65
1 I umeqqran n imeɣnajen. Azehhed n Dawud. Izři.
2 Aṣebbeḥ ittraja i Cek di řhudnet,
a, AREBBI, di Ṣihyun,
ittxeṣṣa ad ittwakemmeř lwaɛd i Cek.
3 Cek tesřid i tẓaǧit,
marra ddat ad ɣarek dd-yas.
4 Řmuɛṣiyyet tuɣa tejhed xafi,
maca Cek tᵉttegged aṣřaḥ x ixeṭṭan nneɣ.
5 Sseɛd n wenni i tfarrzed Cek
u tessqarrbed t-i-dd ɣarek,
ḥima ad izdeɣ di řemraḥat nnec.
Neccin ad nejjiwen
s řxar n Taddart nnec,
s tqeddast n Zzawect nnec Tameqqrant.
6 Cek ad xaneɣ dd-tarred di tsegda
s tmegga issaggʷaden,
a AREBBI n usenjem nneɣ.
Aqa Cek d řaman
n marra tineggura n temmurt,
n řebḥur iggʷejen qaɛ.
7 Cek d wenni issrusan idurar
s jjhed nnes,
Cek tbekksed s jjehd.
8 Cek d wenni ittarran
řehweř n řebḥur yaressa,
řehweř n řemwaj
zzhir n ccuɛub.
9 Inni izeddɣen ɣar tneggura n temmurt
tteggʷeden zi řeɛřamat nnec,
aqa Cek tᵉttarrid řefjar n tuffut
d weṭṭu n tmeddit ad sřiweřwen.
10 Cek tarezzfed tammurt,
tᵉttarrid tiɣezratin ad tt cuqent,
aqa Cek tᵉttarrid tt-i-dd
s řxir aṭṭas.
Iɣzar n AREBBI nni tt ittcuqa
aqa ittcur s waman.
Cek tessewjaded imendi nsen,
maɣar i uya i teggid tammurt.
11 Cek tᵉttsawed mseqqem
řatarat n wecraz,
tesshekkʷid ibuda nnes.
Tessarḍabed tammurt s inecnacen,
tᵉttbarked aɣemmuy nnes.
12 Cek tᵉttegged ttaj
i useggʷas n řxar nnec,
řatarat nnec ttudument s tadunt.
13 Aqa ttudument x ddmani n řexřa,
tiwririn bekksent s řefraḥet.
14 Ddmani n tarewsa ssunt s wuǧi,
tiɣzurin dřint s imendi.
Nitni dduqquzen s usřiwřew,
wah, ttɣennajen.