19
Yahucafaṭ d umwařaw
1 Iɛqeb-dd Yahucafaṭ, ajeǧid n Yahuda, ɣar taddart nnes di Urcalim di řehna.
2 Yahu, mmis n Ḥanani, amwařaw, iffeɣ-dd ɣares ḥima ad t iřqa, inna i ujeǧid Yahucafaṭ: “Ma cek teggid twiza i uɛeffan u ad texsed inni iɛiffen SIDI? Ammu i xak dd-yusa uduqqez n weɣḍab zi zzat n wudem n SIDI.
3 Waxxa amenni ittwaf dayek min iṣebḥen, maɣar tekksed tirebbin n cwarti zi temmurt uca tesswejded uř nnec i tarezzut x AREBBI.”
4 Yahucafaṭ iqqim izeddeɣ di Urcalim uca iffeɣ ɛawed jar řgens, zi Bi’r-Sebɛa ɣar idurar n Ifrayim, uca yarra i-ten ad dd-dewřen ɣar SIDI, AREBBI n řejdud nsen.
5 Netta yařeqqem řquḍat di temmurt, di marra tineddam ifaryen n Yahuda, zi tendint ař tandint.
6 Netta inna i řquḍat: “Xzarem min ɣa teggem, maɣar war tḥekkmem i iwdan, maca i SIDI u Netta aqa iḥḍar akidwem deg weḥkam.
7 Xenni řexxu, ad xawem tiři tiggʷudi n SIDI. Ḥḍam u ggem t, maɣar ɣar SIDI, AREBBI nneɣ, war iǧi řɣecc, Netta war ittegg s wudmawen u war ikessi tirzifin.”
8 Umi dd-ɛeqben ɣar Urcalim, igga Yahucafaṭ di Urcalim ɛawed ca n Ilawiyyen d ikehhanen d izeǧifen n tudrin n ibabaten n Israil i udebbar n řeḥkam n SIDI u i ddɛawi.
9 Netta yumur i-ten, inna: “Ggem s tiggʷudi n SIDI, s řaman u s yijj n wuř nican imun.
10 Ɣar kuř ddeɛwet i d awem i d ɣa yawyen aytmatwem nni izeddɣen di tneddam nsen, jar idammen d idammen u jar Ccariɛa d řumur d tweṣṣa d lfarayiḍ, ittxeṣṣa ad asen tɛeřmem, maḥend war xawem ssarebbun ddenb zzat i SIDI, ařami xawem dd ɣa iwḍa uduqqez d ameqqran n weɣḍab u x aytmatwem. Ggem amenni, ařami war tᵉssarebbum ddenb x yixef nwem.
11 Xzarem, Amarya d akehhan ameqqran i xawem iǧan di marra ddeɛwet n SIDI, u Zabadya, mmis n Ismaɛil, řḥakem x taddart n Yahuda, aqa-t x kuř ddeɛwet n ujeǧid. Uřa d imeḥḍayen, Ilawiyyen, aqa aten din zzat i wudem nwem. Iřim d iryazen u ggem t, uca SIDI ad yiři ak-d wenni iṣeřḥen.”