7
Acemmiɛ n Arebbi iddaren
1 Awarni man aya ẓriɣ arebɛa n lmalakat beddent ɣar arebɛa n tɣemmura n temmurt, ṭṭfent arebɛa n isemmiḍen n temmurt, ḥima war ittsuḍi usemmiḍ řa x řbarr řa x waman uřa x ca n tcejjart.
2 Uca ẓriɣ ijj n lmalak nneɣni yuři-dd manis d tneqqar tfuct, aqa ɣares acemmiɛ n AREBBI iddaren uca iřaɣa s jjehd i arebɛa n lmalakat nni umi temmewc tzemmar ḥima ad ssexsarent tammurt d řebḥar,
3 iqqar: “War ttsexsarem tammurt uřa d řebḥar uřa d ticejjura ař ɣa negg acemmiɛ x tenyarin n imsexxaren n AREBBI nneɣ.”
4 Uca sřiɣ řqedd n yinni ittwacemmɛen, mya u-arebɛa u-rebɛin-ařef aqa ttwacemmɛen zi marra tiqebbař n Israil:
5 tenɛac-ařef zi teqbič n Yahuda,
tenɛac-ařef zi teqbič n Rubin,
tenɛac-ařef zi teqbič n Jad,
6 tenɛac-ařef zi teqbič n Acir,
tenɛac-ařef zi teqbič n Naftali,
tenɛac-ařef zi teqbič n Manassa,
7 tenɛac-ařef zi teqbič n Cimɛun,
tenɛac-ařef zi teqbič n Issakar,
tenɛac-ařef zi teqbič n Lawi,
8 tenɛac-ařef zi teqbič n Zibulun,
tenɛac-ařef zi teqbič n Yusuf,
tenɛac-ařef zi teqbič n Binyamin.
Řɣaci ameqqran zi řegnus
9 Awarni man aya aqa ẓriɣ ijj n ubarru n řɣaci ameqqran i war izemmar uřa d ijj ad t iḥseb, zi kuř řgens d teqbič u zi marra ccuɛub d iřsawen. Nitni bedden zzat i řɛarc d yezmar, arḍen řeɛbayat tizirarin d ticemřařin, uca ɣarsen tiseḍwin n tini deg ifassen nsen,
10 ttřaɣan s jjehd:
“Asenjem aqa s AREBBI nneɣ,
wenni iqqimen x řɛarc
u s Yezmar.”
11 Uca marra lmalakat tuɣa beddent nnḍent i řɛarc ak-d imɣaren d arebɛa n imuddaren, wḍan ɣar temmurt s wudmawen nsen qibač i řɛarc,
12 qqaren
“Amin!
Aɛuǧi d lbaraka
d tiɣit d uqadi
d ccan d ṣṣulṭa d jjehd
aqa-ten i AREBBI nneɣ
i řebda qaɛ.
Amin!”
13 Iṭṭef ijjen zeg imɣaren nni deg wawař, inna ayi: “Min ɛnan ina, inni yarḍen řeɛbayat ticemřařin, min ɛnan u manis dd-usin?”
14 Necc nniɣ as: “A sidi, cek i issnen.” Inna ayi: “Ina aqa usin-dd zi řmeḥnet tameqqrant. Aqa nitni sizdigen řeɛbayat nsen uca arrin tent d ticemřařin deg Idammen n Izmar.
15 S uyenni bedden nitni zzat i řɛarc n AREBBI uca sexxaren as ass d ǧiřet di Zzawect Tameqqrant, uca wenni iqqimen x řɛarc ad xasen iwwet Aqiḍun nnes.
16 War iqqim ɛad ad ǧaẓen niɣ ad ffaden, war ten tᵉttqeddi uřa d tafuct uřa d ict n jjurret n řeḥmu,
17 minzi Izmar nni iǧan di řwesṭ n řɛarc ad ten yarwes, ad ten indeh ɣar Tudart u ɣar tařawin n waman, uca Netta ad asen imseḥ kuř ameṭṭa zi tiṭṭawin nsen.”