20
Aɣelleb n Yahucafaṭ x Mu’ab d Ɛammun
1 Awarni uya imsar, aqa ayt n Mu’ab d ayt n Ɛammun, d inneɣni akidsen zeg Imaɛuniyyen usin-dd maḥend ad mmenɣen ak-d Yahucafaṭ.
2 Usin-dd ireqqasen, ɛawden i Yahucafaṭ, nnan: “Aqa aṭṭas n řɣaci usin-dd ḥima ad kidek mmenɣen zeg ujemmaḍin n řebḥar, zi Aram. Xzar, nitni di Ḥaṣṣun-Tamar, ixs ad yini Ɛayn-Jadi.”
3 Yahucafaṭ iggʷed uca inḍar tiṭṭawin nnes ɣar SIDI. Netta ijja ad barrḥen s uẓummi di marra Yahuda.
4 Ssmunen ayt n Yahuda maḥend ad arzun twiza n SIDI. Nitni usin-dd uřa zi marra tineddam n Yahuda, ḥima ad arzun x SIDI.
5 Ibedd Yahucafaṭ deg wegraw n řgens n Yahuda d Urcalim, di Taddart n SIDI, zzat i řemraḥ n jdid, inna:
6 “A SIDI, AREBBI n řejdud nneɣ, ma Cek war teǧid ca d AREBBI n ijenwan d Řḥakem x marra tigeldiwin n řegnus? Deg ufus nnec immars jjehd d tzemmar, ařami war izemmar uřa d ijj ad iqqim ibedd zzatek.
7 A, AREBBI nneɣ, ma war tuẓẓiřed ca x imezdaɣ n temmurt-a zzat i wudem n řgens nnec Israil uca tewcid tammurt i řebda i zzariɛet n Ibrahim, ameddukkeř nnec iɛizzen?
8 Nitni qqimen zeddɣen dayes uca bnan dayes ict n Zzawect Iqeddsen i Cek, i Yisem nnec, uca nnan:
9 ‘Mařa iřqef aneɣ ca n řɣar, axmi ssif n řeḥkam niɣ ṭṭaɛun niɣ řaẓ, xenni ad nbedd zzat i Taddart-a u zzat i wudem nnec, maɣar Isem nnec aqa-t di Taddart-a. Ad xak dd-nřaɣa zi řeḥṣaret nneɣ uca xenni Cek ad ɣarneɣ tesřed u ad aneɣ tessnejmed.
10 Uca řexxu, xzar, ayt n Ɛammun d ayt n Mu’ab d yinni zeg idurar n Saɛir - inni i umi war tejjid ca ayt n Israil ad ɣarsen dd-adfen ɣar temmurt nsen, umi dd-usin zi temmurt n Miṣra, minzi kkin asen-dd zeg webrid nneɣni u war ten areddǧen,
11 xzarem, nitni xsen ad aneɣ xeǧṣen uca usin-dd ḥima ad aneɣ ssuffɣen zi tesɣart nnec i d aneɣ tewcid d řwart.
12 A, AREBBI nneɣ, ma Cek war xasen tḥekkmed ca? Maɣar neccin war xasen nzemmar x řɣaci-ya ameqqran wanita i ɣarneɣ dd-iffɣen u war nessin min ɣa negg, maca aqa narra-dd tiṭṭawin nneɣ ɣarek.”
13 Marra ayt n Yahuda bedden zzat i wudem n SIDI, uřa d iḥenjiren imeẓyanin nsen d temɣarin nsen d iḥenjiren nsen.
14 Uca ihwa-dd Arruḥ n SIDI din di řwest n wegraw n řgens x Yaḥziyil, mmis n Zakariyya, mmis n Banaya, mmis n Yaɛiyil, mmis n Ulawi Mattanya, zeg iḥenjiren n Asaf.
15 Netta inna: “Sřem-dd ɣari, marra ayt n Yahuda uřa d kenniw, imezdaɣ n Urcalim, u cek, a, ajeǧid Yahucafaṭ! Ammu i d awem iqqar SIDI: ‘War tteggʷdem ca, war ttnexřiɛem ca zi řɣaci-ya ameqqran wanita, minzi amenɣi war iǧi s ufus nneɣ, maca s ufus n AREBBI.
16 Hwam ɣarsen tiwecca. Xzar, nitni ad geɛɛden zi tsawent n Ṣiṣ, u kenniw ad xasen txeccem ɣar uneggar n teɣzurt zzat i řexřa n Yaruwil.
17 Kenniw maca war tᵉttmenɣim ca. Kkarem, qqimem tbeddem u xzarem, asenjem n SIDI ad yiři akidwem, a Yahuda d Urcalim! War tteggʷdem ca u war ttnexřiɛem. Tiwecca ffɣem i umsagar akidsen, minzi SIDI aqa-t akidwem.’ ”
18 Xenni yuḍar Yahucafaṭ s uɣembub nnes ɣar temmurt, u marra ayt n Yahuda d marra imezdaɣ n Urcalim wḍan x temmurt zzat i wudem n SIDI ḥima ad bendqen i SIDI.
