Ifilippiyen
1
Aseǧem ɣar umezwaru d tẓaǧit ak-d uqadi
1 Bulus d Timutiyu, imsexxaren n Yasuɛ Lmasiḥ, i marra imqeddasen di Yasuɛ Lmasiḥ inni iǧan di Filippi, ak-d imɣaren d imsexxaren di tmesmunt:
2 Arḍa ad kiwem yiři, uřa d řehna zi AREBBI Babatneɣ, u zi Siditneɣ Yasuɛ Lmasiḥ.
3 Ttqadiɣ AREBBI inu řami daywem ttfekkareɣ řebda,
4 maɣar di kuř tiẓaǧitin inu xawem, aqa ksiɣ s řmeɛruf s řefraḥet
5 di ssibbet n tmunt nwem ak-d L’Injil, zeg wass amezwaru ař iḍa.
6 Aqa ttiqqeɣ belli Wenni daywem ibdan řexdayem iṣebḥen, ad tent ikemmeř ař ass n Siditneɣ Yasuɛ Lmasiḥ.
7 Icna ayi ad fekkareɣ daywem marra ammu, minzi aqa kenniw ɣari deg wuř inu, xmi ǧiɣ di ssnaseř uřa xmi ɣa awteɣ x tidett n L’Injil, minzi kenniw tcarcem akidi di arḍa.
8 Minzi AREBBI d Acehhad inu mecḥař kenniw ttexseɣ s řeḥnunect yuǧɣen n Yasuɛ Lmasiḥ.
9 Man aya i ttẓaǧiɣ, aqa tayri nwem ad tfeyyeḍ aṭṭas s waṭṭas di tussna d qaɛ řefhamet taruḥanect,
10 maḥend ad tfarzem min ittřiqen, u maḥend ad tiřim teqqurem u břa řɛib deg wass n Lmasiḥ,
11 teccurem s řɣiǧet n tsegda i yeǧan di Yasuɛ Lmasiḥ i uɛuǧi d usemɣar n AREBBI.
Bulus di řeḥbes
12 A aytma, necc xseɣ ad tessnem belli timesřayin i d ayi imsaren arnint ɛad di tuzzeggart n tbarreḥt n L’Injil,
13 minzi tᵉttwassen tmeḥbast inu zi ssibbet n Lmasiḥ i qaɛ inni iǧan di řeqṣar n qayṣar u i qaɛ min iqqimen.
14 Azyen ameqqran n wawmaten di Siditneɣ, umi ǧiɣ di tmeḥbast, idweř ɣarsen ttiqqet ktar uca dewřen zeɛɛmen ssawařen awař n AREBBI s teryast ktar, břa tiggʷudi.
15 Ca zzaysen ttbarrḥen Lmasiḥ zi řeḥsed d umɛaned, maca ca nneɣni ɛawed zi nneyyet tecna u s tayri,
16 minzi nitni ssnen aqa ttwaggeɣ maḥend ad wteɣ x L’Injil.
17 Maca inni ittbarrḥen s Lmasiḥ s umɛaned, war t tteggen s nneyyet tecna, maca ttexsen ad xafi arnin řmeḥnet i ssnaseř inu.
18 S man aya farrheɣ, wah, ad farḥeɣ: aqa ittwabarreḥ Lmasiḥ s ibriden ifarzen, ma s ijj n lɣaraḍ nneɣni, niɣ s tidett.
19 Minzi ssneɣ aqa timesřayin-a ad iřint i Tudart i necc s tẓaǧit nwem u s tewhibt n Arruḥ n Yasuɛ Lmasiḥ,
20 maḥend necc, am sitimeɣ u ttrajiɣ, war ttseḍḥiɣ ca x walu, maca am řebda, uřa d řexxu ad ittwassemɣar Lmasiḥ s bṭayṭay di arrimet inu, ma s tudart inu niɣ s řmewt inu.
21 Minzi tudart inu d Lmasiḥ uca řmewt d arbeḥ i necc.
22 Maca mařa din řɣiǧet di tudart-a di arrimet zi jjihet n řxedmet inu, xenni war ssineɣ min ɣa xḍareɣ.
23 Maɣar aqa ayi jar tnayen n iɣezdisen: dayi meẓri maḥend ad raḥeɣ ad iřiɣ ak-d Lmasiḥ, minzi man aya qaɛ ḥsen,
24 maca aɣimi di arrimet ittxeṣṣa ɛad ktar di ṭṭweɛ nwem.
25 D man aya ssneɣ nican, aqa ad qqimeɣ, wah, ad qqimeɣ di ṭṭweɛ n řefraḥet nwem u maḥend ad igma l’iman nwem,
26 ḥima, xmi dd ɣa yaseɣ ɣarwem ɛawed, aqa asemɣar nwem di Lmasiḥ waha ad ifeyyeḍ, umi necc qqimeɣ.
27 Uyurem s uweqqar i Řexbar Aṣebḥan n Lmasiḥ, ḥima, xmi dd ɣa yaseɣ uca ad kenniw ẓareɣ uřa xmi ɣa ɣabeɣ, ad zzaywem sřeɣ, aqa tbeddem nican deg ijj n arruḥ u s ijj n řeɛmar, uca tᵉttɣellbem s l’iman di L’Injil.
28 War tteggʷdem ca ɛemmarṣ zeg inni xawem dd-ikkaren. Man aya d aɛeǧem i nitni ɣar uhellek, maca i kenniw ɣar usenjem.
29 Minzi aqa immewc awem zi AREBBI, war iǧi ad tamnem di Lmasiḥ waha, maca ɛawed maḥend ad tmarrtem di ṭṭweɛ nnes,
30 u ad teksim amenɣi, am mammec i d ayi t teẓrim uca řexxu aqa xafi tesřim.