31
Garra ak-d Midyan
1 Issiweř SIDI ak-d Musa, inna:
2 “Ntaqem di ṭṭweɛ n ayt n Israil x Imidyaniyyen. Awarni as ad tᵉmmarnid ɣar řgens nnec.”
3 Issiweř Musa ak-d řgens, inna: “Swejdem zi ɣarwem iryazen i umenɣi ḍidd i Midyan u nitni ad iřin ḍidd i Midyan maḥend ad ssiwḍen nneqmet n SIDI x Midyan.
4 Ittxeṣṣa awem ad tessekkem ařef n yeryazen zi kuř taqbič ɣar umenɣi, zi kuř ict zi marra tiqebbař n Israil.”
5 Ammu i ttwafarzen zi řuřuf n Israil ařef n yeryazen zi kuř taqbič, aqa aten jmiɛ tenɛac-n-řuřuf n yerazen iwejden i umenɣi.
6 Musa issekk i-ten ɣar umenɣi, ařef n yeryazen zi kuř taqbič. Netta issekk i-ten ɣar umenɣi ak-d Finaḥas, mmis n ukehhan Aliɛazar, u netta ɣares řeqcuɛ iqeddsen d řebwaq i usuḍi s wesruddeḥ i umenɣi deg ufus nnes
7 uca mmenɣen ḍidd i Imidyaniyyen, am mammec t yumur SIDI i Musa uca nɣin marra min iǧan d awtem.
8 Sennej i yinni zzaysen ittwassnuqqben, nɣin ɛawed ijeǧiden n Midyan: Iwi, Raqim, Ṣur, Ḥur d Rabaɛ, xemsa n ijeǧiden n Midyan, uřa Balɛam, mmis n Baɛur, nɣin t s ssif.
9 Ayt n Israil ḥebbsen timɣarin n Midyan d tarwa nsen, u keccḍen řebhayem nsen d tḥimriwin nsen d marra min ɣarsen.
10 Sscemḍen s tmessi marra tineddam nsen mani tuɣa zeddɣen d marra lqelɛat nsen.
11 Ksin marra min keccḍen, marra takeccaḍt n iwdan d řebhayem
12 uca iwyen-dd imeḥbas d marra takeccaḍt ɣar Musa u ɣar ukehhan Aliɛazar u ɣar tmesmunt n ayt n Israil, di řmargeḥ n řɛeskar, di řewḍat n Mu’ab, ɣar L’Urdun, arendad n Ariḥa.
13 Uca iffeɣ-dd Musa ak-d ukehhan Aliɛazar d marra řḥukkam n tmesmunt barra i řmargeḥ n řɛeskar maḥend ad ten mmsagaren.
14 Iffugem Musa aṭṭas x imgewwaden n řɛeskar, x imeqqranen x wařef u x imeqqranen x mya, inni dd-iɛeqben zeg umenɣi.
15 Inna asen Musa: “Ma tejjim marra min iǧan d tawtent iddar?
16 Xzar, s wescan n Balɛam, timɣarin-a tuɣa atent d řesbab aqa ayt n Israil ɣdaren SIDI di tmesřact n Faɣur uca tewḍa-dd jjriḥect x tmesmunt n SIDI.
17 Řexxu xenni, nɣem marra iwetman nni jar iḥenjiren imeẓyanen uca nɣem marra tamɣart nni imunen ak-d ijj n weryaz am tᵉṭṭeṣ nettat ak-d ijj n weryaz.
18 Maca marra tiḥenjirin jar temɣarin nni war imunen ak-d ijj n weryaz am akides ṭṭṣent, jjem tent i yixef nwem ad ddarent.
19 Ittxeṣṣa awem ad tewtem iqiḍan nwem barra i řmargeḥ n řɛeskar řmijař n sebɛa n wussan. Kuř ijjen, wenni inɣin ijj n řeɛmar n bnadem, u kuř ijjen, wenni iḥadan ijjen i ittwassnuqqben, ad yejj ad kksen ddenb x yixef nnes deg wass wiss třata u deg wass wis sebɛa, ammu i ɣa teggem kenniw uřa d imeḥbas nwem.
20 Ittxeṣṣa ad tekksem ddenb ɛawed x marra arruḍ d marra řeqcuɛ n iřmawen d marra min ittwaggen s thiḍurt n iɣayḍ d marra řeqcuɛ n ukeccuḍ.”
21 Aliɛazar, akehhan, inna i iɛeskariyyen nni dd-iffɣen ɣar umenɣi: “Ta d tawṣeyyet zi Ccariɛa nni yumur SIDI i Musa:
22 Mɣir ureɣ d nnuqart d nnḥas d uzzař d istanyu d řexfif,
23 marra min izemmaren i tmessi, x tmessi ad t tessekkem, xenni ad yiři izdig, maca ittxeṣṣa ad zzayes tekksem ddenb s waman n weɛzař. Marra min war izemmaren i tmessi, ad t tessekkem x waman.
24 Deg wass wiss sebɛa ad tṣebbnem arruḍ nwem, xenni ad tiřim d imezdagen. Awarni uya tzemmarem ad tadfem ɣar řmargeḥ n řɛeskar.”
25 Issiweř SIDI ak-d Musa, inna:
26 “Ṭṭef řeɛbar n tkeccaḍt n iwdan d řebhayem nni tᵉttwaḥebbes, cek jmiɛ ak-d ukehhan Aliɛazar u ak-d izeǧifen n tudrin n ibabaten n tmesmunt.
