2
ⵙⵉⴷⵉ ⴰⴷ ⴷⴷ-ⵢⴰⵔⵔ ⵅ ⵃⴰⴱⴰⵇⵇⵓⵇ ⵉ ⵜⵡⴰⵍⴰ ⵡⵉⵙⵙ ⵜⵏⴰⵢⴻⵏ
1 ⵏⴻⵛⵛ ⴰⴷ ⴱⴻⴷⴷⴻⵖ
ⴷⴻⴳ ⵡⴻⵎⵛⴰⵏ ⵏ ⵜⵄⴻⵙⵙⴰⵙⵜ ⵉⵏⵓ
ⵓ ⴰⴷ ⵙⵙⴱⴻⴷⴷⴻⵖ ⵉⵅⴻⴼ ⵉⵏⵓ
ⵅ ⵚⵚⵓⵎⵄⴻⵜ ⵏ ⵜⵄⴻⵙⵙⴰⵙⵜ,
ⴰⴷ ⵚⴻⵡⴹⴻⵖ ⵎⴰⵃⴻⵏⴷ ⴰⴷ ⵥⴰⵔⴻⵖ
ⵎⵉⵏ ⵉ ⴷ ⴰⵢⵉ ⵖⴰ ⵢⵉⵏⵉ ⵏⴻⵜⵜⴰ,
ⵓ ⵎⵉⵏ ⵉ ⴷⴷ ⵖⴰ ⵢⴰⵔⵔⴻⵖ ⵅ ⵓⵛⴻⵜⵛⵉ ⵉⵏⵓ.
2 ⵢⴰⵔⵔⴰ-ⴷⴷ ⵅⴰⴼⵉ ⵙⵉⴷⵉ, ⵉⵏⵏⴰ:
ⴰⵔⵉ ⵍⴻⵡⵃⵉⵢ
ⴰⵔⵉ ⵜ ⵉⴼⴰⵔⵣ ⵅ ⵜⴻⵍⵡⵉⵃⵉⵏ,
ⵎⴰⵃⴻⵏⴷ ⵡⴻⵏⵏⵉ ⵉⵄⴻⴷⴷⵓⵏ
ⴰⵎ ⴷⴷ-ⵉⵜⵜⴰⵣⵣⴻⵍ, ⵉⵣⴻⵎⵎⴰⵔ ⴰⴷ ⵜ ⵉⵖⴰⵔ.
3 ⵎⴰⵖⴰⵔ ⵍⴻⵡⵃⵉⵢ ⵉⵜⵜⵔⴰⵊⴰ ⵄⴰⴷ
ⴰⵍ ⵍⵡⴻⵇⵜ ⵏⵏⵉ ⵢⵓⵔⴰⵏ.
ⵉⵜⵜⴻⵎⵃⵉⵣⵡⴰⵔ ⵖⴰⵔ ⵓⵇⴻⵟⵟⵓ
ⵓ ⵡⴰⵔ ⵉⵙⵙⵅⴰⵔⵔⵉⵇ ⵛⴰ.
ⵎⴰⵍⴰ ⵉⵇⵇⵉⵎ ⵡⴰⵔ ⴷⴷ-ⵉⵜⵜⵉⵙ, ⵇⵇⵉⵎ ⵔⴰⵊⴰ ⵜ,
ⵎⴰⵖⴰⵔ ⴰⴷ ⴷⴷ-ⵢⴰⵙ ⵙ ⵜⵉⴷⴻⵜⵜ,
ⵡⴰⵔ ⵉⵄⴻⵟⵟⴰⵍ.
4 ⵅⵣⴰⵔ, ⴰⵇⴰ ⵉⵜⵜⵓⴼⴼ, ⵡⴰⵀ,
ⵍⴻⵄⵎⴰⵔ ⵏⵏⴻⵙ ⵡⴰⵔ ⵉⵙⴻⴳⴳⴻⵎ ⴷⴰⵢⴻⵙ,
ⵎⴰⵛⴰ ⴰⵎⵙⴻⴳⴳⴻⴷ ⵙ ⵍ’ⵉⵎⴰⵏ ⵏⵏⴻⵙ ⴰⴷ ⵉⴷⴷⴰⵔ.
