28
Tiɣarṣa n kuř ass
1 Issiweř SIDI ak-d Musa, inna:
2 “Umur ayt n Israil, ini asen: ‘Ittxeṣṣa kenniw ad teḥḍam x tɣarṣṭ inu, macca inu i tewhibin inu n tmessi, ict n řefwaḥet ittfuḥen i Necc, maḥend ad ayi tent tqeddmem di řweqt nnes ittwaggen.’
3 Ad asen tinid: ‘Aqa ta d tawhibt n tmessi i ittxeṣṣan ad tqeddmem: tnayen n izmaren icnan n ijj n useggʷas, am tɣarṣt n wecmaḍ řebda.
4 Ijj n izmar ad t tesswejded di ṣṣbeḥ uca izmar nneɣni ad t tesswejded jar beddu n wezyen n wass ař dd-tewḍa tmeddit
5 uca ak-d man aya am tewhibt n řɣiǧet ict n teɛcart n yijj n ifa n waren azdad ixeǧḍen s yijj n arbeɛ n ijj n uhinu n zzect, ttwaddzen t-i-dd zi zzitun.
6 Aqa-tt d taɣarṣṭ n wecmaḍ n řebda, tenni tuɣa ittwaggen deg wedrar n Sina am yict n řefwaḥet ittfuḥen, aqa-tt d ict n tewhibt n tmessi i SIDI.
7 Tawhibt nnes n useyyeb ad tiři d ijj n arbeɛ n ijj n uhinu i yijj n izmar. Seyyeb tawhibt n useyyeb n ccrab di Zzawect Iqeddsen zzat i SIDI.
8 Ad tesswejded izmar nneɣni jar beddu n wezyen n wass ař dd-tewḍa tmeddit. Ad t tesswejded am mammec tesswejded tawhibt n řɣiǧet di ṣṣbeḥ u am mammec tesswejded tawhibt n useyyeb nnes, am ict n tewhibt n tmessi, ict n řefwaḥet ittfuḥen i SIDI.’ ”
Tiɣarṣa n kuř ssimana
9 “Deg wass n ssebt ad tesswejded tnayen n izmaren icnan n ijj n useggʷas d tnayen n teɛcurin n yijj n ifa n waren azdad am tewhibt n řɣiǧet ixeǧḍen s zzect ak-d tewhibt nnes n useyyeb.
10 Aqa-tt d taɣarṣṭ n wecmaḍ n ssebt i mkuř ssebt, ad tt tarnid i tɣarṣt n wecmaḍ n řebda d tewhibt nnes n useyyeb.”
Tiɣarṣa n kuř uyur
11 “Deg umezwar n kuř ijj n iyuren nwem ittxeṣṣa ad tqeddmem ict n tɣarṣt n wecmaḍ i SIDI: tnayen n ifunasen - imeẓyanen n ict n tfunast - ijj n icarri, sebɛa n izmaren icnan qaɛ n ijj n useggʷas
12 uca ak-d man aya třata n teɛcurin n ijj n ifa n waren azdad am tewhibt n řɣiǧet ixeǧḍen s zzect i yijj n ufunas ameẓyan u tnayen n teɛcurin n yijj n ifa n waren azdad am tewhibt n řɣiǧet ixeǧḍen s zzect i yijj n icarri
13 uca arni ict n teɛcart n yijj n ifa n waren azdad am tewhibt n řɣiǧet ixeǧḍen s zzect i yijj n izmar. Aqa-tt d taɣarṣt n wecmaḍ s ict n řefwaḥet ittfuḥen, aqa-tt d ict n tewhibt n tmessi i SIDI.
14 Tiwhibin nsen n useyyeb ad iřint d azyen n uhinu n binu ak-d ufunas ameẓyan d ict n ttuřut n ijj n uhinu ak-d icarri d yijj n arbeɛ n ijj n uhinu ak-d izmar. Ta d taɣarṣt n wecmaḍ n kuř ayur, i kuř ayur zeg iyuren n useggʷas.
