3
Ass n SIDI AREBBI
1 A imɛizzen inu, ta d tabrat wiss tnayen i d awem dd-uriɣ řexxu, u di tnayen n tebratin-a arezzuɣ ad ssfaqeɣ nneyyet nwem iṣfan am kenniw ssɛeqřeɣ,
2 ḥima ad teqqimen tᵉttfekkarem deg wawařen nni tuɣa innan inabiyyen iqeddsen zic, uřa di tewṣeyyat n Siditneɣ d Amsenjem nneɣ, tinni ɣarneɣ dd-yiwḍen s rrusul.
3 Man aya ittxeṣṣa ad tessnem d amezwaru, aqa deg wussan ineggura ad dd-asen imestehzayen inni istehzan am uyuren ɣar nnecwat nsen,
4 ad inin: “Mani iǧa lwaɛd n twasit nnes? Zeg wami ṭṭṣen řejdud nneɣ, ammu i yeqqim kuřci am tuɣa iǧa zeg umezwar řami tᵉttwagg ddunect.”
5 Meɛlik ufin ad ttun belli s wawař n AREBBI aqa ijenwan izwaren ad iřin, u aqa řbarr igeɛɛed zeg waman u s ufus n waman s Wawař n AREBBI,
6 aman i zi tᵉttwahellek ddunect n řweqt nni umi dd xas ssefyen waman n řḥemřet deg wussan n Nuḥ, uca tᵉttwamḥa.
7 Maca ijenwan d temmurt n yiḍa aqa ttwaḥefḍen s wawař nnes, xemmřen i tmessi ař ass n lḥisab d uweddar n lkuffar.
8 Maca ittxeṣṣa kenniw war tᵉttᵉttum ict n řḥajjet, a imɛizzen, aqa-tt d ta: ɣar SIDI ijj n wass am ařef n iseggʷusa uca ařef n iseggʷusa am yijj n wass.
9 Aqa SIDI war issɛizzi deg usuffeɣ n řwuɛud nnes am mammec d asen ittɣiř i ca n iwdan, maca Netta iggur akidwem s ttasiɛ n řxaḍar, minzi Netta war ittexs ca ad yareyyeb uřa d ijj, maca maḥend ad tuben marra.
10 Maca ass n SIDI ad dd-yas am uxewwan s ǧiřet. Deg wass nni ad weddaren ijenwan s řɣefřet u timesřayin timezwura n ddunect ad fesyent di tmessi uca tammurt d řexdayem i xas iǧan ad ttwafent.
11 Am marra timesřayin-a ad fesyent ammu, mammec ittcuwwar ad tuyurem kenniw s tqeddast d tiggʷudi zi AREBBI,
12 am tᵉttrajam tawasit n wass n AREBBI, am tᵉttmeẓrem dayes, xmi ɣa fnan ijenwan am ttwaqeǧben s tmessi uca ad fesyent timesřayin timezwura n ddunect s řɛabuq nnes.
13 Maca neccin aqa nettraja ijenwan n jdid d temmurt n jdid mani ɣa tezdeɣ tsegda ɛlaḥsab lwaɛd nnes.
14 S uyenni, a imɛizzen inu, umi kenniw tᵉttrajam man aya, cḍarem maḥend ad tᵉttwafem břa řexmej u břa řɛib zzates di řehna.
15 Ḥesbem ttasiɛ n řxaḍar n SIDI d tawwart i weṣřaḥ, am mammec uřa d umatneɣ iɛizzen Bulus d awem dd-yura ɛlaḥsab tiɣit i d as immewcen,
16 am mammec xas issiweř netta di marra tibratin nnes. Aqa din ca n tmesřayin iwɛaren i řefhamet, tinni i ssfarraɣen řjuhhař d yewdan war imtinen deg wuř nsen, am mammec ggin uřa i Tira Iqeddsen nneɣni i wareyyeb n yixef nsen.
17 S uyenni kenniw a imɛizzen inu, am tessnem man aya qbeř, ḥḍam ixef nwem, ḥima war tḍeffaram awarni i uweddar n yinni iǧan břa ccariɛa uca ad tewḍam waxxa tuɣa tᵉttbeddam nican,
18 maca s řɛeks ḥḍam ad teymem deg arḍa d tussna n Siditneɣ d Amsenjem nneɣ, Yasuɛ Lmasiḥ, u n AREBBI, Babas, i Wenni umi ɣa yiři uɛuǧi, am řexxu am řebda, ař deg wussan n řebda! Amin.