8
Asbeddi n řqendiř
1 Issiweř SIDI ak-d Musa, inna:
2 “Siweř ak-d Harun, ini as: ‘Xmi ɣa tessarsed tifawin x řqendiř, ittxeṣṣa sebɛa n tfawin ad wcent tafawt ɣar zzat n řqendiř.’ ”
3 Uca ammu i igga Harun. Issars tifawin nnes ɣar zzat n řqendiř, am mammec d as yumur SIDI i Musa.
4 Tuɣa řqendiř d ict n ṣṣenɛet n wureɣ yeɛdeř s wefḍis. Zeg ufuḍ x uḍar nnes ař nnuwwarat nnes tuɣa ittwagg s wefḍis. Ɛlaḥsab amedya i d as isccen SIDI, ammu i iṣenneɛ řqendiř.
Tamewci n Ilawiyyen d řxedmet nsen
5 Issiweř SIDI ak-d Musa, inna:
6 “Ksi Ilawiyyen zi jar řwesṭ n ayt n Israil uca sizdeg i-ten.
7 Ammu i d asen ɣa tegged ḥima ad ten tessizedged: Rucc i-ten s waman n usizdeg. Ittxeṣṣa asen ad ḥeffen marra arrimet nsen uca ad ssirden arruḍ nsen uca ad ssizdegen ixef nsen.
8 Xenni ad ksin ijj n ufunas, ameẓyan n tfunast, ak-d tewhibt n řɣiǧet nnes n waren azdad ixeǧḍen s zzect u ɛawed ijj n ufunas wiss tnayen, ameẓyan n tfunast, am tɣarṣt n ddenb.
9 Ad tawyed Ilawiyyen zzat i Uqiḍun n Umsagar uca ad tessmuned marra tamesmunt n ayt n Israil.
10 Ad dd-tessqarrbed Ilawiyyen zzat i wudem n SIDI uca ayt n Israil ad ssarsen ifassen nsen x Ilawiyyen.
11 Ad yejj Harun ad hezzen Ilawiyyen zi ssa ɣar da zzat i wudem n SIDI am yict n tewhibt n wenhezzi di ṭṭweɛ n ayt n Israil. Nitni ad dewřen ttsexxaren di tsexxart n SIDI.
12 Ilawiyyen ad ssarsen ifassen nsen x izeǧifen n ifunasen imeẓyanen uca ad tesswejded ijj i tɣarṣt n ddenb d yijj i tɣarṣt n wecmaḍ i SIDI, ḥima ad zzaysen ittwagg weṣřaḥ i Ilawiyyen.
13 Ad tegged Ilawiyyen ad bedden zzat i wudem n Harun u zzat i wudem n warraw nnes uca ad ten tarred ad hezzen zi ssa ɣar da am yict n tewhibt n wenhezzi zzat i wudem n SIDI.
14 Ammu i ɣa tḥuzzed Ilawiyyen zi řwesṭ n ayt n Israil ḥima Ilawiyyen ad iřin inu.
15 Awarni man aya ad dd-asen Ilawiyyen ḥima ad sexxaren deg Uqiḍun n Umsagar. Ad ten tessizedged uca ad ten tarred ad hezzen zi ssa ɣar da am yict n tewhibt n wenhezzi,
16 minzi nitni ttwammewcen ayi nican zi řwesṭ n ayt n Israil, uca Necc ksiɣ ten i Yixef inu deg wemcan n marra min yarezmen řemřawet d amezwaru, deg wemcan n umenzu n marra ayt n Israil.
17 Minzi marra amenzu jar ayt n Israil aqa-t inu, zeg iwdan, ammu zi řmař, zeg wass i di nɣiɣ Necc marra imenza di temmurt n Miṣra, ssqeddseɣ ten i Necc.
18 Necc ksiɣ Ilawiyyen deg wemcan n marra imenza jar ayt n Israil.
19 Necc wciɣ Ilawiyyen i Harun u i warraw nnes am yijj n uriɣalu zi řwesṭ n ayt n Israil, maḥend ad ggen tasexxart n ayt n Israil deg Uqiḍun n Umsagar u maḥend ad ittwagg weṣřaḥ di ṭṭweɛ n ayt n Israil, ḥima war tᵉttiři jjriḥect x ayt n Israil xmi dd ɣa qarrben ayt n Israil ɣar Zzawect Iqeddsen.”
20 Musa d Harun d marra tamesmunt n ayt n Israil ggin ak-d Ilawiyyen ɛlaḥsab marra min d as yumur SIDI i Musa zi jjihet n Ilawiyyen, ammu i ggin ayt n Israil akidsen.
21 Ilawiyyen ssizdigen ixef nsen zi ddenb nsen uca ṣebbnen arruḍ nsen uca Harun yarra i-ten ad nhezzen zi ssa ɣar da am yict n tewhibt n wenhezzi zzat i wudem n SIDI uca Harun isseṣřeḥ i-ten i usizdeg nsen.
22 Awarni man aya usin-dd Ilawiyyen ḥima ad sexxaren deg Uqiḍun n Umsagar zzat i wudem n Harun u zzat i wudem n warraw nnes am mammec d as yumur SIDI i Musa zi jjihet n Ilawiyyen, ammu i kidsen ggin.
23 Issiweř SIDI ak-d Musa, inna:
24 “Ta zi jjihet n Ilawiyyen: aqa ittxeṣṣa i kuř mmis n xemsa u-ɛicrin n iseggʷusa sennej ad dd-yas, ḥima ad isexxar di ṭṭweɛ n tsexxart n Uqiḍun n Umsagar
25 u xmi i ɣa yiweḍ ɣar xemsin n iseggʷusa ad iffeɣ zi řɛeskar n tsexxart u war iqqim ittsexxar ɛad ktar.
26 Ad iwc afus i yaytmas deg Uqiḍun n Umsagar ḥima ad xas ḥḍan, maca netta s yixef nnes war izemmar ad isexxar. Ammu i ɣa tegged ak-d Ilawiyyen zi jjihet n uḥeṭṭu i xasen ittwaggen.”