Markus
1
Yuḥanna Amseɣḍaṣ d cchadet nnes x Yasuɛ
1 Beddu n L’Injil n Yasuɛ Lmasiḥ, Mmis n AREBBI.
2 Am mammec tura deg wedlis n unabi Icaɛya ...
“Aqa Necc ad ssekkeɣ
zzat i wudem nnec lmalak inu,
wenni i ɣa isswejden abrid nnec.”
3 “Tmijja n wenni isɣuyyun di řexřa:
‘Swejdem abrid n SIDI,
seggmem imesraq nnes!’ ”
4 ... ammu i tuɣa Yuḥanna isseɣḍaṣ di řexřa, ittbarreḥ s useɣḍeṣ n ttubet i weɣfar n ddnub.
5 Ffɣen-dd ɣares marra jjwayeh n Yahudiyya d ayt n Urcalim, ttwassɣeḍṣen zzayes deg iɣzar n L’Urdun am neɛɛmen s ddnub nsen.
6 Tuɣa Yuḥanna wanita yarḍ taḍuft n iřeɣman, ibekkes s yijj n webyas n yiřem x tejɛinna nnes, u tuɣa ittett iburexsen d tamment taḥurrect.
7 Tuɣa ittbarreḥ, iqqar: “Xzar, ad dd-yas awarni ayi wenni ijehden xafi, wenni umi war sdihiǧeɣ ad aḍareɣ maḥend ad fesyeɣ ifiřan n sandaliyat nnes.
8 Necc ssɣeḍṣeɣ kenniw deg waman, maca Netta ad kenniw isseɣḍeṣ di Arruḥ Iqeddsen.”
9 Deg wussan nni yusa-dd Yasuɛ zi Nnaṣira, di Ljalil, ittwasseɣḍeṣ zi Yuḥanna deg yeɣzar n L’Urdun.
10 Deɣya, am dd-igeɛɛed zeg waman, iẓra ijenwan arzmen uca Arruḥ am tedbirt tehwa-dd xas.
11 Tusa-dd ict n tmijja zeg ijenwan: “Cek d Mmi iɛizzen, dayek ufiɣ arḍa inu.”
12 Deɣya igewwed i-t Arruḥ ɣar řexřa.
13 Uca iqqim din di řexřa arebɛin n wussan, ijarreb i-t cciṭan, tuɣa-t ak-d řewḥuc uca sexxarent xas lmalakat.
Tařaɣit n Yasuɛ x imeḥḍaren imezwura
14 Awarni řami ṭṭfen Yuḥanna, yudef-dd Yasuɛ ɣar Ljalil, ittbarreḥ s Řexbar Aṣebḥan n Tgeldit,
15 inna: “Aqa řweqt tiweḍ-dd, tqarreb-dd Tgeldit n AREBBI. Tubem, amnem di Řexbar Aṣebḥan.”
16 Am tuɣa iggur ɣar řebḥar n Ljalil, iẓra Cimɛun d Andrawus umas, neṭṭaren tracca di řebḥar, maɣar nitni d ineymaren n iseřman.
17 Inna asen Yasuɛ: “Asem-dd awarni ayi uca ad kenniw arreɣ d ineymaren n yewdan.”
18 Řexdenni jjin tiracciwin nsen uca ḍfaren t.
19 Xenni awarni řami iɛdu cwayt ssenni, iẓra Yaɛqub mmis n Zabdi d umas Yuḥanna di tɣarrabut, ɛedřen tiracciwin nsen.
20 Iřaɣa xasen uca řexdenni jjin babatsen Zabdi ak-d ixemmasen di tɣarrabut, uca ḍfaren t.
Ameryaḥ di temzida n Kafernaḥum
21 Xeccen ɣar Kafarnaḥum uca deɣya ibda isseřmad di ssebt di temzida.
22 Tbehten zeg useřmed nnes, minzi isseřmed i-ten am wenni ɣar teǧa ṣṣulṭa, war iǧi am yimseřmaden n idlisen.
23 Tuɣa di temzida nsen ijj n bnadem dayes ijj n řaryaḥ d amengus, isɣuyyu,
24 iqqar: “Min din jar aneɣ neccin d Cek a Yasuɛ Nnaṣiri. Ma tusid-dd ḥima ad aneɣ tesshellked? Aqa necc ssneɣ Cek min teɛnid: Aqa Cek d Amqeddas n AREBBI.”
