21
Timɣarin i ayt n Binyamin
1 Iryazen n Israil tuɣa jjuǧen di Miṣfa uca nnan: “Uřa d ijj zzayneɣ war ittic yeǧis i ayt n Binyamin d tamɣart.”
2 Yusa-dd řgens ɣar Bayt-Il uca qqimen nitni dinni zzat i wudem n AREBBI ař tameddit. Nitni ssgeɛɛden tmijja nsen uca run s imeṭṭawen ittazzřen.
3 Nnan: “A SIDI, AREBBI n Israil, mayemmi imsar uya di Israil, aqa ass-a teqqim ict n teqbič n Israil war tbin?”
4 Tiwecca nnes, imsar, aqa řgens ikkar zic. Nitni bnan ijj n uɛalṭar, qeddmen xas tiɣarṣa n wecmaḍ d tɣarṣa n řehna.
5 Nnan ayt n Israil: “Wi iqqimen zi marra tiqebbař n Israil war dd-igeɛɛden ɣar wegraw n řgens n SIDI?” Tuɣa ggin ict n tjaǧit zi jjihet n wenni war i dd-igeɛɛden ɣar SIDI ɣar Miṣfa, nnan: “Ad ittwaneɣ nican!”
6 Xas uca nedmen ayt n Israil x umatsen Binyamin, nnan: “Ass-a tᵉttwaqess ict n teqbič zi Israil.
7 Mammec i ɣa negg di tmesřact n temɣarin i yeryazen n Binyamin nni iqqimen? Minzi neccin nejjuǧ ɣar SIDI war d asen nettic ca yessitneɣ d tamɣart.”
8 Nnan: “Ma war dd-igeɛɛed ca n yijjen zi tqebbař n Israil ɣar SIDI di Miṣfa?” Xzar, war dd-yusi uřa d ijjen zi Yabic di Jilɛad ɣar řmargeḥ n řɛeskar, ɣar wegraw n řgens,
9 minzi řgens ittwaḥseb, u xzar, zi Yabic di Jilɛad war din iǧi uřa d ijjen.
10 Xenni tessekk tmesmunt tenɛac-ařef n yeryazen zeg inni d ayt n umenɣi qaɛ uca umuren ten, nnan: “Gaɛɛdem, wtem imezdaɣ n Yabic di Jilɛad s řeqḍeɛ n ssif, uřa d timɣarin d iḥenjiren imeẓyanen.
11 Ammu i ittxeṣṣa ad teggem: marra min iǧan d awtem d marra timɣarin tinni tuɣa iṭṭṣen ak-d weryaz, ad ten tḥarrmem i uteḥḥi!”
12 Ufin jar imezdaɣ n Yabic di Jilɛad arebɛa-mya n tebřiɣin tinni d tiɛzariyyin, tinni tuɣa ɛad war ṭṭiṣent ak-d weryaz, uca iwyen tent ɣar řmargeḥ n řɛeskar di Cilu di temmurt n Kenɛan.
13 Xas uca tessekk tmesmunt tmun ireqqasen uca ssiwřen ak-d ayt n Binyamin i iǧan ɣar teṣḍart n Rimmun, barrḥen asen s řehna.
14 Di řweqt nni ɛeqben ayt n Binyamin uca wcin asen timɣarin tinni tuɣa jjin ddarent zi temɣarin n Yabic di Jilɛad. Maca tuɣa war ten ttqeddint ɛad.
15 Xenni tuɣa řgens izziǧez as Binyamin, maɣar SIDI tuɣa igga tazzit deg iseddiyyen n tqebbař n Israil.
16 Uca imeqqranen n tmesmunt nnan: “Mammec i ɣa negg di tmesřact n temɣarin i yeryazen n Binyamin nni iqqimen, minzi timɣarin ttwateḥḥant zi Binyamin.”
17 U nnan ɛawed: “Tasɣart n yinni yarewřen aqa-tt n Binyamin. Ittxeṣṣa war tmeḥḥi uřa d ict n teqbič zi Israil.
18 Maca neccin war nzemmar ad asen newc timɣarin zi yessitneɣ, maɣar ayt n Israil jjuǧen, nnan: “Wenni iwcin tamɣart i ayt n Binyamin ad ittwanɛeř.”
19 Xenni nnan nitni: “Xzar, zeg useggʷas ař aseggʷas aqa din Řɛid n SIDI di Cilu. Řɛid ittwagg sennej i Bayt-Il, ɣar ccarq n webrid ameqqran i ineddhen zi Bayt-Il ɣar Cakim, ɣar uɣezdis n ljanub n Lebuna.”
20 U nitni ɛeřmen i ayt n Binyamin, nnan: “Uyurem din uca wḍam u ḥḍam deg imarjaɛen n uḍiř.
21 Mařa xenni kenniw txezzarem u teẓrim xmi i dd ɣa ffɣent yessis n Cilu, ḥima ad ceḍḥent, ffɣem-dd xenni řexdenni zeg imarjaɛen n uḍiř uca ejj ad iṭṭef kuř aryaz tamɣart nnes zi yessis n Cilu, u awarni as uyurem ɣar temmurt n Binyamin!
22 Mařa xenni babatsent niɣ aytmatsent usin-dd ḥima ad xaneɣ cetcan, ad asen nini: ‘Samḥem aneɣ, jjem ten, minzi deg umenɣi ak-d Yabic war nzemmar ad nawi i kuř aryaz tamɣart, u ɛawed kenniw war d asen tent tewcim, niɣ iři řexxu ad daywem yiři d amarwas.’ ”
23 Uca ammu i ggin ayt n Binyamin. Zi teɛzaryin iceṭṭḥen s nnubtat tinni iṭṭfen, ksin nitni timɣarin ɛlaḥsab řqedd nsen uca ffɣen, ɛeqben ɣar tesɣart nsen uca ssbedden tineddam nsen, ggin zeddɣen daysent.
24 Di řweqt nni ffɣen-dd ssenni uřa d ayt n Israil, kuř ijj yuyur ɣar teqbič nnes u ɣar řaǧ nnes. Ffɣen ssenni, kuř ijjen yuyur ɣar tesɣart nnes.
25 Deg wussan nni war tuɣi din ajeǧid di Israil. Kuř ijj ittegg min iǧan nican di tiṭṭawin nnes.