1 Timutiyu
1
Aseǧem ɣar umezwaru d iɛřamen
1 Bulus, rrasul n Yasuɛ Lmasiḥ, ɛlaḥsab řumur n AREBBI, wenni d aneɣ itticen Tudart, u n Lmasiḥ Yasuɛ, wenni d asitem nneɣ.
2 I Timutiyu, mmi d tidett di l’iman: arḍa d arreḥmet d řehna ad ac iřin zi AREBBI, Babatneɣ, u zi Lmasiḥ Yasuɛ, Siditneɣ.
3 Řami ruḥeɣ ɣar Makiduniya zawgeɣ cek ad teqqimed di Afasus, ḥima ad tumured i ca n yeryazen ḥima war sseřmiden ca iseřmaden nneɣni,
4 u ḥima war tticen ca taynit i tḥuja ixwan d taṣiřat war iqeṭṭin nni dd-ittawyen ɣar imḥarwaḍen ktar, war iǧi ɣar min iǧan i řebni di l’iman n AREBBI.
5 Ssum n tweṣṣa aqa d tayri zeg wuř amezdag d tnefsect icnan u zi l’iman d tidett.
6 Aqa dinni ca inni iheyyḍen x man aya uca nnqeřben ɣar řhard ixwan.
7 Nitni xsen ad iřin d imesɣaren n Ccariɛa břa řefhamet di min qqaren u x min xef ttemcubbucen.
8 Maca nessen belli Ccariɛa teṣbeḥ mařa ḥed ijja ixef nnes ad ittwandeh zzayes ɛlaḥsab Ccariɛa,
9 am nessen aqa Ccariɛa war temmewc ca i umseggaden, maca i yinni war iseggden u i imɣewwaɣen, i iɛeffanen d imednab, i imeqjaḥ, i imexmujen, i yinni iwtin babatsen u i yinni iwtin yemmatsen u i yinni ineqqen iwdan,
10 i ayt n farq-ccɣeř d zzwameř, i yinni ittsebbaben deg iwdan, i ayt n bu-ixarriqen d yinni ittareẓẓan tajaǧit nsen uca zeɛma i marra min war dd-ittisen ca ak-d useřmed iṣeḥḥen
11 n L’Injil i d ayi ittwawekkřen, zi jjihet n uɛuǧi n AREBBI ittwabarken.
Arḍa n Arebbi i Bulus
12 Necc ttqadiɣ Wenni d ayi issjehden, aqa Siditneɣ Yasuɛ Lmasiḥ, umi iḥseb ayi-dd d amtiqqi řami d ayi igga di řxedmet n tsexxart nnes,
13 necc d wenni tuɣa iǧan qbeř d amceqqaf d ijj n umarrat n imasiḥiyyen uřa d ijj n bu-řɛunf. Maca temmewc ayi-dd arreḥmet, minzi ggiɣ t war ssineɣ, umi d ayi tuɣa břa l’iman.
14 Arḍa n Siditneɣ tuɣa ifeyyeḍ dayi s waṭṭas, uřa d l’iman d tayri tenni iǧan di Yasuɛ Lmasiḥ.
15 Wa d awař dayes řaman, i isdaheǧen ad yiři iggur, aqa Yasuɛ Lmasiḥ yusa-dd ɣar ddunect ḥima ad issenjem imednab, inni zzaysen necc d amezwaru.
16 Maca x uya ksiɣ arreḥmet maḥend Yasuɛ Lmasiḥ ad isscen dayi d amezwaru marra ttasiɛ n řxaḍar nnes, d lmital i yinni zzayes i ɣa yamnen i Tudart ittduman.
17 Aqa i Ujeǧid n zzmanat, d Wenni war ifennin, d Wenni war ittwiřin, Wenni d AREBBI d Ijj, ad ɣares yiři ccan d uɛuǧi i zzman n zzmanat qaɛ. Amin.
18 Tasexxart-a, a mmi Timutiyu, sswekkřeɣ cek xas, ḥima ad temmenɣed amenɣi aṣebḥan ɛlaḥsab min xak ittwanabben qbeř,
19 s l’iman d tnefsect icnan, maɣar inni ugin man aya, aqa ssexwan ixef nsen zi l’iman.
20 Jar asen Himiniyus d Aliksandir, inni sellmeɣ i cciṭan ḥima ad řemden maḥend war ttceqqafen.