28
Tanukra
1 Awarni řami teɛdu ssebt, ɣar řefjar n wass amezwaru n ssimana, tusa-dd Maryam n Majdala d Maryam nneɣnit ḥima ad ssijjent x wenḍeř.
2 Xzar, imsar ijj n wenhezzi n temmurt imɣar, minzi lmalak n SIDI ihwa-dd zeg ujenna, iqarreb-dd, isseqnunni taṣḍart zeg wadaf uca iqqim xas.
3 Tuɣa ṣṣifet nnes am wajjaj u warruḍ nnes d acemřař am wedfeř.
4 Iɛessasen fecřen zi teggʷudi zzayes uca dewřen am yimettinen.
5 Lmalak iṭṭef deg wawař, inna i temɣarin: “War tteggʷedent ca, minzi ssneɣ aqa kennint tarezzunt x Yasuɛ wenni ittwaṣellben.
6 War da iǧi, minzi Netta ikkar-dd, am mammec inna. Asent-i-dd da, xzarent amcan mani tuɣa immars Siditneɣ.
7 Ruḥent deɣya, inint i imeḥḍaren nnes, aqa ittwassnekkar-dd zi taddart n imettinen, u xzar Netta d awem i ɣa izwaren ɣar Ljalil. Din ad t tẓarem. Xzar, aqa nniɣ awem tt.”
8 Ffɣent nitenti deɣya zeg wenḍeř s tiggʷudi d řefraḥet imɣaren, ttazzřent ḥima ad tt xebbarent imeḥḍaren.
9 Uca xzar, Yasuɛ iřqa tent deg webrid, inna asen: “Sřam xakent!” Nitenti usint-i-dd ɣares, ṭṭfent deg iḍaren nnes uca sejdent as.
10 Řexdenni inna asent Yasuɛ: “War tteggʷedent ca, ssiwḍent řexbar-a i aytma, ḥima ad raḥen ɣar Ljalil, diha ad ayi ẓaren.”
11 Am ruḥent, xzar, aqa ca zeg iɛessasen usin-dd ɣar tendint, ḥima ad xebbaren imeqqranen n ikehhanen x marra min imsaren.
12 Řexdenni munen nitni ak-d imɣaren n řgens uca mcawaren akidsen, uca wcin asen i iɛessasen ttmenyat n nnuqart, war iǧi drus,
13 nnan: “Inim: ‘Imeḥḍaren nnes usin-dd s ǧiřet uca ucaren t am tuɣa neṭṭeṣ!’
14 Mařa isřa i-t lɛamil, ad t nesseqneɛ uca ad negg war tᵉttiřim deg imunas.”
15 Ṭṭfen tmenyat n nnuqart uca ggin am mammec d asen ɛeřmen. Ammu i dd-itteffeɣ řexbar-a jar Wudayen ař ass n yiḍa.
Řumur ameqqran i ubarreḥ n Řexbar Aṣebḥan
16 Ḥiṭac n imeḥḍaren nni ruḥen ɣar Ljalil, ɣar wedrar mani ten yumur Yasuɛ.
17 Ařami t ẓrin, sejden as, maca ca cekken.
18 Iqarreb-dd ɣarsen Yasuɛ, issiweř akidsen, inna: “Temmewc ayi marra ṣṣulṭa deg ujenna u x temmurt. Am mammec i d ayi dd-issekk Baba, ammu kenniw i ɣa ssekkeɣ Necc.
19 Ruḥem, arrem marra řegnus d imeḥḍaren inu u ssɣeḍṣem ten s Yisem n Baba d Mmis d Arruḥ Iqeddsen,
20 u sřemdem asen ad ṭṭfen di marra min xef kenniw umureɣ zzayes, u xzar, Necc aqa ayi akidwem marra ussan ař qeṭṭu n ddunect.”
Aneggar n L’Injil Iqeddsen am mammec t ibarreḥ Matta.