19 Kkaren Ilawiyyen zeg ayt n Quhat u zeg ayt n Quraḥ ḥima ad ssɛuǧan SIDI, AREBBI n Israil, s ict n tmijja tejhed aṭṭas.
20 Tiwecca zic kkaren uca ffɣen ɣar řexřa n Taquɛa. Ɣar wuffuɣ nsen ibedd-dd Yahucafaṭ din, inna: “Sřem-dd ɣari, a Yahuda, d kenniw, imezdaɣ n Urcalim. Amnem di SIDI, AREBBI nwem, xenni ad tiřim di řaman. Amnem zi inabiyyen, xenni ad tfeřḥem.”
21 Netta imcawar ak-d řgens uca issbedd imedyazen zzat i SIDI d yinni d as i ɣa iṣebbḥen acewwaḍ n Umqeddas, am ɣa yuyuren zzat i wudem n yeryazen i iḥezzmen s řesnaḥ, ad inin: “Qadam SIDI, maɣar tamexsiwt nnes icewwaren tᵉttɣima i řebda!”
22 Di řweqt řami bdan nitni s usřiwřew d uṣebbeḥ, igga SIDI řefxux x ayt n Ɛammun d Mu’ab u x yenni i tuɣa dd-iffɣen ḍidd i Yahuda zeg idurar n Saɛir, uca ttwaɣellben nitni.
23 Ayt n Ɛammun d ayt n Mu’ab kkaren x imezdaɣ n idurar n Saɛir, ḥima ad ten sshellken u ad ten areddǧen. Umi qḍan nitni x imezdaɣ n Saɛir, sshellken ijj wenneɣni.
24 Umi dd-yiwiḍ Yahuda ɣar ṣṣumɛet n uḥeṭṭu di řexřa, nḍaren tamuɣři nsen awani asen x řɣaci, u xzar, ẓrin mɣir řxecbat tuɣa wḍant x temmurt, uřa d ijj war injim.
25 Yahucafaṭ d řgens nnes usin-dd ḥima ad ṭṭfen takeccaḍt nsen uca ufin ɣarsen aṭṭas n sseřɛet d řxecbat d řeqcuɛ iɣřan uca kksen ɛřam kuř zzayes i yixef nsen, ařami war zemmaren ad t arbun. Ttkeccaḍen třata n wussan, maɣar tuɣa din aṭṭas.
26 Deg wass wiss arebɛa munen nitni di řewḍa n Teɣzurt n Lbaraka, minzi din barken SIDI. X uya ggin as i wemcan nni: taɣzurt n Lbaraka, ɣar i řexxu.
27 Awarni uya dewřen-dd marra iryazen n Yahuda d Urcalim. Yuyur Yahucafaṭ ɣar zzat, ḥima ad ɛeqben ɣar Urcalim ccuren s řefraḥet, maɣar SIDI tuɣa issfarḥ i-ten x řɛedyan nsen.
28 Am ttiraren s lharpat d řgambriyat d řebwaq usin-dd ɣar Urcalim, ɣar Taddart n SIDI.
29 Tuɣa tiggʷudi n AREBBI teřqef marra tigeldiwin n temmura umi sřint, aqa SIDI immneɣ ak-d řɛedyan n Israil.
30 Tufa tgeldit n Yahucafaṭ řhudnet uca AREBBI nnes iwca as řehna zi marra iɣezdisen.
Řeḥkamet n ujeǧid Yahucafat
31 Ammu i iḥkem Yahucafaṭ x Yahuda. Tuɣa ɣares xemsa u-třatin n iseggʷusa, umi idweř d ajeǧid. Netta iḥkem xemsa u-ɛicrin n iseggʷusa di Urcalim. Yemmas qqaren as Ɛazuba, yeǧis n Cilḥi.
32 Netta iḍfar ibriden n babas Asa, war xasen iḥeyyed ca u netta igga min iǧan nican di tiṭṭawin n SIDI.
33 Mɣir řegɛudi war ttwakksent, maɣar řgens war tuɣi ɛad yarra uř nnes ɣar AREBBI n řejdud nsen.
34 Min iqqimen n imezruyen n Yahucafaṭ, imezwura d ineggura, xzar, aqa man aya marra ittwazemmem deg wedlis n imezruyen n Yahu, mmis n Ḥanani, inni igga ad ttwazemmemen deg wedlis n ijeǧiden n Israil.
35 Awarni uya igga Yahucafaṭ ijj n řɛahd ak-d Axazya, ajeǧid n Israil, wenni iggin tuɛeffna aṭṭas di marra min tuɣa igga.
36 Netta iqqen akides ijj n řɛahd, ḥima ad ggen iɣarruba nni i ɣa ineddhen ɣar Tarcic. Nitni bnan iɣarruba nni di Ɛiṣyun-Jabar.
37 Maca Aliɛazar, mmis n Dudawahu zi Marica, ittnebba x Yahucafaṭ, inna: “Minzi teqqned ijj n řɛahd ak-d Axaziya, aqa SIDI yarẓa řexdayem nnec.” Ammu imsar aqa ttwarẓen iɣarruba ařami war zemmaren ad nedhen ɣar Tarcic.