66
1 I umeqqran n imeɣnajen. Izři. Azehhed.
Duqqzem s usřiwřew i AREBBI,
wah, marra tammurt!
2 Zehhdem i uɛuǧi n Yisem nnes,
ssɛuǧa i-t i usemɣar nnes.
3 Inim i AREBBI:
“Mammec ssaggʷadent tmegga nnec!”
Zi řemɣaret n jjhed nnec
ad xak ssniɛmiřen řɛedyan nnec
ad aḍaren i Cek.
4 Marra tammurt,
wah marra ad ac sejden
u ad zehhden,
ad zehhden i Yisem nnec. Silah.
5 Asem-dd, xzarem timegga n AREBBI.
Min igga zzat i tarwa n bnadem
aqa issaggʷad.
6 Netta yarra řebḥar d řbar.
Nitni ẓwan iɣzar x iḍaren.
Dinni i zzayes nfarreḥ.
7 S jjehd nnes iḥekkem i řebda.
Tiṭṭawin nnes ttɛessent x řegnus.
Ɣarwem ad mmɛařan inni ittɣewwɣen.
Silah.
8 Barkem AREBBI nneɣ, kenniw a řegnus,
ggem ad ittwaseř řḥess n uṣebbeḥ nnes.
9 Netta d wenni d aneɣ itticen tudart,
d wenni war ijjin aḍar nneɣ ad ifarɣ.
10 Minzi Cek, a AREBBI, tqeǧbed aneɣ,
Cek tessizedged aneɣ
axmi ssizdagen nnuqart.
11 Cek tnedhed aneɣ di tracca n řfex.
Tessarsed xaneɣ ijj n ddqeř
x tejɛinna nneɣ.
12 Cek tejjid iwdan ad nyen
x izeǧifen nneɣ,
aqa nedweř di tmessi d waman,
maca Cek tessuffɣed aneɣ
s ijj n řqedd ifeyyeḍ.
13 Necc ad dd-adfeɣ ɣar Taddart nnec
s tɣarṣa n wecmaḍ,
ad ac xeǧṣeɣ lwuɛud inu,
14 lwuɛud nni zzaysen neṭqen
iyencicen inu,
nni zzaysen issiweř uqemmum inu,
řami tuɣa ayi di řeḥṣaret.
15 Tiɣarṣa n wecmaḍ n řmar iṣeḥḥen
ad ac tent-i-dd-awyeɣ
ak-d řebxur n icarriyyen.
Necc ad ac sswejdeɣ ifunasen d iɣayḍen.
Silah.
16 Marra kenniw i itteggʷden AREBBI,
assettiw-dd, sřem,
necc xseɣ ad awem ɛawdeɣ
min i d ayi igga di řeɛmar inu.
17 Ɛad iřaɣa xas uqemmum inu,
xenni aqa Netta ittwassemɣar
sadu yiřes inu.
18 Mři tuɣa nwiɣ řmuɛṣiyyet
deg wuř inu,
xenni aqa Sidi inu war d ayi ittesři ca.
19 AREBBI maca aqa isřa ayi,
aqa Netta iwca taynit
i tmijja n tẓaǧit inu.
20 Ad ittwabarek AREBBI
wenni war inḍaren taẓaǧit inu,
war d ayi ikkis
tamexsiwt nnes icewwaren.