1 Yuḥanna
1
Awař n Tudart
1 Wenni tuɣa din zeg umezwaru, d Netta i d awem nettbarreḥ: Wenni nesřa d Wenni neẓra s tiṭṭawin nneɣ, d Wenni netwařa u nḥada t s ifassen nneɣ d Wenni iǧan d Awař Iddaren.
2 Aqa Tudart teḍhar-dd, neccin neẓra i-tt, uca ncehhed u nettbarreḥ awem Tudart ittduman, tenni tuɣa ak-d Babatneɣ uca tᵉttwassargeb-dd i neccin.
3 Min neẓra d min nesřa, ad awem t-i-dd-nesscen, ḥima ɛawed kenniw ad tiřim deg umuni akidneɣ, uca amuni nneɣ ak-d Babatneɣ u ak-d Mmis Yasuɛ Lmasiḥ.
4 Aqa nettari man aya i kenniw, ḥima řefraḥet nneɣ ad tiři tekmeř.
Arebbi d Tafawt
5 D wa d Řexbar Aṣebḥan i zzayes nesřa uca ad awem nbarreḥ: AREBBI d Tafawt, Netta war dayes bu jjurret n taǧest.
6 Mařa neqqar, aqa ɣarneɣ amuni akides, uca neggur di taǧest, aqa nessxarriq, war nḍeffar ca tidett.
7 Maca mařa nuyur di Tfawt, am Netta di Tfawt, ɣarneɣ amuni ak-d wayawya, uca ad taf Idammen n Yasuɛ, Mmis, ad aneɣ ssizdegen zi marra ddnub nneɣ.
8 Mařa neqqar, war dayneɣ bu ddnub, aqa nessxarriq x yixef nneɣ uca tidett war dayneɣ teǧi.
9 Maca mařa nenɛem s ddnub nneɣ, aqa Netta d amtiqqi d amseggad ḥima ad aneɣ iɣfar ddnub nneɣ uca ad aneɣ issizdeg zi marra min war iseggden.
10 Mařa neqqar: ‘Neccin war dayneɣ bu ddnub!’, nettarra i-t d bu-ixarriqen uca awař nnes war dayneɣ iǧi.