29
Taɣarṣt n wass umezwaru n uyur wiss sebɛa
1 “Deg uyur wiss sebɛa, deg wass amezwaru n uyur, ad teggem ijj n umuni iqeddsen. War tteggem uřa d ict n řxedmet i ittxeṣṣan ad tᵉttwagg. Ad awem yiři d ijj n wass n usuḍi s wesruddeḥ deg uyicc n icarri.
2 Ad tesswejdem ict n tɣarṣt n wecmaḍ am yict n řefwaḥet ittfuḥen i SIDI: ijj n ufunas - ameẓyan n ict n tfunast - d yijj n icarri d sebɛa n izmaren icnan qaɛ n ijj n useggʷas
3 ak-d tewhibt nsen n řɣiǧet zeg waren azdad ixeǧḍen s zzect: třata n teɛcurin n yijj n ifa i ufunas ameẓyan d tnayen n teɛcurin n yijj n ifa i icarri
4 ak-d ict n teɛcart n yijj n ifa i kuř izmar, uca ammu i sebɛa n izmaren marra.
5 Swejdem ɛawed ijj n umyan zeg iɣayḍen am tɣarṣt n ddenb maḥend ad ittwagg weṣřaḥ i kenniw.
6 sennej i usewjed n tɣarṣt n wecmaḍ ak-d tewhibt nnes n řɣiǧet d sennej i usewjed n tɣarṣt n wecmaḍ n řebda ak-d tewhibt nnes n řɣiǧet d tewhibin nsen n useyyeb, ɛlaḥsab lfariḍa nsent, am yict n řefwaḥet ittfuḥen, ict n tɣarṣt n tmessi i SIDI.
Tiɣarṣa deg Wass n Weṣřaḥ
7 Deg wass wiss ɛecra ad teggem ijj n umuni iqeddsen uca ad tesswaḍɛem ixef nwem. War tteggem uřa d ict n řxedmet i ittxeṣṣan ad tᵉttwagg.
8 Ad tqeddmem ict n tɣarṣt n wecmaḍ am yict n řefwaḥet ittfuḥen i SIDI: ijj n ufunas ameẓyan d yijj n icarri d sebɛa n izmaren icnan qaɛ n ijj n useggʷas. Ittxeṣṣa ad awem iřin cnan aṭṭas.
9 Ɛawed tawhibt nsen n řɣiǧet n waren azdad ixeǧḍen s zzect: třata n teɛcurin n yijj n ifa i yijj n ufunas ameẓyan, tnayen n teɛcurin n yijj n ifa i yijj n icarri
10 u ict n teɛcart n yijj n ifa i kuř izmar, uca ammu i sebɛa n izmaren marra.
11 Swejdem ɛawed ijj n umyan zeg iɣayḍen am tɣarṣt n ddenb, sennej i usewjed n tɣarṣt n ddenb i zi tᵉttwagg weṣřaḥ uca uřa d taɣarṣt n wecmaḍ n řebda ak-d tewhibt nnes n řɣiǧet d tewhibin nsen n useyyeb.
Tiɣarṣa n Řɛid n Iɛuccuten
12 Deg wass wiss xemmesṭac n uyur wiss sebɛa ad teggem ijj n umuni iqeddsen. War tteggem uřa d ict n řxedmet i ittxeṣṣan ad tᵉttwagg. Sebɛa n wussan ad tɛeyydem řɛid i SIDI.
13 Ad tqeddmem ict n tɣarṣt n wecmaḍ am tewhibt n tmessi, am ict n řefwaḥet ittfuḥen i SIDI: třeṭṭac n ifunasen - imeẓyanen n ict n tfunast - tnayen n icarriyyen u arbeɛṭac n izmaren n ijj n useggʷas. Ittxeṣṣa ad iřin cnan qaɛ.
14 Ɛawed tawhibt nsen n řɣiǧet n waren azdad ixeǧḍen s zzect: třata n teɛcurin n yijj n ifa i yijj n ufunas ameẓyan, i marra třeṭṭac n ifunasen imeẓyanen, u tnayen n teɛcurin n yijj n ifa i yijj n ucarri, i tnayen n icarriyyen nni
15 uřa d ict n teɛcart n yijj n ifa i kuř izmar, uca ammu i marra arbeɛṭac n izmaren nni.
16 Swejdem ɛawed ijj n ijj n umyan zeg iɣayḍen am tɣarṣt n ddenb, sennej i usewjed n tɣarṣt n wecmaḍ n řebda ak-d tewhibt nnes n řɣiǧet d tewhibt nnes n useyyeb.
17 Deg wass wiss tnayen: tenɛac n ifunasen imeẓyanen d tnayen n icarriyyen d arbeɛṭac n izmaren icnan n ijj n useggʷas,
18 ak-d tewhibt nsen n řɣiǧet d tewhibin nsen n useyyeb i ifunasen imeẓyanen, i icarriyyen u i izmaren, ɛlaḥsab řqedd nsen, ɛlaḥsab lfariḍa.