5 ⵙ ⵜⵉⴷⴻⵜⵜ, ⴱⵉⵏⵓ ⴰⵇⴰ ⵉⵛⴻⵎⵎⴻⵜ!
ⴱⵉⵏⵓ ⴰⵇⴰ-ⵜ ⴰⵎ ⵢⵉⵊⵊ ⵏ ⴱⵓ-ⵏⵏⴼⴰⵅⴻⵜ
ⵡⴻⵏⵏⵉ ⵡⴰⵔ ⵉⵜⵜⴰⵔⴻⵢⵢⵃⴻⵏ,
ⵡⴻⵏⵏⵉ ⵉⵙⵙⴻⵎⵖⴰⵔⴰⵏ ⵍⴻⵄⵎⴰⵔ ⵏⵏⴻⵙ
ⴰⵎⴻⵍⵀⴰⴼ ⴰⵎ ⵍⴰⵅⴰⵔⵜ.
ⵏⴻⵜⵜⴰ ⵡⴰⵔ ⵉⵜⵜⵊⵊⵉⵡⵉⵏ ⴰⵎ ⵍⵎⴻⵡⵜ
ⵓ ⵉⵢⵔⵓ ⵖⴰⵔⴻⵙ ⵎⴰⵔⵔⴰ ⵍⴻⴳⵏⵓⵙ
ⵓ ⵉⵙⵙⵎⵓⵏ ⵖⴰⵔⴻⵙ ⵎⴰⵔⵔⴰ ⵉⵢⴷⵓⴷⴻⵏ.
6 ⵎⴰ ⵡⴰⵔ ⴷⴷ ⵅⴰⵙ ⵜⵜⵉⵡⵢⴻⵏ
ⵉⵊⵊ ⵏ ⵡⴰⵡⴰⵍ ⵉⵡⴻⵣⵏⴻⵏ
ⵓⵍⴰ ⴷ ⵉⵊⵊ ⵏ ⵢⴻⵥⵔⵉ
ⵉⵛⵛⵓⵔ ⵙ ⵍⴻⵎⵄⴰⵏⵉ ⵉⵏⵏⵓⴼⴰⵔⴻⵏ, ⴰⴷ ⵉⵏⵉⵏ:
ⵓⵛⵜ ⵅ ⵡⴻⵏⵏⵉ ⵉⵊⴰⵔⵔⵡⴻⵏ
ⵎⵉⵏ ⵡⴰⵔ ⵉⴵⵉⵏ ⵏⵏⴻⵙ!
ⴰⵍ ⵎⴻⵍⵎⵉ ⵄⴰⴷ?
ⵓⵛⵜ ⵅ ⵡⴻⵏⵏⵉ ⵉⵙⵙⴷⴻⵇⵇⴰⵍⴻⵏ
ⵉⵅⴻⴼ ⵏⵏⴻⵙ ⵙ ⵡⴻⵔⵀⴰⵏ!
7 ⵎⴰ ⵡⴰⵔ ⴷⴷ-ⵜⵜⴻⴽⴽⴰⵔⴻⵏ ⵙ ⵍⵖⴻⴼⵍⴻⵜ
ⵉⵏⵏⵉ ⵉ ⵛⴻⴽ ⵖⴰ ⵉⵣⴻⵄⴼⴻⵏ,
ⵓ ⵎⴰ ⵡⴰⵔ ⴷⴷ-ⵜⵜⴼⴰⵇⴰⵏ ⵛⴰ
ⵉⵏⵏⵉ ⵛⴻⴽ ⵖⴰ ⵢⴰⵔⵔⴻⵏ ⵜᵉⵜⵜⴰⵔⵊⵉⵊⴻⴷ,
ⵓ ⵎⴰ ⵡⴰⵔ ⴷ ⴰⵙⴻⵏ ⵜᵉⵜⵜⵉⵍⵉⴷ
ⴷ ⵜⴰⴽⴻⵛⵛⴰⴹⵜ ⵏⵙⴻⵏ?