15 Ittxeṣṣa ad tesswejded ijj n umyan zeg iɣayḍen d taɣarṣt n ddenb i SIDI, ad tt tarnid i tɣarṣt n wecmaḍ n řebda ak-d tewhibt nnes n useyyeb.”
Tiɣarṣa deg wussan n Řɛid n Useɛdu
16 Deg uyur amezwaru, deg wass wiss arbeɛṭac n uyur, ad tiři Tɣarṣt n Useɛdu n SIDI.
17 Deg wass wiss xemmesṭac n simant n uyur ad yiři Řɛid. Sebɛa n wussan ad ccen aɣrum břa antun.
18 Deg wass amezwaru n Řɛid ad yiři yijj n umuni iqeddsen. War tteggem uřa d ict řxedmet i ittxeṣṣan ad tᵉttwagg.
19 Ad tqeddmem ict n tewhibt n tmessi am tɣarṣt n wecmaḍ i SIDI: tnayen n ifunasen imeẓyanen d ijj n icarri d sebɛa n izmaren n ijj n useggʷas. Ittxeṣṣa ad iřin cnan qaɛ.
20 Ad tiři tewhibt n řɣiǧet n waren azdad ixeǧḍen s zzect. Ad zzayes tesswejdem třata n teɛcurin n yijj n ifa i yijj n ufunas ameẓyan d tnayen n teɛcurin n yijj n ifa i yijj n icarri.
21 Ad tesswejded ict n teɛcart n yijj n ifa i yijj n izmar, uca ammu i marra sebɛa n izmaren nni.
22 Sewjed ɛawed ijj n umyan zeg iɣayḍen d taɣarṣt n ddenb maḥend ad ittwagg weṣřaḥ i kenniw.
23 Ad tesswejdem man aya sennej i usewjed n tɣarṣt wecmaḍ di ṣṣbeḥ nni iǧan d ict n tɣarṣt n wecmaḍ i řebda.
24 Am mammec uya ad tesswejdem macca n tewhibin n tmessi sebɛa n wussan, di kuř ass zzaysen, am ict n řefwaḥet ittfuḥen i SIDI. Ad ittwassewjed sennej i usewjed n tɣarṣt n wecmaḍ n řebda ak-d tewhibt nnes n useyyeb.
25 Deg wass wiss sebɛa ad teggem ijj n umuni iqeddsen. War tteggem uřa d ict řxedmet i ittxeṣṣan ad tᵉttwagg.”
Imezwura n řɣiǧet
26 “Deg wass n tmenzut n ṣṣabet di Řɛid n Ssimanat, xmi dd ɣa tqeddmem ict n tewhibt n řɣiǧet n jdid ɣar SIDI, ad teggem ijj n umuni iqeddsen. War tteggem uřa d ict n řxedmet i ittxeṣṣan ad tᵉttwagg.
27 Ad tqeddmem ict n tɣarṣt n wecmaḍ am yict n řefwaḥet ittfuḥen i SIDI: tnayen n ifunasen imeẓyanen i yijj n icarri d sebɛa n izmaren n ijj n useggʷas
28 ak-d tewhibt nnes n řɣiǧet n waren azdad ixeǧḍen s zzect: třata n teɛcurin n yijj n ifa i yijj n ufunas ameẓyan d tnayen n teɛcurin n yijj n ifa i yijj n icarri
29 uřa d ict n teɛcart n yijj n ifa i kuř izmar, uca ammu i marra sebɛa n izmaren nni.
30 Swejdem ɛawed ijj n umyan zeg iɣayḍen am tɣarṣt n ddenb maḥend ad ittwagg weṣřaḥ i kenniw.
31 Ad ten tesswejdem sennej i usewjed n tɣarṣt n wecmaḍ n řebda d tewhibt nnes n řɣiǧet. Ad iřin cnan qaɛ i kenniw ak-d tewhibin nsen n useyyeb.”