5
Tarewsa n tḥimart n Arebbi
1 Ttzawgeɣ inni d imɣaren jar awen, necc d wenni d amɣar akidwem d acehhad n uweddeb i ikkin x Lmasiḥ uřa d amɛacar deg uɛuǧi nnes i dd ɣa ittwasseḍhar:
2 Arewsem taḥimart n AREBBI tenni tḥeṭṭam, war iǧi s uɣiř maca s řxaḍar, war iǧi di ṭṭmeɛ n arbeḥ war iḥřin, maca s marra wuř nwem,
3 war iǧi am yinni iǧan x tḥimart, maca umi teǧam d ijj n umedya icna i nitni.
4 Uca xmi dd ɣa iḍhar Umeksa Ameqqran ad zzayes tᵉṭṭfem ttaj n uɛuǧi i war ifennin.
5 U kenniw, ibřiɣen, sarsem ixef nwem sadu imɣaren nwem, beysem ixef nwem s uwaḍeɛ n arruḥ ijj i wenneɣni, minzi AREBBI ittɛekkas imɛeffaren, maca imwaḍɛen iwca asen arḍa.
6 Semẓayem ixef nwem sadu afus ijehden n AREBBI, ḥima ad kenniw issuɛřa di řweqt nnes nican.
7 Marra imnusen nwem arrem ten ɣar AREBBI, aqa Netta itthilla daywem.
8 Arrem-dd řbař, ḥḍam, minzi řeɛdu nwem, cciṭan ameqqran, ittzehhar am wayrad u ittḥama, yarezzu min izemmar ad isarḍ.
9 Mɛařam t, tbeddem nican di l’iman, aqa tessnem belli aytmatwem di ddunect uřa d nitni kessin aweddeb-a.
10 Maca AREBBI n arḍa wenni d aneɣ dd-iřaɣan ɣar uɛuǧi nnes ittduman i řebda s Yasuɛ Lmasiḥ, aqa Netta, awarni řami nweddeb řeḥṣarat-a timuqřiřin, ad aneɣ issejhed, ad aneɣ iḍmen u ad aneɣ isedd i řebda.
11 Ɣares Netta aɛuǧi d ṣṣulṭa d řɛezz i řebda qaɛ. Amin.
12 Uriɣ awem-dd ca n tmesřayin di tira taquḍaḍt s ufus n Silwanus, uma d amtiqqi, u necc qenɛeɣ u cehhdeɣ, aqa man aya di min di tbeddem nican, aqa-t d arḍa n AREBBI d tidett.
13 Tamesmunt ittwafarzen i iǧan di Babil, tseǧam xawem s řehna, uřa d mmi Markus.
14 Seǧmem x wayawya s řehna u s usudem iqeddsen. Řehna ad kiwem yiři marra idwem i iǧan di Lmasiḥ. Amin.