8 ⵎⴰⵖⴰⵔ ⵛⴻⴽ ⵜⴽⴻⵛⵛⴹⴻⴷ ⴰⵟⵟⴰⵙ ⵏ ⵍⴻⴳⵏⵓⵙ,
ⴰⴷ ⵛⴻⴽ ⴽⴻⵛⵛⴹⴻⵏ ⵎⴰⵔⵔⴰ ⵍⴻⴳⵏⵓⵙ ⵉⵇⵇⵉⵎⴻⵏ
ⴷⵉ ⵙⵙⵉⴱⴱⴻⵜ ⵏ ⵉⴷⴰⵎⵎⴻⵏ ⵏ ⵉⵡⴷⴰⵏ
ⴷ ⵍⵄⵓⵏⴼ ⵅ ⵜⴻⵎⵎⵓⵔⵜ,
ⵓ ⵅ ⵜⴻⵏⴷⵉⵏⵜ ⵓ ⵅ ⵎⴰⵔⵔⴰ
ⵉⵏⵏⵉ ⴷⴰⵢⴻⵙ ⵉⵣⴻⴷⴷⵖⴻⵏ.
9 ⵓⵛⵜ ⵅ ⵡⴻⵏⵏⵉ ⵉⴽⴻⵙⵙⴱⴻⵏ ⵙ ⵍⵖⴻⵛⵛ
ⵜⴰⴽⴻⵛⵛⴰⴹⵜ ⵉ ⵜⴰⴷⴷⴰⵔⵜ ⵏⵏⴻⵙ,
ⵎⴰⵃⴻⵏⴷ ⴰⴷ ⵉⴱⵏⴰ ⵍⵄⵓⵛⵛ ⵏⵏⴻⵙ ⴷⵉ ⵍⵓⵄⵍⴰ,
ⵃⵉⵎⴰ ⴰⴷ ⵉⵏⵊⴻⵎ ⴰⵎⵎⵓ ⵣⴻⴳ ⵓⴼⵓⵙ ⵏ ⵍⵖⴰⵔ.
10 ⵛⴻⴽ ⵜⵛⴰⵡⴰⵔⴻⴷ ⵍⴻⴼⴹⵉⵃⴻⵜ ⵉ ⵜⴰⴷⴷⴰⵔⵜ ⵏⵏⴻⵛ,
ⵃⵉⵎⴰ ⴰⴷ ⵜⴻⵇⴹⵉⴷ ⵅ ⵍⴻⴳⵏⵓⵙ,
ⵓⵛⴰ ⴰⵎⵎⵓ ⵉ ⵜⴻⴳⴳⵉⴷ ⴷⴷⴻⵏⴱ
ⴷⵉ ⵍⴻⵄⵎⴰⵔ ⵏⵏⴻⵛ.
11 ⵎⵉⵏⵣⵉ ⴰⵥⵔⵓ ⵉⵙⵖⵓⵢⵢⵓ-ⴷⴷ ⵣⵉ ⵍⵃⵉⴹ,
ⵓ ⵜⴰⵃⵏⴰⵛⵜ ⵜᵉⵜⵜⴰⵔⵔⴰ-ⴷⴷ ⵅⴰⵙ
ⵣⵉ ⵊⴰⵔ ⵜⴻⴼⵍⴰⵡⵜ.
12 ⵓⵛⵜ ⵅ ⵡⴻⵏⵏⵉ ⵉⴱⴻⵏⵏⴰⵏ
ⵉⵛⵜ ⵏ ⵜⴻⵏⴷⵉⵏⵜ ⵙ ⵉⴷⴰⵎⵎⴻⵏ
ⵓⵍⴰ ⵅ ⵡⴻⵏⵏⵉ ⵉⵙⵙⵔⵓⵙⴰⵏ ⴷⵙⴰⵙ
ⵏ ⵢⵉⵛⵜ ⵏ ⵜⴻⵏⴷⵉⵏⵜ ⵙ ⵍⵖⴻⵛⵛ!
