14
Adef n Yunatan ɣar tecbart n Ifilisṭiniyyen
1 Ijj n wass imsar, aqa Yunatan, mmis n Cawul, inna i umsexxar wenni d as yarebbun řesnaḥ: “As-dd, ejj aneɣ ad neẓwa ɣar terbiɛt n iɛessasen n řɛeskar n Ifilisṭiniyyen nni din iǧan x ujemmaḍ!”, maca netta war t inni i babas.
2 Tuɣa Cawul iqqim ɣar tma n Jibɛa sadu ict n tcejjart n aremmam nni ibedden di Miɣrun, uca řgens i tuɣa akides iǧan, dayes ɛřaḥař setta-mya n yeryazen.
3 Axiya, mmis n Axiṭub, umas n Ixabud, mmis n Finaḥas, mmis n Ɛali, akehhan n SIDI di Cilu, tuɣa yarḍ apalṭu n ukehhan. Řgens war issin aqa Yunatan tuɣa yuyur.
4 Jar imucan n uẓekkʷu x idurar i x tuɣa Yunatan yarezzu ad iẓwa ɣar terbiɛt n iɛessasen n řeskar n Ifilisṭiniyyen, tuɣa din ɣar uɣezdis-a ict n teṣḍart iqeḍɛen i dd-iffɣen uřa d ict teṣḍart iqeḍɛen i dd-iffɣen ɣar uɣezdis nneɣni. Ict ttřaɣan as Buṣayṣ d ict nneɣnit ttřaɣan as Sana.
5 Ict n teṣdart iqeḍɛen tuɣa ɣar ccamal arendad n Mixmas d ict n tesḍart iqeḍɛen nneɣni tuɣa ɣar ljanub arendad n Jibaɛ.
6 Inna Yunatan i umsexxar wenni d as yarebbun řesnaḥ: “As-dd, ejj aneɣ ad neẓwa ɣar terbiɛt n iɛessasen n řeskar n yinni war ittwaxetnen, ad taɣ ad igg SIDI ca di ṭṭweɛ nneɣ, minzi war iwɛar i SIDI, ḥima ad ifekk s ufus n waṭṭas niɣ s ufus n drus.”
7 Aḥemmař n řesnaḥ nnes yarra-dd xas: “Egg marra min ɣarek deg wuř nnec. Uyur, xzar, necc akidek am wuř nnec.”
8 Yunatan inna: “Xzar, neccin ad neẓwa ɣar yeryazen nni, ad asen nesscen ixef nneɣ.
9 Mařa nitni xenni ad aneɣ inin: ‘Beddem ař ɣarwem dd ɣa nas!’, xenni ad neqqim nbedd deg wemcan nneɣ, war ɣarsen nettgeɛɛid ca.
10 Maca mařa nitni ad inin: ‘Geɛɛdem-dd ɣarneɣ!’, xenni ad ɣarsen ngeɛɛed, minzi SIDI igga aneɣ ten deg ufus nneɣ. Aya ad aneɣ yiři d řeɛřamet.”
11 Řami dd seccnen nitni ixef nsen s tnayen idsen ɣar terbiɛt n iɛessasen n řeskar n Ifilisṭiniyyen, nnan Ifilisṭiniyyen: “Xzarem, Iɛibraniyyen ffɣen-dd zeg ixubac nsen i di tuɣa nnuffaren.”
12 Iryazen n terbiɛt n řɛeskar nnan i Yunatan u i wenni d as yarebbun řesnaḥ: “Geɛɛdem-dd ɣarneɣ, neccin ad awem dd-nessiweḍ řexbar!” Uca inna Yunatan i uḥemmař n řesnaḥ nnes: “Geɛɛed awarni ayi, maɣar SIDI igga i-ten deg ufus n Israil.”
13 Xenni igeɛɛed Yunatan x ifassen d iḍaren ɣar sennej, u aḥemmař n řesnaḥ nnes iḍfar i-t uca wḍan iɛessasen nni zzat i wudem n Yunatan u awarni as inɣa i-ten uḥemmař n řesnaḥ nnes.
14 Ticti-ya tamezwarut i zi iwta Yunatan d uḥemmař n řesnaḥ nnes ɛřaḥař ɛicrin n yeryazen, tuɣa teǧa x ijj n yeyyar i tuɣa anect n ijj n wezyen n yeyyar i izemmar ijj n uzayřu n iyenduzen ad t icarz deg ijj n wass.
15 Amenni tudef tarjijet di řmargeḥ n řɛeskar x yeyyar, di marra řgens u deg yinni n terbiɛt n řɛeskar. Uřa d abarru n ikeccaḍen ttarjijen s yixef nsen, wah, uřa d tammurt tenhezz. Tuɣa-tt d ict n řɛurret temɣar n AREBBI.