19 Swejdem ɛawed ijj n umyan zeg iɣayḍen am tɣarṣt n ddenb, sennej i usewjed n tɣarṣt n wecmaḍ n řebda ak-d tewhibt nnes n řɣiǧet d tewhibin nsen n useyyeb.
20 Deg wass wiss třata: ḥiṭac n ifunasen imeẓyanen d tnayen n icarriyyen d arbeɛṭac n izmaren n ijj n useggʷas, ican qaɛ,
21 ak-d tewhibt nsen n řɣiǧet d tewhibin nsen n useyyeb i ifunasen imeẓyanen, i icarriyyen u i izmaren, ɛlaḥsab řqedd nsen, ɛlaḥsab lfariḍa.
22 Swejdem ɛawed ijj n umyan zeg iɣayḍen am tɣarṣt n ddenb, sennej i usewjed n tɣarṣt n wecmaḍ n řebda ak-d tewhibt nnes n řɣiǧet d tewhibt nnes n useyyeb.
23 Deg wass wiss arebɛa: ɛecra n ifunasen imeẓyanen d tnayen n icarriyyen d arbeɛṭac n izmaren icnan n ijj n useggʷas,
24 ak-d tewhibt nsen n řɣiǧet d tewhibin nsen n useyyeb i ifunasen imeẓyanen, i icarriyyen u i izmaren, ɛlaḥsab řqedd nsen, ɛlaḥsab lfariḍa.
25 Swejdem ɛawed ijj n umyan zeg iɣayḍen am tɣarṣt n ddenb, sennej i usewjed n tɣarṣt n wecmaḍ n řebda ak-d tewhibt nnes n řɣiǧet d tewhibt nnes n useyyeb.
26 Deg wass wiss xemsa: tesɛa n ifunasen imeẓyanen d tnayen n icarriyyen d arbeɛṭac n izmaren icnan n ijj n useggʷas,
27 ak-d tewhibt nsen n řɣiǧet d tewhibin nsen n useyyeb i ifunasen imeẓyanen, i icarriyyen u i izmaren, ɛlaḥsab řqedd nsen, ɛlaḥsab lfariḍa.
28 Swejdem ɛawed ijj n umyan zeg iɣayḍen am tɣarṣt n ddenb, sennej i usewjed n tɣarṣt n wecmaḍ n řebda ak-d tewhibt nnes n řɣiǧet d tewhibt nnes n useyyeb.
29 Deg wass wiss setta: tmenya n ifunasen imeẓyanen d tnayen n icarriyyen d arbeɛṭac n izmaren icnan n ijj n useggʷas,
30 ak-d tewhibt nsen n řɣiǧet d tewhibin nsen n useyyeb i ifunasen imeẓyanen, i icarriyyen u i izmaren, ɛlaḥsab řqedd nsen, ɛlaḥsab lfariḍa.
31 Swejdem ɛawed ijj n umyan zeg iɣayḍen am tɣarṣt n ddenb, sennej i usewjed n tɣarṣt n wecmaḍ n řebda ak-d tewhibt nnes n řɣiǧet d tewhibin nnes n useyyeb.
32 Deg wass wiss sebɛa: sebɛa n ifunasen imeẓyanen d tnayen n icarriyyen d arbeɛṭac n izmaren icnan n ijj n useggʷas,
33 ak-d tewhibt nsen n řɣiǧet d tewhibin nsen n useyyeb i ifunasen imeẓyanen, i icarriyyen u i izmaren, ɛlaḥsab řqedd nsen, ɛlaḥsab lfariḍa.
34 Swejdem ɛawed ijj n umyan zeg iɣayḍen am tɣarṣt n ddenb, sennej i usewjed n tɣarṣt n wecmaḍ n řebda ak-d tewhibt nnes n řɣiǧet d tewhibt nnes n useyyeb.
35 Deg wass wiss tmenya ad teggem ijj n umuni ifarzen. War tteggem uřa d ict řxedmet i ittxeṣṣan ad tᵉttwagg.
36 Ad tqeddmem ict n tɣarṣt n wecmaḍ am tewhibt n tmessi, am ict n řefwaḥet ittfuḥen i SIDI: ijj n ufunas ameẓyan d yijj n icarri d sebɛa n izmaren icnan n ijj n useggʷas
37 ak-d tewhibt nsen n řɣiǧet d tewhibin nsen n useyyeb i ufunas ameẓyan, i icarri u i izmaren, ɛlaḥsab řqedd nsen, ɛlaḥsab lfariḍa.
38 Swejdem ɛawed ijj n umyan zeg iɣayḍen am tɣarṣt n ddenb, sennej i usewjed n tɣarṣt n wecmaḍ n řebda ak-d tewhibt nnes n řɣiǧet d tewhibt nnes n useyyeb.
39 Ad teggem timesřayin-a i SIDI di řeɛyudat nwem ittwaggen sennej i tewhibin n řewɛud nwem d tewhibin nwem s řxaḍar i ittraḥen ak-d tɣarṣa n wecmaḍ nwem d tewhibin nwem n řɣiǧet d tewhibin nwem n useyyeb d tewhibin nwem n řehna.”