5
1 Arrawen n Rubin, amenzu n Israil - minzi netta tuɣa-t d amenzu, maca umi netta issexsar tassut n babas, temmewc tasɣart n tmenzut nnes i warrawen n Yusuf, mmis n Israil, maca war iǧi amenni ařami Yusuf ittwazemmem di lista n jjadira ɛlaḥsab tasɣart n tmenzut nnes,
2 maɣar Yahuda idweř d bu-teɣruḍt jar aytmas u zzayes iffeɣ řḥakem waxxa tasɣart n tmenzut tuɣa-tt ɣar Yusuf -
3 arrawen n Rubin, amenzu n Israil, tuɣa aten d Ḥanuk d Fallu, Ḥaṣrun d Karmi.
4 Arrawen n Yuwil: mmis Camɛiya, mmis Hajuj mmis Cimɛi,
5 mmis Mixa, mmis Ra’aya, mmis Baɛl
6 d mmis Ba’ira, wenni yiwyi Tiɣlat-Filasir, ajeǧid n Accur, di lmenfa. Netta tuɣa d řḥakem n Irubiniyyen.
7 Aytmas, ttwasettfen ɛlaḥsab řaǧat nsen, umi nitni ttwazemmemen di lista n jjadira ɛlaḥsab axřaq nsen, tuɣa aten d azeǧif Yaɛiyil d Zakariyya
8 d Bilaɛ, mmis n Asa, mmis n Camɛi, mmis n Yuwil. Netta tuɣa izeddeɣ di Ɛaruɛir ař Nabu d Baɛl-Maɛun.
9 Izdeɣ di ccarq ař wadaf ɣar řexřa i isswiẓẓḍen ixef nnes zeg iɣzar n Lfuraṭ, maɣar řebhayem nsen dewřen s waṭṭas di temmurt n Jilɛad.
10 Deg wussan n Cawul ggin nitni amenɣi ak-d Ihajriyyen, inni iwḍan s ufus nsen. Nitni ggin ad zedɣen deg iqiḍan nsen x marra aɣezdis ɣar ccarq n Jilɛad.
11 Arrawen n Jad tuɣa zeddɣen ajemmaḍin nsen di temmurt n Bacan ař Salxa.
12 Yuwil tuɣa-t d azeǧif nsen u Cafam tuɣa-t d wiss tnayen, d Yaɛnay d Cafat. Nitni tuɣa zeddɣen di Bacan.
13 Aytmatsen, ttwasettfen ɛlaḥsab tudrin n ibabaten nsen, tuɣa aten d Mixayil d Macullam d Cabɛa d Yuray d Yaɛkan d Ziɛa d Ɛabir, sebɛa n wawmaten.
14 Ina tuɣa aten d arrawen n Abiḥayil, mmis n Ḥuri, mmis n Yaruḥ, mmis n Jilɛad, mmis n Mixayil, mmis n Yacicay, mmis n Yahdu, mmis n Buz.
15 Axi, mmis n Ɛabdiyil, mmis n Juni, tuɣa-t d azeǧif n taddart n ibabaten nsen.
16 Nitni tuɣa zeddɣen di Jilɛad, di Bacan u di tneddam i ɣares dd-iqqnen u di marra ddmani n tarewsa n Carun ař timawwin nsen.
17 Marra ina ttwazemmemen di listat n jjadira deg wussan n Yutam, ajeǧid n Yahuda, u deg wussan n Yarubɛam, ajeǧid n Israil.
18 Zeg warrawen n Rubin d warrawen n Jad d wezyen n teqbič n Manassa, zeg ayt n umenɣi, zeg iryazen inni yarebbun taseddart n uɛeskari d ssif d yinni imeḥḍen řqews u tuɣa darrben deg umenɣi, aqa din arebɛa u-rebɛin-ařef u-sebɛa-mya u-settin inni dd-iffɣen ak-d řɛeskar.