16 Iɛessasen n Cawul di Jibɛa di Binyamin ẓrin, aqa ittwabezzeɛ řɣaci, dewřen nitni ttmenɣan ak-d wayawya.
17 Xenni inna Cawul i řgens i tuɣa ɣares iǧan: “Arzum xenni u xzarem man wen i zzayneɣ iffɣen.” Nitni arzun u xzar, aqa Yunatan d uḥemmař n řesnaḥ nnes war din ǧin.
18 Xenni inna Cawul i Axiya: “Awi-dd Ttabut n AREBBI danita!” Maɣar Ttabut tuɣa-tt deg wussan nni ɣar ayt n Israil .
19 Umi tuɣa Cawul issawař ɛad ak-d ukehhan, imsar, aqa řɣaci di řmargeḥ n řɛeskar n Ifilisṭiniyyen idweř innehweř aṭṭas. Xenni inna Cawul i ukehhan: “Fekk afus nnec!”
20 Cawul d marra řgens nni tuɣa ɣares, aqa ttwařaɣan-dd maḥend ad munen, uca usin-dd ɣar wazzay n umenɣi, u xzar, ssif n ijjen tuɣa x wenneɣni. Aqa ikkar ijj n uxarweḍ d ameqqran.
21 Tuɣa din ɛawed Iɛibraniyyen inni aṭṭas zeg wami tuɣa ibedden x uɣezdis n Ifilisṭiniyyen, tuɣa tteffɣen-dd akidsen mmṭarrcen jar řɛeskar. Uřa d nitni munen ɣar Israiliyyen nni iǧan ak-d Cawul d Yunatan.
22 Umi marra iryazen n Israil, inni tuɣa innuffaren x idurar n Ifrayim, sřan, aqa Ifilisṭiniyyen tuɣa arewřen, munen uřa d nitni ɣarsen i umenɣi maḥend ad ḍfaren Ifilisṭiniyyen.
23 Deg wass nni ifekk SIDI Israil uca amenɣi iffeɣ uřa ɣar Bayt-Awin.
24 Ttwaɛarrnen iryazen n Israil deg wass nni ar ṭṭarf, minzi Cawul ijjuǧ i řgens, inna: “Wenni i ɣa iccen macca qbeř tameddit u qbeř i ɣa ntaqmeɣ necc x řɛedyan inu, ad yiři ittwanɛeř!” X uya war icci marra řgens.
25 Marra řgens n temmurt yudef ɣar wezɣar uca tuɣa din tamment tewseɛ deg iyyar.
26 Umi dd-yudef řgens ɣar wezɣar, aqa din tamment s ufeyyeḍ, maca uřa d ijj war ɣares isswiẓẓeḍ s ufus maḥend ad zzayes iksi ɣar uqemmum nnes, maɣar řgens iggʷed tajaǧit n Cawul.
27 Maca Yunatan tuɣa war isři řami issjuǧ babas řgens. Netta isswiẓẓeḍ s uneggar n uzeǧaḍ nnes nni iǧan deg ufus nnes uca issisen i-t deg ict n teɣraṣt n tamment. Řami yiwi afus nnes ɣar uqemmum nnes, aqa dewřent tiṭṭawin nnes izdigent aṭṭas.
28 Xenni yarra-dd ijj n weryaz zi řgens, inna: “Babac issjuǧ řgens s ict n tjaǧit, inna: ‘Aryaz i ɣa iccen ass-a aɣrum, ad yiři ittwanɛeř!’ S uyenni ifna řgens.”
29 Xas uca inna Yunatan: “Baba iɣḍeř tammurt di arrẓiyyet. Xzarem waha, tiṭṭawin inu ttceɛɛřent, minzi necc qqaseɣ drust zi tamment-a.
30 Iḥřa asen mři icca řgens mliḥ ass-a zi tkeccaḍt i iṭṭef zi řɛedyan nnes, minzi řexxu ticti i zi wtin nitni Ifilisṭiniyyen war teǧi d tameqqrant ɛad.”
31 Deg wass nni wtin nitni Ifilisṭiniyyen zi Mixmas ař Ayalun, u řgens tuɣa ifna aṭṭas.
32 Řgens iɛemmed x tkeccaḍt u nitni ksin uǧi d ifunasen d tfunasin, uca ɣarṣen asen x temmurt, u řgens icca aysum s idammen.
33 Ssargben man aya i Cawul, nnan: “Aqa řgens ixḍa ak-d SIDI umi nitni ccin aysum ak-d idammen.” Netta inna: “Kenniw tɣeddarem. Seqnunniyem-dd kenniw ass-a ict n teṣḍart ɣari.”
34 Inna Cawul ɛawed: “Bezzɛem ixef nwem jar řgens, tinim asen: ‘Ejj kuř aryaz ad ayi dd-yawi afunas nnes, u ejj kuř aryaz ad ayi dd-yawi ɛawed ijjen zeg wuǧi nnes. Ɣarṣem asen da, ccem zzaysen, maca war ttxeṭṭim ak-d SIDI umi ɣa teccem s idammen.” Uca kuř aryaz zi marra řgens yiwi-dd afunas nnes s ufus di ǧiřet uca ɣarṣen as dinni.
