6
Lwalidin d iḥenjiren nsen, imsexxaren d aytbab nsen
1 A iḥenjiren, ṭaɛem i lwalidin nwem di Siditneɣ, minzi man aya nican i yeǧa.
2 Ta d tawṣeyyet tamezwarut s yijj n lwaɛd: ‘Weqqar babac d yemmac,
3 ḥima ad tiřid mliḥ u ad teddared aṭṭas di temmurt.”
4 A ibabaten, war sɛarem ca iḥenjiren nwem, maca arebbam ten s usettef u di tɣuri n Siditneɣ.
5 A imsexxaren, ṭaɛem aytbab nwem di ddunect-a s tiggʷudi d tarjijit, u s řeṣfayet n wuř axmi i Lmasiḥ.
6 War iǧi qibač i tiṭṭawin, axmi tᵉttexsem ad tarḍam iwdan, maca am yimsexxaren n Lmasiḥ inni itteggen min yareṭṭan AREBBI.
7 Xedmem asen s marra uř nwem di tayri, am i Siditneɣ, war iǧi i iwdan.
8 Aqa tessnem mařa din ḥed, ismeɣ niɣ d aḥurri, wenni i ɣa iggin ca d taṣebḥant, Siditneɣ ad ɣares yarr.
9 Ɛawed kenniw, a aytbab, ggem amenni ak-d imsexxaren nwem. Samḥem asen iɛeddiyen nsen, maɣar tessnem, aqa Siditwem deg ijenwan i yeǧa, u Netta war ittegg ca s wudmawen.
Amenɣi arruḥani d arruḍ n řesnaḥ n Arebbi
10 S uyenni, a wawmaten inu, meḥḍem di Siditneɣ u di jjehd n tzemmar nnes.
11 Arḍem s marra řesnaḥ n AREBBI, ḥima ad tessbeddem ibriden n tḥraymect n ibřis.
12 Aqa war nettmenɣi ca ak-d weysum d idammen, maca ak-d řeḥkamat, ak-d řḥukkam d ṣṣulaṭat n ddunect-a tabarcant u ak-d řaryaḥ iɛeffanen inni iǧan sadu ijenwan.
13 S uyenni arḍem s marra řesnaḥ n AREBBI maḥend ad temmɛařam ak-d umɛeffan. Xmi ɣa tiřim twejdem kuřci, ad teqqimem tbeddem.
14 S uyenni beddem, tbeysem s tidett u sduryem idmaren nwem s tsegda,
15 ad iřin iḍaren nwem ttwaqqnen s řxaḍar n L’Injil n řehna.
16 Ak-d man aya marra, ksim taseddart n l’iman deg ufus nwem, maḥend ad tessxesyem marra fřitcat itteḥduduqen s tmessi n umɛeffan.
17 Ggem lkask n usenjem x uzeǧif nwem uca ṭṭfem ssif n Arruḥ i iǧan d Awař n AREBBI.
18 Ẓẓaǧam di marra tiẓaǧa d tutra nwem řebda di Arruḥ, u ḥḍam břa qeṭṭu di tẓaǧit, am tᵉttẓaǧam u tkessim s řmeɛruf řebda di ṭṭweɛ n marra imqeddasen,
19 uřa di ṭṭweɛ inu, ḥima ad ayi immewc Awař xmi ɣa arzmeɣ aqemmum inu, maḥend ad barrḥeɣ ssirr n Řexbar Aṣebḥan s teryast,
20 i zi necc d amsekki s ssnaseř, ḥima ad xas ssiwřeɣ s teryast am mammec icuwwar ad ssiwřeɣ.
Aseǧem ɣar uneggaru
21 Ḥima ad tessnem mammec ɣa yiři umeddur inu u min tteggeɣ, xzar, Ticikus, ijj n umatneɣ iɛizzen d amsexxar amtiqqi n Siditneɣ, ad kenniw ixebbar.
22 Aqa ssekkeɣ t-i-dd i man aya simant nnes, ḥima ad tessnem ameddur inu, uca ḥima ad daywem yegg uř.
23 Řehna ad yiři ak-d tawmat nneɣ uřa d tayri ak-d l’iman, zi AREBBI, Babatneɣ, u zi Siditneɣ Yasuɛ Lmasiḥ.
24 Ad yiři arḍa ak-d marra inni ittexsen Siditneɣ Yasuɛ Lmasiḥ břa řɣecc. Amin.