30
Dawud intaqem zeg Iɛamaliqiyyen
1 Umi dd-yusa Dawud d yeryazen nnes ɣar Ṣiqlaɣ deg wass wiss třata, tuɣa imsar, aqa ayt n Ɛamaliq keccḍen ljanub uřa d Ṣiqlaɣ. Nitni wtin Ṣiqlaɣ, qqden as timessi
2 uca ḥebbsen timɣarin nni din iǧan. War nɣin uřa d ijj, ameẓyan niɣ d ameqqran, maca iwyen ten uca uyuren abrid nsen.
3 Yusa-dd Dawud ak-d yeryazen nnes ɣar tendint, uca xzar, aqa tᵉttwassecmeḍ tendint s tmessi u timɣarin d iḥenjiren d tḥenjirin tuɣa ttwaḥewwsen.
4 Dawud d řgens i ɣares iǧan ssgeɛɛden tmijja nsen, sɣuyen ařami war daysen iqqim jjehd ḥima ad sɣuyen.
5 Uřa d tnayen n temɣarin n Dawud ttwaḥewwsent, Axinuɛam zi Yazraɛil u Abijayil zi Karmil.
6 Tuɣa Dawud tᵉttwaḥṣared aṭṭas, minzi řgens tuɣa issawař maḥend ad t arejmen, maɣar řeɛmur n marra řgens tuɣa arezgen, kuř aryaz x txessart n iḥenjiren nnes d tḥenjirin nnes. Maca Dawud issejhed ixef nnes di SIDI, AREBBI nnes.
7 Inna Dawud i ukehhan Abyatar, mmis n Aximalik: “Awi-dd da ɣari apalṭu n ukehhan!” U Abyatar yiwi-dd apalṭu n ukehhan ɣar Dawud.
8 Xenni isseqsa Dawud i SIDI: “Ma ad ḍfareɣ bandiyya-ya? Ma ad xasen ḥarteɣ?” SIDI yarra-dd xas: “Ḍfar i-ten, maɣar cek ad xasen tḥarted u ad tfekked imeḥbas nican.”
9 Iffeɣ-dd Dawud, netta d setta-mya n yeryazen nni tuɣa ɣares. Umi dd-iwḍen nitni ař tiɣzart n Basur, bedden din inni iqqimen ɣar ḍeffar,
10 maca Dawud iqqim iḍeffar bandiyya nni, netta d arebɛa-mya n yeryazen akides. Mitayn n yeryazen, inni tuɣa yuḥřen aṭṭas maḥend ad ẓwan tiɣzart n Bacur, qqimen bedden din.
11 Nitni ufin ijj n weryaz d Amiṣri deg iyyar uca iwyen t ɣar Dawud. Nitni wcin as aɣrum u netta icca u nitni wcin as ɛawed aman maḥend ad isu.
12 Arnin as ict n tesɣart n ijj n weɣrum n tazart yuẓɣen d tnayen n iɣrumen n zzbib u netta icca, idweř as-dd buḥbeř nnes, maɣar netta tuɣa war icci war iswi třata n wussan d třata n ǧiyaři.
13 Xenni inna as Dawud: “Wi cek yiřan u manis cek?” Xenni inna uḥudri Amiṣri: “Necc d ijj n umsexxar n ijj n weryaz n Ɛamaliq u sidi inu ijja ayi, řami heřceɣ třata n wussan zeg wami.
14 Neccin tuɣa nkecceḍ tammurt n ljanub n Ikaritiyyin, tenni ɣar Yahuda, uřa d tammurt n ljanub n Kalib, u neccin nessecmeḍ Ṣiqlaɣ s tmessi.”
15 Dawud inna as: “Ma tzemmared ad ayi tnedhed ɣar bandiyya-ya n ixewwanen?” Netta inna: “Jaǧ ayi ɣar AREBBI, aqa cek war d ayi tneqqed u war d ayi tessɛeddud i sidi inu! Xenni necc ad cek nedheɣ ɣar bandiyya-ya.”