13 ⵅⵣⴰⵔ, ⵎⴰ ⵡⴰⵔ ⵉⴵⵉ ⵣⵉ ⵙⵉⴷⵉ ⵏ ⵍⵄⴻⵙⴽⴰⵔⴰⵜ,
ⴰⵇⴰ ⵍⴻⴳⵏⵓⵙ ⴰⵔⴻⴱⴱⵔⴻⵏ ⵉⵅⴻⴼ ⵏⵙⴻⵏ ⵉ ⵜⵎⴻⵙⵙⵉ,
ⵓ ⵛⵛⵓⵄⵓⴱ ⵜⵜⴰⵃⵍⴻⵏ ⵉ ⵡⴰⵍⵓ?
14 ⵎⴰⵖⴰⵔ ⵜⴰⵎⵎⵓⵔⵜ ⴰⴷ ⵜᵉⵜⵜⵡⴰⵛⵛⵓⵔ
ⵙ ⵜⵓⵙⵙⵏⴰ ⵏ ⵓⵄⵓⴵⵉ ⵏ ⵙⵉⴷⵉ,
ⴰⵎ ⵎⴰⵎⵎⴻⵛ ⵜⵜⴷⴰⵍⴻⵏ ⵡⴰⵎⴰⵏ ⵍⴻⴱⵃⴰⵔ.
15 ⵓⵛⵜ ⵅ ⵡⴻⵏⵏⵉ ⵉ ⵖⴰ ⵉⵙⵙⴻⵙⵡⴻⵏ ⵊⵊⴰⵔ ⵏⵏⴻⵙ,
ⵡⴻⵏⵏⵉ ⵉⵅⴻⴵⴹⴻⵏ ⴱⵉⵏⵓ ⵙ ⵙⵙⴻⵎ ⵏⵏⴻⵛ
ⵓ ⵅⴻⵏⵏⵉ ⵉⵙⵙᵉⵙⵛⴰⵔ ⵉ-ⵜ,
ⵎⴰⵃⴻⵏⴷ ⴰⴷ ⵉⵥⴰⵔ ⵜⵓⵄⵄⴰⵔⵢⴰⵏⵜ ⵏⵙⴻⵏ.
16 ⴰⴷ ⵜⴻⵙⵙⵊⵊⵉⵡⵏⴻⴷ ⵉⵅⴻⴼ ⵏⵏⴻⵛ ⵙ ⵍⴻⴼⴹⵉⵃⴻⵜ
ⴷⴻⴳ ⵡⴻⵎⵛⴰⵏ ⵏ ⵛⵛⴰⵏ.
ⵙⵓ ⵛⴻⴽ ⵍⴻⵅⵅⵓ ⵄⴰⵡⴻⴷ,
ⵓⵛⴰ ⴻⵊⵊ ⴰⵅⵜⴰⵏ ⵏⵏⴻⵛ ⵡⴰⵔ ⵉⴵⵉⵏ ⵉⵜⵜⴱⴰⵏ.
ⵍⴽⴰⵙ ⵣⴻⴳ ⵓⴼⵓⵙ ⴰⴼⵓⵙⵉ ⵏ ⵙⵉⴷⵉ
ⴰⴷ ⵖⴰⵔⴻⴽ ⴷⴷ-ⵢⴰⵙ,
ⵓⵍⴰ ⴷ ⵍⴻⴼⴷⵉⵃⴻⵜ ⵅ ⵓⵄⵓⴵⵉ ⵏⵏⴻⵛ.