35 Uca Cawul ibna ijj n uɛalṭar i SIDI. Tuɣa-t d aɛalṭar amezwaru i issbedd i SIDI.
36 Xenni inna Cawul: “Ejj aneɣ ad nehwa ǧiřet-a, ad neḍfar Ifilisṭiniyyen u ad ten nkecceḍ ař tuffut n ṣṣbeḥ, war zzaysen nᵉttejji uřa d ijjen ad iddar ɛad.” Nnan nitni “Egg marra min tᵉttwařid nican di tiṭṭawin nnec.” Maca akehhan inna: “Jjem aneɣ ad dd-nqarreb ɣar AREBBI.”
37 Xenni isseqsa Cawul AREBBI “Ma ad hwiɣ, ad ḍfareɣ Ifilisṭiniyyen? Ma ad ten tegged deg ufus n Israil?” Maca SIDI war xas dd-yarri deg wass nni.
38 Xas uca inna Cawul: “Asem-dd da, marra imḍebbaren n řgens, snem u xzarem, min di iǧa ddnub-a i ittwaggen ass-a.
39 Minzi s tidett am iddar SIDI wenni ifekken Israil, waxxa tuɣa-t d mmi Yunatan, netta ad immet nican.” Maca uřa d ijj zi řgens war dd-yarri ca.
40 Inna ɛawed i marra ayt n Israil: “Ittxeṣṣa ad tbeddem ɣar ijj n uɣezdis, necc d mmi Yunatan ad nbedd ɣar uɣezdis nneɣni.” Řgens yarra-dd x Cawul: “Egg min tᵉttwařid cek mliḥ di tiṭṭawin nnec.”
41 Xas uca issiweř Cawul ak-d SIDI, AREBBI n Israil “Arr-dd xaneɣ maḥend ad t nessen nican!” Xenni ittwaṭṭef Yunatan d Cawul uca řgens iffeɣ d amezdag.
42 Cawul inna: “Nḍarem taqedduḥt jar ayi necc d mmi Yunatan!” Xenni ittwaṭṭef Yunatan.
43 Inna Cawul i Yunatan: “Ini ayi, min teggid cek!” Yunatan iḥaja as t, inna: “Necc qqaseɣ mɣir cwayt n tamment s uneggaru n uẓeǧaḍ nni iǧan deg ufus inu. Aqa ayi da, ma ittxeṣṣa ayi ad mmteɣ?”
44 Xenni inna Cawul: “Ejj ad ayi igg AREBBI ta d ta u ad dayes yarni ɛad, mařa war cek neqqeɣ minzi cek, Yunatan, ittxeṣṣa ac ad temmted nican.”
45 Maca řgens inna i Cawul: “Ma ittxeṣṣa ad immet Yunatan, wenni iwyen asenjem-a ameqqran i Israil? War xas nessiweř! S tidett am iddar SIDI, aya war ittiři, war zzayes iweṭṭa uřa d ict n uẓeṭṭu n ucuwwaf n uzeǧif nnes ɣar temmurt, minzi netta igga i-t ass-a ak-d AREBBI.” Ammu i ifekk řgens i Yunatan uca tuɣa war ittxeṣṣi ad immut.
46 Cawul ismeḥ deg weḍfar n Ifilisṭiniyyen uca Ifilisṭiniyyen ɛeqben ɣar imucan n tzeddiɣt nsen.
47 Uca Cawul iṭṭef tagelda x Israil, immneɣ ak-d marra řɛedyan nnes i d as dd-innḍen: ak-d Mu’ab, ak-d ayt n Ɛammun, ak-d Idum, ak-d ijeǧiden n Ṣuba u ak-d Ifilisṭiniyyen. Mani ma yarra s uzeǧif, yiwi-dd aɣelleb.
48 Netta igga s teryast, iɣřeb x ayt n Ɛamaliq u ifekk Israil zeg ufus n yinni t ikeccḍen.
49 Arrawen n Cawul tuɣa aten d Yunatan d Yicwi d Malkicuɛa. Ismawen n tnayen n yessis d Mirab, tenni d tamenzut, u isem n tmaẓuẓt aqa d Mixal.
50 Tamɣart n Cawul qqaren as Axinuɛam, yeǧis n Aximaɛaṣ. Uca isem n ukumandar n řɛeskar nnes, aqa d Abnir, mmis n Nir, ɛemmis n Cawul.
51 Qic, wenni d babas n Cawul, u Nir, wenni d babas n Abnir, tuɣa aten d iḥenjiren n Abiyil.
52 Tuɣa din ijj n umenɣi iwɛar ak-d Ifilisṭiniyyen marra ussan min ikka iddar Cawul. Kuř ijj n weryaz bu-teɣruḍt d kuř ijj n mmis n umenɣi i iẓra Cawul, iksi i-t ɣares.