13
Řmuɛṣiyyet n Cawul
1 Tuɣa ɣar Cawul ɛicrin n iseggʷusa umi idweř d ajeǧid. Netta iḥkem arebɛin n iseggʷusa x Israil.
2 Cawul ifarz teřt-ařaf n yeryazen zi Israil. Ařfayen zzaysen tuɣa aten ɣar Cawul di Mixmas u x idurar n Bayt-Il, u ařef zzaysen tuɣa aten ɣar Yunatan di Jibɛa di temmurt n Binyamin. Min iqqimen zi řgens yarxu as ijj ijj ad yuyur ɣar uqiḍun nnes.
3 Yunatan iɣřeb x tecbart n řɛeskar n Ifilisṭiniyyen di Jibɛa, uca sřan xas Ifilisṭiniyyen. Xenni igga Cawul ad suḍen deg uyicc n icarri di marra tammurt, inna: “Ejj Iɛibraniyyen ad t sřen!”
4 Marra Israil isřa abarreḥ-a: “Cawul iɣřeb x ict n tecbart n řɛeskar n Ifilisṭiniyyen u s man aya issarzeg Israil ixef nnes ɣar Ifilisṭiniyyen.” Ittwařaɣa řgens maḥend ad uyuren awarni i Cawul ɣar Jiljal.
5 Ifilisṭiniyyen ssmunen i umenɣi ak-d Israil. Nitni tuɣa ɣarsen teřt-ařaf n ikarruten d setta-ařaf n imnayen, uca řgens n řɛeskar tuɣa deg waṭṭas am yijdi ɣar tma n řebḥar. Nitni geɛɛden u wtin iqiḍan nsen ɣar Mixmas, ɣar ccarq n Bayt-Awin.
6 Kuř aryaz di Israil tuɣa ittwařa aqa nitni di řeḥṣaret, minzi uẓẓřen x řgens. Uca innufar řgens deg ifran u deg ifeǧaqen n teṣḍart u di tṣuḍar u deg imucan n tnuffra u deg wanuten.
7 Ẓwan Iɛibraniyyen L’Urdun ɣar temmurt n Jad d Jilɛad. Tuɣa Cawul s yixef nnes ɛad di Jiljal u marra řgens tuɣa ittarjiji awarni as.
8 Netta iraja di Jiljal sebɛa n wussan ař řweqt i igga Camwil. Maca umi Camwil war dd-yusi, aqa ibezzeɛ řgens ixef nnes, uyuren xas.
9 Řexdenni inna Cawul: “Awyem ayi-dd da ict n tɣarṣt n wecmaḍ d tɣarṣa n řehna!” Xenni issgeɛɛed taɣarṣt n wecmaḍ.
10 Umi ikemmeř s tewhibt n tɣarṣt n wecmaḍ, imsar, aqa yusa-dd Camwil. Cawul iffeɣ ad t iřqa, ḥima ad as ibarek.
11 Xenni inna Camwil: “Min teggid cek?” Inna Cawul: “Minzi necc ẓriɣ, aqa řgens yuyur ayi u cek war dd-tusid ɛad deg wussan ittwaggen uca Ifilisṭiniyyen nnjarwen ɣar Mixmas,
12 nniɣ necc: ‘Řexxu ad ɣari dd-hwan Ifilisṭiniyyen u necc war zawgeɣ ɛad zzat i wudem n SIDI!’. X uya uciɣ aqa din aɣiř xafi, ḥima ad ssgeɛɛdeɣ ict n tɣarṣt n wecmaḍ.”
13 Camwil yarra-dd x Cawul: “Cek teggid tubbuheřya. War teḥḍid ca tawṣeyyet n SIDI, AREBBI nnec, tenni d ac yumur, minzi xenni iři aqa SIDI icedd řexxu tagelda nnec x Israil i řebda.
14 Řexxu maca tagelda nnec war tᵉttɣimi ca. SIDI ifarz i Yixef nnes ijj n weryaz x wuř nnes u SIDI yumur as ad yiři d řḥakem x řgens nnes, maɣar cek war teḥḍid ca min i d ac yumur SIDI.”
15 Ikkar Camwil, igeɛɛed zi Jiljal ɣar Jibɛa di Binyamin uca Cawul isedd řgens i tuɣa ɣares iǧan, ca n setta-mya n yeryazen.
16 Cawul, mmis Yunatan d řgens i ɣarsen iǧan, qqimen di Jibɛa di temmurt n Binyamin. Uca Ifilisṭiniyyen wtin iqiḍan nsen di Mixmas.
17 Uca iffeɣ ubarru n iqṭaṭɛiyyen zi řmargeḥ n řɛeskar n Ifilisṭiniyyen di třata n bandiyyat Ict n bandiyya tarra azeǧif ɣar webrid n Ɛufra, ɣar temmurt n Cuɛal,
18 u bandiyya nneɣni tarra azeǧif ɣar webrid n Bayt-Ḥurun u bandiyya wiss třata tarra azeǧif ɣar webrid n weymir nni ixezzaren di teɣzurt n Ṣabuɛim, ɣar řexřa.
19 Di marra Israil war ittwif uřa d ijj n wemziř, minzi Ifilisṭiniyyen tuɣa nnan: “Ḥima Iɛibraniyyen war tteggen ssif niɣ lansa.”
20 X uya marra Israil iqqim ihekkwa ɣar Ifilisṭiniyyen, ḥima ad isseqḍeɛ kuř aryaz uzzař n wesɣar nnes, dduzan nnes, wuzzař n uzeddam nnes d wuzzař n tsiřit nnes.
21 Tuɣa ɣarsen izeynaten war iqḍiɛen ɣar wuzzař n isuɣar u ɣar dduzan u ɣar tazzarin s třata n icukḍan u ɣar isennanen ibedden n řmacam n iyenduzen.
22 Umi dd-yiweḍ wass n umenɣi war ittwif uřa d ijj n ssif uřa d ijj n uḥric di marra řgens nni tuɣa iǧan ɣar Cawul d Yunatan, aqa ttwafen mɣir ɣar Cawul d Yunatan.
23 Ict n terbiɛt n iɛessasen n řeskar n Ifilisṭiniyyen iffeɣ ɣar webrid n uẓekkwu x idurar n Mixmas.