32
Tutra n teqbič n Rubin d teqbič n Jad
1 Ayt n Rubin ɣarsen aṭṭas n řebhayem u ayt n Jad ɣarsen aṭṭas s waṭṭas n řebhayem uca nitni ẓrin tammurt n Yaɛzir d temmurt n Jilɛad, uca xzar, jjihet nni tecna i řebhayem.
2 Usin-dd ayt n Jad u ayt n Rubin, ssiwřen ak-d Musa d ukehhan Aliɛazar u ak-d řḥukkam n tmesmunt, nnan:
3 “Ɛaṭarut, Dibun, Yaɛzir, Nimra, Ḥacbun, Aliɛala, Cabam, Nabu d Baɛun,
4 tammurt nni x iɣřeb SIDI zzat i wudem n tmesmunt n Israil, aqa-tt d ict n temmurt tecna i řebhayem u neccin, imsexxaren nnec ɣarsen řebhayem.”
5 Nnan: “Mařa nufa arḍa di tiṭṭawin nnec, ma zeɛma ad temmewc temmurt-a d agřa i imsexxaren nnec u war d aneɣ ttejji ad neẓwa L’Urdun.”
6 Yarra-dd Musa x ayt n Jad u x ayt n Rubin: “Mařa aytmatwem ad dd-ffɣen ɣar garra, ma xenni kenniw ad teqqimem da?
7 Mayemmi ɣa tessɛegzem uř n ayt n Israil maḥend war ẓekkʷin ɣar temmurt i d asen iwca SIDI?
8 Ammu i ggin řejdud nwem umi ten ssekkeɣ zi Qadac-Barniɛ ḥima xenni ad ẓaren tammurt.
9 Iwḍen nitni ɣar teɣzurt n teɣzart n Ickul uca ẓrin tammurt uca qeřben uřawen n ayt n Israil, maḥend war ttidfen ca di temmurt i d asen iwca SIDI.
10 Deg wass nni yarɣa weɣḍab n SIDI uca ijjuǧ, inna:
11 ‘Iryazen nni dd-iffɣen zi Miṣra, zi ɛicrin iseggʷusa sennej, war ẓarren tammurt nni x jjuǧeɣ ad tt wceɣ i Ibrahim d Isḥaq d Yaɛqub, minzi nitni war d ayi ḍfaren nican,
12 mɣir Kalib, mmis n Yafunni, Aqinizi, d Yacuwa, mmis n Nun, minzi nitni ḍfaren nican i SIDI.’
13 Uca ammu yarɣa weɣdab n SIDI x Israil uca igga i-ten ad tellɛen di řexřa arebɛin n iseggʷusa, ařami ifna marra jjiř nni iggin řɣar di tiṭṭawin n SIDI,
14 Uca xzar, kenniw tɣewwɣem am řejdud nwem, kenniw d ijj n ubarru n yeryazen d imednab, uca ammu i ɣa tarnim ɛad řḥaduq n weɣḍab n SIDI x Israil.
15 Mařa tdewřem-dd kenniw zi ḍeffar nnes, Netta ad yejj řgens di řexřa ɛawed uca ammu i ɣa tejjem marra řgens aya ad ihellek.”
16 Xenni qarrben-dd ɣares, nnan: “Ad nebna da řkuriyyat i wuǧi nneɣ u tineddam i iḥenjiren nneɣ,
17 maca neccin ad dd-neffeɣ newjed i umenɣi zzat i wudem n ayt n Israil s řesnaḥ nneɣ, ařami ten nessiweḍ ɣar wemcan nsen. Iḥenjiren nneɣ ad qqimen di tneddam ifaryen zi ssibbet n imezdaɣ n temmurt.
18 War nᵉddekkwiř ɣar tudrin nneɣ ař i ɣa temmewc tesɣart n řwart i kuř ijj zeg ayt n Israil.
19 Minzi war nteṭṭef di řwart akidsen ɣar tma nneɣni n L’Urdun uřa ɣar zzat, minzi tasɣart i d aneɣ dd-ittasen aqa-tt ɣar tma-ya tanita n L’Urdun, ɣar ccarq.”
