☰ 1 Buṭrus 4
4
1 Řami xawem iksi Lmasiḥ armeḥ di ddat, ittxeṣṣa kenniw ɛawed ad tᵉṭṭfem deg uxarraṣ-a: aqa wenni immuten di arrimet, wanita aqa issbedd ddenb. ◘ 2 S uyenni wanita war iddar ɛad ɛlaḥṣab nnecwat n bnadem am t igga qbeř di arrimet, maca ɛlaḥsab min ixs AREBBI. ◘ 3 Minzi aqa icfa awem řweqt řami tuɣa kenniw tɛebbdem i min xsen lkuffar, umi kenniw tuɣa teggurem deg ufucceḥ, ssekran, řefsad d fictat n uɣelli u di řxedmet n swadday swadday n ccwaṭen. ◘ 4 U xzar, řexxu ttbehten nitni umi war tᵉttizzřem ɛad akidsen deg wezqaq n řeqjaḥet d ijjen, uca nitni ttceqqafen daywem. 5 Maca nitni ad arren řeḥsab i AREBBI, wenni i ɣa iḥekmen x yinni iddaren u x yinni immuten. 6 S uyenni ittwabarreḥ ɛawed s Řexbar Aṣebḥan i imettinen, ḥima nitni ad ttwaḥasben am tarwa n bnadem zi jjihet n ddat, maca ad ddaren di AREBBI s Arruḥ. ◘ 7 Aneggar n marra aqa yudes-dd. S uyenni iřim s řeɛqeř, rekkzem ixef nwem xmi teẓẓaǧam. ◘ 8 Sennej i marra, xsem ayawya břa qeṭṭu, minzi tayri tessdurruy x ubarru n ddnub. ◘ 9 Areḥḥbem i ibarraniyyen břa řeɛkaset. ◘ 10 Ejj kuř ijjen ad isexxar inni d as yudsen ɛlaḥsab min d as immewcen zi AREBBI, am yinni iwekkřen mliḥ x ɛřam kuř arḍa n AREBBI. ◘ 11 Ejj marra wi issawařen, ad issiweř ɛlaḥsab Awař n AREBBI, u ejj kuř ijj wenni ittsexxaren, ittsexxar ɛlaḥsab jjehd i d as iwca AREBBI, ḥima di marra min tᵉtteggem ad idweř usemɣar ɣar AREBBI s Yasuɛ Lmasiḥ wenni ɣar iǧa uɛuǧi d ccan i řebda qaɛ. Amin. ◘
12 A imɛizzen, war dehhcem ca zeg waṭṭas n ijarriben i xawem i dd ɣa ikkin, axmi kenniw teřqef ca n tmesřact d taɣribt, maɣar man aya maḥend ad tettwaqeǧbem. ◘ 13 Maca farḥem umi tcarcem deg uweddeb i ikkin x Lmasiḥ, ḥima ad tfarḥem s řefraḥet ɛawed xmi dd ɣa iḍhar uɛuǧi nnes. 14 Mařa ɛeyyben kenniw x ssibbet n Yisem n Lmasiḥ, sseɛd nwem minzi aɛuǧi n Arruḥ n AREBBI ad xawem yarsa. ◘
15 War ttejjim ḥed zzaywem ad iweddeb am uqettař niɣ am uceffar niɣ am uɛeffan. 16 Maca mařa iweddeb ḥed am umasiḥi, war ittseḍḥi ca, maca ad ikkar ad issuɛřa AREBBI zi ssibbet n yisem-a. 17 Maɣar tiweḍ-dd řweqt maḥend ad ibda řḥukm ɣar Taddart n AREBBI. Maca mařa řḥukm zzayneɣ i ɣa issizwar, mammec ɣa yiři uneggaru n yinni war iṭṭiɛen ca Řexbar Aṣebḥan n AREBBI? ◘ 18 Uca mařa amseggad yiweḍ ad iṭṭef Tudart s řweḥřan, mani ɛad i dd ɣa iḍhar ukafriw d umednub? ◘ 19 S uyenni marra inni ittweddaben ɛlaḥsab min ixs AREBBI, ejj i-ten ad as sellmen řeɛmur nsen am i Wenni dd-ixeřqen kuřci, Wenni di iǧa řaman, maḥend ad ggen min iṣebḥen.
 
 
◘ 4:1 Rum. 6:7; Ɛbr. 12:1. ◘ 4:2 Rum. 14:7; 2 Kur. 5:15; Gal. 2:20; Afa. 4:24; 1 Ts. 5:10; Ɛbr. 9:14. ◘ 4:3 Afa. 4:17. ◘ 4:6 Yḥ. 5:25; 1 Bṭ. 3:19. ◘ 4:7 Lk. 21:34; 1 Yḥ. 2:18. ◘ 4:8 Awřn. 10:12. ◘ 4:9 Rum. 12:13; Fil. 2:14; Ɛbr. 13:2. ◘ 4:10 Awřn. 3:28; Rum. 12:6; 2 Kur. 8:11. ◘ 4:11 Irm. 23:22. ◘ 4:12 Irm. 48:10; 1 Kur. 3:13; 1 Bṭ. 1:7. ◘ 4:14 Mt. 5:10; 1 Bṭ. 2:20; 3:14. ◘ 4:17 Irm. 25:29; Lk. 10:12; 23:31; Afa. 2:19; 1 Tim. 3:1; Ɛbr. 10:21 ◘ 4:18 Awřn. 11:31.
☰