29
Dawud d řbacat n Ifilisṭiniyyen
1 Ifilisṭiniyyen ssmunen marra řɛeskar nsen ɣar Afiq uca Israil tuɣa iwta iqiḍan nnes ɣar tařa nni iǧan ɣar Yazraɛil.
2 Uca řbacat n tneddam n Ifilisṭiniyyen ẓwan ɣar din s řmyawat d řuřuf nsen uca iẓwa Dawud d yeryazen nnes ak-d Axic ɣar uɣezdis aneggaru.
3 Xenni nnan řḥukkam n Ifilisṭiniyyen: “Min da tteggen Iɛibraniyyen-a?” Yarra-dd Axic x řḥukkam n Ifilisṭiniyyen: “Ma wa war iǧi d Dawud, amsexxar n Cawul, ajeǧid n Israil, wenni tuɣa ɣari iǧan aseggʷas d wass? Zeg wass i ɣari dd-yeɛdu ař ass-a necc war dayes ufiɣ uřa d ijj n řɛib.”
4 Ffuggmen xas aṭṭas řḥukkam n Ifilisṭiniyyen. Nnan as řḥukkam n Ifilisṭiniyyen: “Sekk aryaz ad iɛqeb, ḥima ad idweř ɣar wemcan nnes nni i d as tessecned. War izemmar akidneɣ ihwa ɣar umenɣi, ḥima xenni war iddikkwiř d řeɛdu nneɣ deg umenɣi. Maɣar s minzi izemmar wanita ad iṣřeḥ ak-d sidis nnes? Ma war iǧi ak-d izeǧifen n yeryazen-a?
5 Ma wanita war iǧi d Dawud wenni x ɣennjent d ceḍḥent s nnubtat, nnant: ‘Cawul netta iɣřeb x řuřuf nnes, maca Dawud netta x ɛecra n řuřuf nnes?’ ”
6 Uca iřaɣa-dd Axic i Dawud inna as: “S tidett am iddar SIDI, cek d aṣdiq. Ufuɣ nnec d weɛqab nnec akidi di řɛeskar aqa aten mliḥ di tiṭṭawin inu, maɣar necc war dayek ufiɣ uřa d ca n řɣecc zeg wass i ɣari dd-tusid ař ass-a. Maca cek war teǧid mliḥ di tiṭṭawin n řbacat n tneddam.
7 Xenni řexxu, ɛqeb, uyur di řehna, ḥima war tᵉttegged qaɛ ca n řɣecc di tiṭṭawin n řbacat n tneddam n Ifilisṭiniyyen.”
8 Xenni inna Dawud i Axic: “Maɣar min ggiɣ? Min tufid deg umsexxar nnec zeg wass amezwaru i d ayi tuɣa zzat i wudem nnec ař ass-a, ařami war ruḥeɣ akidwem ad menɣeɣ ak-d řɛedyan n sidi inu, ajeǧid?”
9 Axic yarra-dd, inna i Dawud: “Necc ssneɣ tt, minzi cek d lemliḥ di tiṭṭawin inu am yijj n lmalak n AREBBI, maca řḥukkam n Ifilisṭiniyyen nnan: ‘Netta war akidneɣ itteffeɣ ɣar umenɣi.’
10 S uyenni kkar tiwecca zic s imsexxaren n sidi nnec, inni akidek dd-yusin. Mařa tekkarem s wass zic uca iṣbeḥ řḥař, ffɣem xenni.”
11 Dawud ikkar zic, netta d yeryazen nnes, ḥima ad uyuren di ṣṣbeḥ, ad dd-ɛeqben ɣar temmurt n Ifilisṭiniyyen. Ifilisṭiniyyen maca ffɣen, geɛɛden ɣar Yazraɛil.