16 Uca indeh i-t din, u xzar, nitni tuɣa qqimen ttwabezzɛen x marra tammurt, ccin, swin u ceḍḥen zi ssibbet n tkeccaḍt tameqqrant i tuɣa dd-iwyen zi temmurt n Ifilisṭiniyyen u zi temmurt n Yahuda.
17 Dawud iwta xasen zi tbambast ař tameddit n wass i-tt-i-dd-iḍfaren uca uřa d ijjen zzaysen war injim, mɣir arebɛa-mya n iḥudriyyen nni inyin x iřeɣman, arewřen.
18 Ammu dd-ifekk Dawud marra min kksen ayt n Ɛamaliq. Dawud ifekk-dd uřa d tnayen n temɣarin nnes.
19 Zeg umeẓyan ař ameqqran, zeg iḥenjiren d tḥenjirin, zi tkeccaḍt u zi marra min zzaysen kksen, war iweddar walu. Marra yarra i-t-i-dd Dawud.
20 Iksi Dawud ɛawed marra uǧi d ifunasen d tfunasin. Nedhen ten ɣar zzat i řeksibet n yixef nsen, nnan: “Ta d takeccaḍt n Dawud.”
21 Umi dd-yiweḍ Dawud ɣar mitayen n yeryazen, inni tuɣa yuḥřen aṭṭas ḥima ad ḍfaren Dawud ɛad, inni ijja Dawud ɣar teɣzart n Bacur, aqa ffɣen-dd nitni ɣar umsagar ak-d Dawud u ak-d řgens nni tuɣa ɣares. Dawud iqarreb-dd ɣarsen uca isseqsa x umeddur nsen.
22 Xenni yarra-dd kuř aryaz war iḥřin d wenni war isekkwin jar yeryazen nni tuɣa dd-iffɣen ak-d Dawud, nnan: “Maɣar nitni war kidneɣ ffiɣen, x uyenni war d asen nᵉttic walu zi tkeccaḍt i dd-nfekk, mɣir i kuř aryaz tamɣart nnes d iḥenjiren nnes. D ina zemmaren nitni ad awyen uca ad kidsen areggʷḥen.”
23 Maca Dawud inna: “War iɛeddeř ad teggem amenni, aytma, aqa SIDI d wenni d aneɣ iwcin aya u Netta iḥḍa aneɣ u iwca bandiyya i d aneɣ dd-iwḍan deg ufus nneɣ.
24 Wi ɣarwem i ɣa isřen ɣar wawař nwem? Maɣar tasɣart n wenni iffɣen ɣar umenɣi ad tiři am tesɣart n wenni iqqimen ɣar řexzin. Nitni ad tt bḍan jmiɛ.”
25 Ammu i tt teqqim zeg wass nni, minzi netta igga i-tt d ict n tewṣeyyet d ict n lfariḍa di Israil ař ass-a.
Dawud issekk tirzefin i imɣaren n Yahuda
26 Umi yareggʷeḥ Dawud ɣar Ṣiqlaɣ, issekk netta tirzefin zi tkeccaḍt ɣar imɣaren n Yahuda, imeddukkař nnes, am i d asen inna: “Ta d ict n lbaraka i kenniw zi tkeccaḍt n řɛedyan n SIDI”.
27 Issekk i imɣaren di Bayt-Il, i yinni di Ramat di ljanub, i yinni di Yattir,
28 i yinni di Ɛaruɛir, i yinni di Sifmut, i yinni di Icitimuɛa,
29 i yinni di Raxil, i yinni tuɣa izeddɣen di tneddam n Iyarḥamtiliyyen, i yinni izeddɣen di tneddam n Iqiniyyen,
30 i yinni di Ḥurma, i yinni di Kur-Ɛacan, i yinni di Ɛatak,
31 i yinni di Ḥabrun u ɣar marra imucan mani tuɣa ikka Dawud, netta ak-d iryazen nnes.