6
Sebɛa n icemmiɛen
1 Uca ẓriɣ umi Izmar ifsi ijjen zi sebɛa n icemmiɛen, uca sřiɣ i yijjen zi arebɛa n imuddaren iqqar s tmijja am wajjaj: “As-dd, xzar!”
2 Xenni sřiɣ u ẓriɣ, u xzar ijj n uyis d acemřař, d wenni xas inyin ɣares ijj n řqewṣ n fřitca uca immewc as ijj n ttaj uca iffeɣ-dd, iɣřeb, ittɣellab, u maḥend ad iɣřeb.
3 Ařami yarzem acemmiɛ wiss tnayen, sřiɣ i umuddar wiss tnayen, iqqar: “As-dd!”
4 Uca iffeɣ-dd ijj n uyis d azeggʷaɣ, uca wenni xas inyin, ggin t ḥima ad ikkes řehna x temmurt, ḥima ad kkaren iwdan ad ɣarṣen i wayawya uca immewc as ijj n ssif imɣar.
5 Ařami yarzem acemmiɛ wiss třata, sřiɣ i umuddar wiss třata iqqar: “As-dd!” Xzar, ijj n uyis d abarcan, d wenni xas inyin ɣares ijj n řmizan deg ifassen nnes.
6 Zi řwesṭ n imuddaren sřiɣ i yict n tmijja teqqar: “Ijj n řmud n yirden s yijj n dinar u třata n řemdud n imendi s yijj n dinar, u zzect d binu war ten ttḍiyyiɛem ca!”
7 Ařami yarzem acemmiɛ wiss arebɛa, sřiɣ i tmijja n umuddar wiss arebɛa teqqar: “As-dd!”
8 Uca ẓriɣ ijj n uyis d asnabi, d wenni xas inyin, qqaren as ‘Řmewt’, uca teḍfar i-t řaxart. Temmewc as ṣṣulṭa x ijj n arbeɛ n temmurt ḥima ad nɣen s ssif, s řaẓ, s řmewt u s řewḥuc n temmurt.
9 Ařami yarzem acemmiɛ wiss xemsa, ẓriɣ sadu uɛalṭar řeɛmur n yinni ittwanɣen di ṭṭweɛ n Wawař n AREBBI u di ṭṭweɛ n cchadet n Yasuɛ i tuɣa ɣarsen.
10 Nitni řaɣan s jjehd, nnan: “A SIDI, a Amqeddas d Bab n tidett, mecḥař i ɣa teqqimed war tḥekkmed, war tᵉttneqmed ca i idammen nneɣ zeg inni izeddɣen di temmurt?”
11 Uca wcin i kuř ijjen zzaysen řeɛbayat d ticemřařin, u ittwanna asen belli ad areyyḥen drus n řweqt ař ɣa ikemmeř lɛadad n imsexxaren imɛacaren nsen d wawmaten nsen, inni i ɣa ittwanɣen ɛawed am nitni.
12 Uca ẓriɣ ařami yarzem acemmiɛ wiss setta, aqa imsar ijj n wenhezzi n temmurt d ameqqran u tafuct tedweř d tabarcant amecnaw ict n txancet n wecḍan uca taziri tmun tegga amecnaw idammen,
13 uca itran n ujenna wḍan-dd ɣar temmurt am wartu immenḍar iqurraɛ nnes xmi t-i-dd-iɣeṭṭeř ijj n usemmiḍ d ameqqran.
14 Ittwafeǧqen ijenwan uca ttwanḍen nitni am mammec nneḍen idlisen. Uca kuř adrar d marra tigzirin ttwakksen zeg imucan nsen.
15 Ijeǧiden n temmurt d imeqqranen d yinni d izeǧifen x wařef d aytbab n wagřa d yinni ɣar teǧa ṣṣulṭa d kuř ismeɣ d aḥurri, aqa nitni marra ssnuffaren ixef nsen deg ifran u jar řejruf n idurar,
16 nnan i idurar d řejruf: “Wḍam-dd xaneɣ, ffarem aneɣ zeg wudem n Izmar,
17 minzi ass ameqqran n weɣḍab nnes aqa yusa-dd, man wen izemmaren ad iqqim ibedd!”