2
Aseřmed n Bulus x weɛbad n tmesmunt i Arebbi
1 S uyenni ttzawageɣ kenniw, ḥima ad tqarrbem d amezwaru ɣar AREBBI s tutra d tẓaǧitin d tkessit s řmeɛruf d uqadi di ṭṭweɛ n marra iwdan,
2 di ṭṭweɛ n ijeǧiden d imeqqranen, ḥima xenni ad neddar di řehna d řhudnet u s marra tiggʷudi d tezdugi zzat AREBBI.
3 Minzi man aya d aṣebḥan u yusa as-dd i řxaḍar i AREBBI, wenni d aneɣ itticen Tudart,
4 wenni ixsen aqa marra iwdan ad ṭṭfen Tudart uca ad dd-dewřen ɣar tussna n tidett.
5 Minzi aqa din ijj n AREBBI d ijj n Lwasit jar AREBBI d iwdan, aqa Netta d Mmis n bnadem, Yasuɛ Lmasiḥ,
6 wenni iwcin Ixef nnes d aṣřaḥ i marra bnadem, aqa-tt d cchadet i dd-yusin di řweqt nnes.
7 I man aya ttwaggeɣ d ambarreḥ d rrasul, aqa qqareɣ tidett, war ssxarriqeɣ ca, ḥima ad iřiɣ d amseɣɣar n řegnus di l’iman n tidett.
8 S uya xseɣ belli iryazen ad ẓẓaǧen di mkuř amcan, am ssgeɛɛaden ifassen nsen s tezdugi, břa axeyyeq d umcubbec.
9 Ammu uřa d timɣarin ad yarḍent s uweqqar, ittxeṣṣa ad zehhjent ixef nsent s ijj n webrid n řeḥya u n tsexxayt, war iǧi s umudi n ucuwwaf niɣ s wureɣ niɣ s tyaqutin niɣ s warruḍ iɣřan,
10 maca ad zehhjent ixef nsent s řexdayem iṣebḥen am mammec dd-yusa x temɣarin, tinni ittnejbaden ɣar uweqqar n AREBBI.
11 Ejj tamɣart ad teřmed di řhudnet, ak-d marra tamwaḍeɛt,
12 maca necc war ttejjiɣ tamɣart ad tesseřmed niɣ ad ɣares yiři jjehd x weryaz, maca ad tiři tesqar.
13 Minzi Adam ittwagg d amezwar, awarni as Ḥawwa.
14 Uca Adam war ittwaɣarr ca, maca tamɣart tᵉttwaɣarr, xenni texḍa x tewṣeyyet.
15 Maca ad teddar s tarwa nnes, mařa ttɣiman nitni ttcebbaren di l’iman d tayri d tqeddast d řeḥya.