19 Nitni mmenɣen ak-d Ihajriyyen u ak-d Yaṭur d Nafic d Nudab.
20 Nitni ttwaɛawnen deg umenɣi akidsen uca Ihajriyyen d marra inni akidsen iǧan, mmewcen deg ufus nsen, maɣar nitni sɣuyen deg umenɣi ɣar AREBBI u wanita ijja ad issarḍa ixef nnes s tẓaǧit yuǧɣen nsen, minzi nitni tecřen xas.
21 Nitni ḥewwsen řmař nsen: xemsin-ařef n iřeɣman nsen, mitayen u-xemsin-ařef n wuǧi u ařfayen n yeɣyař u myat-ařef n iwdan.
22 Minzi tuɣa din aṭṭas n yinni ittwanɣen, maɣar tuɣa-t d ijj n umenɣi n AREBBI. Nitni ggin ad din zedɣen deg wemcan nsen ař lmenfa.
23 Arrawen n wezyen n teqbič n Manassa zedɣen di temmurt nni. Nitni mmarnin zi Bacan ař Baɛl-Ḥirmun d Sanir d wedrar n Ḥarmun.
24 Ina tuɣa aten d izeǧifen n tudrin n ibabaten nsen: Ɛifar d Yicɛi d Iliyil d Ɛazriyil d Irmiya d Hudaya d Yaḥdiyil. Nitni tuɣa aten d ayt n bu-teɣruḍt, iryazen imeḥḍen, iryazen n yisem, izeǧifen n tudrin n ibabaten nsen.
25 Nitni ɣdaren AREBBI n řejdud nsen u ssfesden ixef nsen s irebbiten n řegnus n temmurt, inni tuɣa iteḥḥa AREBBI zzat i wudem nsen.
26 Xenni issekkar AREBBI n Israil buḥbeř n Ful, ajeǧid n Accur, d buḥbeř n Tiɣlat-Filnasir, ajeǧid n Accur, u wanita indeh i-ten ɣar lmenfa: ayt n Rubin d ayt n Jad d wezyen n teqbič n Manassa. Netta yiwyi ten ɣar Ḥalaḥ d Xabur d Haran u ɣar iɣzar n Juzan, u nitni qqimen dinni ař ass-a.
Zi Lawi ař akehhan ameqqran Harun d tarwa nnes
27 Arrawen n Lawi tuɣa aten d Jarcun, Qahat d Marari.
28 Arrawen n Qahat tuɣa aten d Ɛamram, Yiṣhar d Ḥabrun d Ɛuzziyil.
29 Arrawen n Ɛamram tuɣa aten d Harun d Musa, u Maryam učmatsen.
Arrawen n Harun tuɣa aten d Nadab d Abihu, Aliɛazar d Itamar.
30 Aliɛazar ijja-dd Finaḥas, Finaḥas ijja-dd Abicuɛa,
31 Abicuɣa ijja-dd Buqqi, Buqqi ijja-dd Ɛuzzi,
32 Ɛuzzi ijja-dd Zaraḥ-Yah, Zaraḥ-Yah ijja-dd Marayut,
33 Marayut ijja-dd Amarya, Amarya ijja-dd Axiṭub,
34 Axiṭub ijja-dd Ṣaduq, Ṣaduq ijja-dd Aximaɛaṣ,
35 Aximaɛaṣ ijja-dd Ɛazarya, Ɛazarya ijja-dd Yuḥanan
36 u Yuḥanan ijja-dd Ɛazarya. Wanita tuɣa d wenni ittsexxaren am ukehhan di Taddart i ibna Suliman di Urcalim.
37 Ɛazarya ijja-dd Amarya, Amarya ijja-dd Axiṭub,
38 Axiṭub ijja-dd Ṣaduq, Ṣaduq ijja-dd Callum,
39 Callum ijja-dd Ḥilqiya, Ḥilqiya ijja-dd Ɛazarya,
40 Ɛazarya ijja-dd Saraya u Saraya ijja-dd Yahuṣadaq.
41 Yahuṣadaq yuyur akidsen umi SIDI indeh Yahuda d Urcalim ɣar lmenfa s ufus n Nabuxadnaṣṣar.