25 Uca iɛřem as Yasuɛ, inna as: “Sqar! Ffeɣ zzayes!”
26 Immenḍar i-t řaryaḥ amengus, isɣuy s ict n tɣuyyit tejhed uca xenni iffeɣ-dd zzayes.
27 Tbehten marra, mmseqsan ak-d wayawya, nnan: “Man aya? Mana taɣuri-ya n jdid? Minzi s ṣṣulṭa yumur uřa d řaryaḥ imengas uca tteggen as array.”
28 Řexdenni iffeɣ řexbar nnes ɣar marra jjwayeh i d as dd-innḍen i Ljalil.
Asgenfi n tḍekkwač n Buṭrus s ufus n Yasuɛ
29 Awarni řami dd-ffɣen zi temzida, ruḥen ɣar taddart n Cimɛun d Andrawus ak-d Yaɛqub d Yuḥanna.
30 Tuɣa taḍekkwač n Cimɛun tezzeř s tmessi, uca nitni ssiwřen xas akides.
31 Iqarreb-dd ɣares, icebbar deg ufus nnes, issgeɛɛed i-tt-i-dd. Deɣya tejja xas tmessi uca nettat tebda tᵉttsexxar xasen.
32 Řami dd-tiweḍ tmeddit, tafuct truḥ ad teɣři, iwyen ɣares marra imehřac d inni daysen ccwaṭen.
33 Tuɣa tandint marra tmun ɣar tewwart.
34 Issgenfa aṭṭas n imeḥřac s ɛřam kuř řehřacat uca issuffeɣ aṭṭas n ccwaṭen, war ijji ccwaṭen ad ssiwřen, minzi ssnen t.
Yasuɛ iẓẓuǧ ɣar ṣṣbeḥ zic
35 Tiwecca zic, tuɣa ɛad d ǧiřet, ikkar uca iffeɣ ɣar ijj n wemcan ixřan, tuɣa ittẓaǧa din.
36 Cimɛun d yinni tuɣa akides, arzun xas.
37 Řami t ufin, nnan as: “Marra iwdan arezzun xak!”
38 Inna asen: “Ittxeṣṣa ad nraḥ ɣar dcurat d tneddam yudsen, ḥima ad din barrḥeɣ ɛawed minzi aqa i uya umi dd-usiɣ.”
39 Tuɣa isseřmad di temzidawin nsen di marra Ljalil, u issuffuɣ ccwaṭen.
Asgenfi n ijj n bnadem dayes řbarṣ
40 Yusa-dd ɣares ijjen dayes řbarṣ, iwḍa ɣar iḍaren nnes, ittar as, inna: “Mařa texsed, tzemmared ad ayi tessizdeged.”
41 Izziǧez i Yasuɛ, isswiẓẓeḍ afus nnes, iḥada i-t, inna as: “Xseɣ! Iwa, dweř d amezdag!”
42 Di tsaɛɛet nni, řexdenni iruḥ xas řbarṣ uca idweř izdig.
43 Uca awarni řami d as iɛřem, issekk i-t řexdenni,
44 inna as: “Xzar, war t ttɛiwid uřa i yijjen, maca ruḥ, scen ixef nnec i ukehhan uca ewc x usizdeg nnec min yumur Musa maḥend ad tcehded i nitni.”
45 Maca řami iruḥ, ibda ittbarreḥ aṭṭas, issuffeɣ řexbar ařami war izemmar Yasuɛ ad yadef ɣar tandint s bṭayṭay, maca tuɣa-t barra deg imucan ixřan, tuɣa ttasen-dd ɣares zi kuř jjwayeh.