Raɛut
1
1 Deg wussan i di qeṭṭan řquḍat řeḥkamat di temmurt, imsar ijj n řaẓ di temmurt. S uyenni iffeɣ ijj n weryaz zi Bayt-Laḥm di Yahudiyya ḥima ad izdeɣ d abarrani deg iyyaren n Mu’ab, netta d temɣart nnes d tnayen n iḥenjiren nnes akides.
2 Aryaz ttřaɣan as Alimalik, tamɣart nnes ttřaɣan as Naɛumi, d tnayen n iḥenjiren nnes ttřaɣan asen Maḥlun d Kilyun, nitni tuɣa aten d ayt n Ifrata zi Bayt-Laḥm di Yahudiyya. Nitni iwḍen ɣar iyyaren n Mu’ab, qqimen dinni.
3 Alimalik, aryaz n Naɛumi, immut. Teqqim nettat ak-d tnayen n warraw nnes.
4 Ina iwyen timɣarin n Mu’ab, isem n ict qqaren as Ɛurfa u isem n tenneɣni Raɛut, uca qqiment dinni řqedd n ɛřaḥař ɛecra n iseggʷusa.
5 U mmuten uřa d tnayen nni: Maḥlun d Kilyun. Teqqim temɣart weḥḥdes, břa tnayen n warraw nnes u břa aryaz nnes.
Aɛqab n Naɛumi ak-d Raɛut
6 Uca teɛdeř Naɛumi ixef nnes ak-d tesřatin nnes, ḥima ad dd-tedweř zeg iyyaren n Mu’ab, maɣar tuɣa tesřa aqa SIDI yarzef i řgens nnes uca iwca asen aɣrum.
7 S uyenni teffeɣ nettat ak-d tnayen n tesřatin nnes zeg wemcan mani tuɣa teqqim marra řweqt nni. Nitenti ruḥent deg webrid maḥend ad areggʷḥent ɣar temmurt n Yahudiyya.
8 Tenna Naɛumi i tnayen n tesřatin nnes: “Areggʷḥent-i-dd, dewřent-i-dd, kuř icten ɣar taddart n yemmas! SIDI ad akent iwc tamexsiwt nnes icewwaren, am mammec tt teggint deg imettan u dayi.
9 SIDI ad yejj ad tafent arraḥet, kuř icten di taddart n weryaz nnes!” Xenni tessudem i-tent uca nitenti ssgeɛɛdent tmijja nsent, sɣuyent,
10 nnant as: “Neccin ad dd-nedweř nican akidem ɣar řgens nnem!”
11 Naɛumi tenna: “Ɛeqbent-i-dd, a yessi! Mayemmi texsent akidi traḥent? Ma ɣari deg uɛeddis inu ɛad iḥenjiren nni izemmaren ad dewřen d iryazen i kennint?
12 Ɛeqbent-i-dd, a yessi inu! Ruḥent, minzi necc aqa wsareɣ maḥend ad ɣari yiři ɛad weryaz. Waxxa nniɣ: ‘Necc ɣari ɛad asitem!’, wah, iři ǧiřet-a ad iřiɣ i yijj n weryaz, wah, ad arweɣ iḥenjiren,
13 ma texsent ad trajant ař ɣa mɣaren, ma texsent ad tmenɛent ixef nkent maḥend ad tdewřent i yijj n weryaz? Lla, a yessi! Aqa ameddur inu iffeɣ d amerzag xakent aṭṭas, maɣar iffeɣ-dd ufus n SIDI ḍidd ayi.”
14 Xenni ssgeɛɛdent timijjawin nsent uca arnint ɛad deg iɣuyyan uca Ɛurfa tessudem lallas, maca Raɛut teqqim teřṣeq dayes.
15 Tenna: “Xzar, tanuṭ nnem aqa tedweř ɣar řgens nnes u ɣar irebbiten nnes. Dweř, teḍfared tanuṭ nnem!”
16 Raɛut tarra-dd xas: “War xafi ttziyyar ḥima ad dayem semḥeɣ uca ad dd-dewřeɣ awarni i weɛrur nnem, minzi mani ɣa tuyured cem, din i ɣa uyureɣ uřa d necc, u mani i ɣa tessensed cem, din i ɣa ssenseɣ uřa d necc, řgens nnem d řgens inu, d AREBBI nnem d AREBBI inu.
17 Mani i ɣa temmted, din i ɣa mmteɣ uřa d necc u din i ɣa ttwaneḍřeɣ uřa d necc. Ejj ad ayi igg SIDI ta d ta uca ad dayes yarni ɛad, minzi mɣir řmewt i d ayi ɣa ibḍan xam!”
18 Ařami teẓra Naɛumi belli nettat tegga x tecři, war teqqim tessawař ɛad akides.
19 Ammu i yuyurent s tnayen idsent ařami iwḍent ɣar Bayt-Laḥm. Umi iwḍent ɣar Baytlaḥm, imsar, aqa marra tandint tenneḥweř di ṭṭweɛ nsent uca nnant temɣarin: “Ma d ta d Naɛumi?”
20 Maca nettat tarra-dd xasen tenna: “War d ayi ttřaɣant ‘Naɛumi’ ssa d tsawent, maca řaɣant ayi: ‘Mara’, maɣar Amzemmar x kuřci igga dayi tarzugi d tameqqrant.
21 Ffɣeɣ ccureɣ maca SIDI ijja ayi ad dd-areggʷḥeɣ s ifassen xwan. Mayemmi d ayi ttřaɣant ɛad ‘Naɛumi’ umi xafi iched SIDI u Amzemmar x kuřci igga ayi min iǧan d aɛeffan?”
22 Ammu i tareggʷeḥ Naɛumi ak-d Raɛut, Tamu’abect, tasřift nnes nni dd-idewřen akides zeg iyyaren n Mu’ab. Iwḍent nitenti ɣar Baytl-Laḥm ɣar umezwaru n tmeyra n imendi.