵡⴰⵔ ⵉⵜⵜⵏⵓⵡⵡⴰⵔ ⵡⴰⵔⵜⵓ,
ⵓ ⵡⴰⵔ ⴷⵉⵏ ⵜᵉⵜⵜⵉⵍⵉ ⵄⴰⴷ ⵍⵖⵉⴵⴻⵜ ⵖⴰⵔ ⵜⵣⴰⵢⴰⵔⵜ,
ⵡⴰⵅⵅⴰ ⵍⵖⵉⴵⴻⵜ ⵏ ⵣⵣⵉⵜⵓⵏ ⴰⴷ ⵜⴻⴼⵛⴻⵍ
ⵓⵍⴰ ⴷ ⵉⵢⵢⴰⵔⴻⵏ ⵡⴰⵔ ⵜⵜⵖⵉⵎⵉⵏ ⵜⵜⵉⵛⴻⵏ ⵍⵎⴰⵛⵓⵍ,
ⵓ ⴰⴷ ⵜⵜⵡⴰⵇⴻⴹⵄⴻⵏ ⵡⵓⴵⵉ ⵣⵉ ⵍⴽⵓⵍⵉ
ⵓ ⵡⴰⵔ ⵜⵜⵉⵍⵉⵏ ⵄⴰⴷ ⵉⴼⵓⵏⴰⵙⴻⵏ
ⴷ ⵜⴼⵓⵏⴰⵙⵉⵏ ⴷⵉ ⵍⴽⵓⵔⵉⵜ,
18 ⵄⴰⴷ ⴰⵎⴻⵏⵏⵉ ⵏⴻⵛⵛ ⴰⴷ ⵙⵍⵉⵡⴻⵍⵡⴻⵖ ⵉ ⵙⵉⴷⵉ,
ⴰⴷ ⴼⴰⵔⵃⴻⵖ ⵣⵉ ⴰⵔⴻⴱⴱⵉ ⵏ ⵓⵙⴻⵏⵊⴻⵎ ⵉⵏⵓ.
19 ⵙⵉⴷⵉ, ⵙⵉⴷⵉ ⵉⵏⵓ, ⵏⴻⵜⵜⴰ ⴷ ⵊⵊⵀⴻⴷ ⵉⵏⵓ.
ⵏⴻⵜⵜⴰ ⵉⵜⵜⴻⴳⴳ ⵉⴹⴰⵔⴻⵏ ⵉⵏⵓ ⴼⵙⵓⵙⴻⵏ
ⴰⵎ ⵢⵉⴹⴰⵔⴻⵏ ⵏ ⵜⵓⴷⴰⴷⵉⵏ,
ⵏⴻⵜⵜⴰ ⵉⵜⵜⴻⵊⵊⴰ ⴰⵢⵉ ⵚⵚⵓⵔⵓⴼⴻⵖ ⵅ ⵍⴻⴳⵄⵓⴷⵉ.
ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ.
ⴰⴽ-ⴷ ⵓⵣⴻⵏⵣⵓⵏ ⵉⵏⵓ ⵅ ⵉⴼⵉⵍⴰⵏ.