17 ⵎⴰⵖⴰⵔ ⵍⵄⵓⵏⴼ ⵉ ⵜⴻⴳⴳⵉⴷ ⴹⵉⴷⴷ ⵉ ⵍⵓⴱⵏⴰⵏ
ⴰⴷ ⵛⴻⴽ ⵉⴷⴻⵍ
ⵓⵍⴰ ⴷ ⴰⵔⴻⴷⴷⴻⴵ ⵏ ⵍⵎⴰⵍ ⵉ ⵣⵉ ⵜⴻⵏ ⵜⴻⵙⵙⵉⴳⴳⵯⴷⴻⴷ,
ⴷⵉ ⵙⵙⵉⴱⴱⴻⵜ ⵏ ⵉⴷⴰⵎⵎⴻⵏ ⵏ ⵉⵡⴷⴰⵏ
ⴷ ⵍⵄⵓⵏⴼ ⵅ ⵜⴻⵎⵎⵓⵔⵜ,
ⵓ ⵅ ⵜⴻⵏⴷⵉⵏⵜ ⵓ ⵅ ⵎⴰⵔⵔⴰ ⵉⵏⵏⵉ ⴷⴰⵢⴻⵙ ⵉⵣⴻⴷⴷⵖⴻⵏ.
18 ⵎⴰ ⵜⵉⵣⵉ ⵏ ⵉⵊⵊ ⵏ ⵍⴻⵅⵢⴰⵍ ⵉⵏⴻⵇⵛⴻⵏ,
ⵓⵎⵉ ⵜ ⵉⵏⵇⴻⵛ ⵓⵏⴻⵇⵇⴰⵛ ⵙ ⵢⵉⵅⴻⴼ ⵏⵏⴻⵙ,
ⵎⴰⵏ ⵜⵉⵣⵉ ⵏ ⵢⵉⵊⵊ ⵏ ⵍⴻⵅⵢⴰⵍ ⵉⴼⴻⵙⵢⴻⵏ
ⵓⵎⵉ ⴰⵏⴻⵇⵇⴰⵛ ⵏⵏⴻⵙ
ⴷ ⵉⵊⵊ ⵏ ⵓⵎⵙⴻⵍⵎⴻⴷ ⵏ ⵉⵅⴰⵔⵔⵉⵇⴻⵏ,
ⵍⴰⵎⵉ ⵡⴻⵏⵏⵉ ⵜ ⵉⴳⴳⵉⵏ ⵉⵜⵜⵛⴻⵍ ⵅ ⵎⵉⵏ ⵉⴳⴳⴰ,
ⵓⵎⵉ ⵉⵜⵜⴻⴳⴳ ⵍ’ⴰⵚⵏⴰⵎ ⵉⴳⵏⴰⵡⴻⵏ?
19 ⵓⵛⵜ ⵅ ⵡⴻⵏⵏⵉ ⵉⵇⵇⴰⵔⴻⵏ ⵉ ⵓⴽⴻⵛⵛⵓⴹ ‘ⴼⴰⵇ!’
ⵓ ⵉ ⵡⴻⵥⵔⵓ ⵉⴳⵏⴰⵡⴻⵏ: ‘ⴽⴽⴰⵔ!’.
ⵎⴰ ⵉⵣⴻⵎⵎⴰⵔ ⴰⴷ ⵉⵙⵙⴻⵍⵎⴻⴷ?
ⵅⵣⴰⵔ, ⴰⵇⴰ ⵍⴻⵃⵃⴼⴻⵏ ⵜ ⵙ ⵡⵓⵔⴻⵖ ⴷ ⵏⵏⵓⵇⴰⵔⵜ
ⵓ ⵡⴰⵔ ⴷⴰⵢⴻⵙ ⵇⴰⵄ ⴱⵓⵃⴱⴻⵍ.
20 ⵙⵉⴷⵉ ⴰⵇⴰ-ⵜ ⴷⵉ ⵣⵣⴰⵡⴻⵛⵜ ⵏⵏⴻⵙ ⵉⵇⴻⴷⴷⵙⴻⵏ.
ⵙⵓⵙⴻⵎ ⵣⵣⴰⵜ ⵉ ⵡⵓⴷⴻⵎ ⵏⵏⴻⵙ,
ⵎⴰⵔⵔⴰ ⵜⴰⵎⵎⵓⵔⵜ!