27 Bḍa takeccaḍt x tnayen jar inni icarcen deg umenɣi d yinni iffɣen ak-d řɛeskar zeg ict n jjihet d marra tamesmunt zi jjihet nneɣnit.
28 Sgeɛɛdet ict n ṣṣedqet i SIDI zeg iɛeskariyyen nni dd-iffɣen ɣar umenɣi ak-d řɛeskar: ijj n řeɛmar zi xemsa mya n iwdan uca amenni zeg ifunasen d tfunasin u zeg iɣyař u zeg wuǧi.
29 Zeg wezyen nsen n tkeccaḍt ad teksid ṣṣedqet-a uca ad tt tewced i ukehhan Aliɛazar am ict n tewhibt n usgeɛɛed i SIDI.
30 Zeg wezyen n tkeccaḍt n ayt n Israil ad teksid ijj zi kuř xemsin: zeg iwdan, zeg ifunasen d tfunasin, zeg iɣyař u zeg wuǧi, wah, zi marra řebhayem. Ad tewced aya i Ilawiyyen nni iṭṭfen acbar x Tzeddiɣt n SIDI.”
31 Uca igga Musa d ukehhan Aliɛazar am mammec t yumur SIDI i Musa.
32 Awarni as tuɣa řeksibet nni iqqimen n tkeccaḍt nni ikecceḍ řgens n řɛeskar setta-mya u-xemsa u-sebɛin-ařef n wuǧi.
33 tnayen u-sebɛin-ařef n ifunasen d tfunasin,
34 waḥit u-settin-ařef n iɣyař
35 uca zi jjihet n řeɛmar n bnadem, zi temɣarin nni war iṭṭiṣen di qama ak-d ijj n weryaz, aqa atent marra tnayen u-třatin-ařef.
36 Ijj n wezyen, tasɣart n yinni dd-iffɣen ak-d řɛeskar, aqa-t di teřt-mya u-sebɛa u-třatin-ařef n wuǧi.
37 Ṣṣedqet i SIDI n wuǧi tuɣa-tt di setta-mya u-xemsa u-sebɛin.
38 Uca tuɣa din setta u-třatin-ařef n ifunasen d tfunasin uca ṣṣedqet zzaysen i SIDI tuɣa-tt di tnayen u-sebɛin.
39 Uca tuɣa din třatin-ařef u-xemsa-mya n iɣyař uca ṣṣedqen zzaysen i SIDI, waḥit u-settin.
40 Uca zi jjihet n řeɛmur n bnadem tuɣa din seṭṭac-ařef n temɣarin u aṣeddeq zzaysent i SIDI aqa tnayen u-třatin n temɣarin.
41 Iwca Musa ṣṣedqet, tenni d tawhibt n usgeɛɛed i SIDI, i ukehhan Aliɛazar, am mammec t yumur SIDI i Musa.
42 Zeg wezyen nneɣni i ayt n Israil, wenni ifarz Musa di ṭṭweɛ nsen zeg yeryazen nni tuɣa immenɣen,
43 - azyen nni n tesɣart i tmesmunt tuɣa-t di teřt-mya u-sebɛa u-třatin-ařef u-xemsa mya n wuǧi,
44 setta u-třatin-ařef n ifunasen d tfunasin,
45 třatin-ařef u-xemsa-mya n yeɣyař
46 uca seṭṭac-ařef n řeɛmur n iwdan -
47 zeg wezyen nni i ayt n Israil iksi Musa ijj zi kuř xemsin, ammu zeg iwdan am zi řebhayem, uca iwca aya i Ilawiyyen, inni iṭṭfen acbar x Tzeddiɣt n SIDI, am mammec t yumur SIDI i Musa.
48 Xenni usin-dd ikumandaren x řuřuf n řɛeskar, imeqqranen x wařef d imeqqranen x mya, ɣar Musa,
49 nnan i Musa: “Imsexxaren nnec aqa ḥesben marra iɛeskariyyen nni sadu ufus nneɣ u war d aneɣ iruḥ uřa d ijj n weryaz.
50 S uya niwi tawhibt n SIDI, kuř ijj min yufa: ict n řqecɛet n wureɣ, ict n txeřxařt, ict n tmeqyast, ict n txatent n ucemmiɛ, ict n texrazt niɣ ict n tseddect s wedmam n wureɣ, ḥima ad zzaysent ittwagg weṣřaḥ x řeɛmur nneɣ zzat i wudem n SIDI.”
51 Musa d ukehhan Aliɛazar ksin zzaysen ureɣ nsen, marra řeqcuɛ i ggin s lfenn.
52 Marra ureɣ n tewhibt nni ssgeɛɛden i SIDI zeg imeqqranen x wařef u zeg imeqqranen x mya tuɣa di seṭṭac-ařef u-sebɛa-mya u-xemsin ciqlu.
53 Iɛeskariyyen aqa keccḍen kuř ijj i yixef nnes min xsen.
54 Musa d ukehhan Aliɛazar ṭṭfen ureɣ nni n imeqqranen x wařef u x mya uca iwyen t ɣar Uqiḍun n Umsagar, am yict n řidaret i ayt n Israil zzat i wuden n SIDI.