20 Xenni inna asen Musa: “Mařa teggim ammu, mařa tesswejdem ixef nwem i umenɣi zzat i wudem n SIDI,
21 u kuř ijj, wenni isswejden ixef nnes i umenɣi, ad iẓwa L’Urdun zzat i wudem n SIDI, ař Netta ad yaẓẓeř x řɛedyan nnes zzat i wudem nnes zi tesɣart nsen n řwart,
22 u ad tiři temmurt tᵉttwaxḍeɛ zzat i wudem n SIDI, xenni iɛeddeř ad dd-tdewřem u ad tiřim tbeddem zzat i SIDI u zzat i Israil břa amarwas u ad tiři temmurt-a d agřa nwem zzat i wudem n SIDI.
23 Maca mařa war teggim ammu, xenni aqa texḍam ḍidd i SIDI uca ad tessnem aqa ddenb nwem ad kenniw yaf.
24 Bnam tineddam i iḥenjiren nwem d řkuriyyat i wuǧi nwem uca ggem min dd-iffɣen zeg uqemmum nwem.”
25 Xenni ssiwřen ayt n Jad d ayt n Rubin ak-d Musa, nnan: “Imsexxaren nnec ad ggen am mammec ten yumur sidi inu.
26 Tarwa nneɣ, timɣarin nneɣ, řeksibet nneɣ d marra řebhayem nneɣ ad qqimen di tneddam n Jilɛad,
27 maca imsexxaren nnec ad ẓwan i umenɣi zzat i wudem n SIDI, marra inni isswejden ixef nsen i umenɣi, am mammec issiweř sidi inu.”
28 Uca yumur xasen Musa i ukehhan Aliɛazar u i Yacuwa, mmis n Nun, u i izeǧifen n tudrin n ibabaten n tqebbař n ayt n Israil,
29 inna asen Musa: “Mařa ayt n Jad d ayt n Rubin ad kiwem ẓwan L’Urdun, kuř ijj wenni isswejden ixef nnes i umenɣi zzat i wudem n SIDI, u mařa xenni tammurt ad tiři tᵉttwaxḍeɛ zzat i wudem nwem, ad taf ad asen tewcem tammurt n Jilɛad d agřa.
30 Maca mařa war kiwem ẓekkʷim wejden i umenɣi, xenni ad ṭṭfen agřa di řwesṭ nwem di temmurt n Kenɛan.”
31 Ayt n Jad d ayt n Rubin arrin-dd, nnan: “Am mammec issiweř SIDI ak-d imsexxaren nnec, ammu i ɣa negg.
32 Neccin ad neẓwa ɣar temmurt n Kenɛan ad niři newjed i umenɣi zzat i wudem n SIDI, maca tasɣart nneɣ n řwart ad tiři ɣar tma-ya wanita n L’Urdun.”
33 U iwca asen Musa, i ayt n Jad u i ayt n Rubin u i wezyen n teqbič n Manassa, mmis n Yusuf, tageldit n Siḥun, ajeǧid n Imuriyyen, d tgeldit n Ɛuj, ajeǧid n Bacan, tammurt s tneddam nnes nni iǧan di jjwayeh nnes uřa d tineddam di temmurt i d as dd-innḍen.
34 Ayt n Jad bnan Dibun, Ɛaṭarut, Ɛaruɛir,
35 Ɛaṭrut-Cufan, Yaɛzir, Yujbaha,
36 Bayt-Nimra d Bayt-Haran, tineddam ifaryen d řkuriyyat i wuǧi.
37 Ayt n Rubin bnan Ḥacbun, Aliɛala, Qaryatayim,
38 Nabu, Baɛl-Maɛun, tenni zi ittwabeddeř isem nsen, d Sibma, uca řaɣan ismawen n tneddam i bnan ɛawed s yisem nneɣni.
39 Ayt n Makir, mmis n Manassa, ruḥen ɣar Jilɛad uca ṭṭfen tt uca uẓẓřen x Imuriyyen nni din iǧan zi řwart nsen.
40 Uca Musa iwca Jilɛad i Makir, mmis n Manassa, uca iruḥ netta ad izdeɣ din.
41 Uca Ya’ir, mmis n Manassa, iruḥ uca iṭṭef dcurat nnes uca iřaɣa asent dcurat n Ya’ir.
42 Amenni iruḥ Nubaḥ uca iṭṭef Qinat d tneddam i ɣares dd-iqqnen uca isemma as Nubaḥ s yisem nnes.