18
Man wen iǧan d ameqqran di Tgeldit n ijenwan?
1 Di tsaɛɛet nni usin-dd imeḥḍaren ɣar Yasuɛ, nnan: “Man wen iǧan d ameqqran di Tgeldit n ijenwan?”
2 Yasuɛ iřaɣa-dd x ijj n uḥenjir ɣares, issbedd i-t di řwesṭ nsen,
3 inna: “S tidett Necc ad awem iniɣ: Mařa war ttubem u tdewřem am iḥenjiren, ɛemmarṣ ad tadfem ɣar Tgeldit n ijenwan.
4 S uya wenni i ɣa issmeẓyen ixef nnes am uḥenjir-a, aqa d wenni d ameqqran di Tgeldit n ijenwan,
5 u wenni i ɣa iqebřen ijj n uḥenjir i iǧan am uḥenjir-a s Yisem inu, iqebbeř ayi.
Aɛřam ɣar řgens x min i ɣa iɣarren i ddenb
6 Maca kuř ijjen wenni i ɣa issenqarḍen ijjen zeg imeẓyanen-a i zzayi ittamnen, iḥřa as ad as tᵉttwagg ict n teṣḍart n tsirt tedqeř ɣar yiri nnes, ad ittwassɣareq di řaǧaɣ n řebḥar.
7 Uct x ddunect x ssibbet n tɛenkrifin. Iwa, ittxeṣṣa ad dd-asent tɛenkrifin, maca amcum n bnadem nni itteggen taɛenkrift.
8 Mařa issenqarḍ cek ufus nnec niɣ aḍar nnec, xenni qess i-t, nḍar i-t xak. Iḥřa ac ad tadfed ɣar Tudart d aqejdaḥ niɣ d ameɛḍuř x umenḍar s tnayen n ifassen niɣ s tnayen n iḍaren di tmessi i řebda.
9 Mařa tessenqarḍ cek tiṭṭ nnec, xenni qeřɛ i-tt, nḍar i-tt xak, iḥřa ac ad tadfed ɣar Tudart s ict n tiṭṭ x uweṭṭu di jᵉhennama iccuren s tmessi s tnayen n tiṭṭawin.
Amedya n wuǧi iweddaren
10 Ɣarwem ad tesseḥqarem ijjen zeg imeẓyanen-a. Minzi Necc ad awem iniɣ, aqa lmalakat nsen deg ijenwan aqa řebda ttwařant tifras n Baba i iǧan deg ijenwan.
11 Minzi Mmis n bnadem yusa-dd, ḥima ad issenjem min tuɣa iweddaren.
12 Mammec i d awem ittɣiř? Mařa din ca n bnadem ɣares mya n wuǧi uca ijjen zzaysen iweddar, ma xenni war ittejji tesɛa u-tesɛin deg idurar, ad iraḥ ad yarzu x wenni iweddaren?
13 U mařa yufa i-t, s tidett Necc ad awem iniɣ, ad zzayes ifarḥ ktar zi min ɣa ifarḥ zi tesɛa u-tesɛin inni war iweddaren.
14 Ammu uřa d Babatwem i iǧan deg ijenwan war ixs ad iweddar uřa d ijj zeg imeẓyanen-a.”
Ddenb n ijj n uma
15 “Mařa ixḍa umac akidek, ruḥ ɣares, webbex i-t mɣir jar ac d jar as waha. Mařa isřa ɣarek, aqa tarbeḥed umac.
16 Mařa war ɣarek isři ca, awi akidek ca n ijjen nneɣni niɣ tnayen, ḥima x uqemmum n tnayen niɣ n třata n řechud ad ittwaḍmen wawař marra.
17 Mařa netta war ɣarsen isři, xenni ini tt i tmesmunt n řmuminin, uca mařa war isři uřa ɣar tmesmunt, xenni ejj i-t ad ɣarwem yiři am yijj n bu-ḍḍariba niɣ am yijj n ukafriw.
18 S tidett Necc ad awem iniɣ: Marra min ɣa tceddem di temmurt, ad yiři icedd deg ujenna, uca marra min ɣa tfesyem di temmurt, ad yiři ifsi deg ujenna.
19 Ad awem iniɣ ɛawed, mařa tnayen n iwdan ad mmsetfaqen x temmurt x ca n řḥajjet i ɣa ttaren, aqa d man aya d asen i ɣa ittwagg zi Baba i iǧan deg ijenwan.
20 Minzi mani ɣa munen tnayen niɣ třata s Yisem inu, Necc ad din iřiɣ di řwesṭ nsen.”
Amedya n umsexxar aɛeffan
21 Řexdenni yusa-dd ɣares Buṭrus, inna: “A Sidi, mecḥař n twařawin i ɣa ixḍa akidi uma, necc ad as samḥeɣ? Ma ař sebɛa n twařawin?”
22 Inna as Yasuɛ: “War d ac qqareɣ ca ař sebɛa, maca ař sebɛin di sebɛa n imuren d sebɛa n imuren!
23 S uya tᵉttawi-dd Tgeldit n ijenwan deg ijj n weryaz d ajeǧid i ixsen ad yegg řeḥsab ak-d imsexxaren nnes.
24 Umi ibda ad imseḥseb, iwyen-dd ɣares ijj n bnadem itturs as ɛecra-ařaf talint.
25 Am war tuɣi ɣares min zi ɣa yarr amarwas, yumur bab nnes, ḥima ad ittwammenz, netta d temɣart nnes d tarwa nnes d marra min ɣares, ḥima ad ittwaxeǧeṣ umarwas.
26 Iwḍa as umsexxar nni ɣar iḍaren, isjed as, inna: ‘A sidi, ṣbar xafi, ad ac arreɣ marra.’
27 Aqa izziǧez as bab n umsexxar nni, iḍřeq as uca isamḥ as deg umarwas.
28 Řami dd-iffeɣ umsexxar nni, yufa ijjen zeg inni tuɣa d imsexxaren imɛacaren nnes u wanita itturs as mya dinar. Iṭṭef i-t, icebbar as deg yiri, inna as: ‘Xeǧeṣ ayi min d ac tturseɣ!’
29 Iwḍa yas umsexxar amɛacar nnes ɣar iḍaren nnes, iḥeccem i-t, inna: ‘Ṣbar xafi, ad ac arreɣ marra!’
30 Maca netta war ixs, iruḥ inḍar i-t di řeḥbes ař dd ɣa yarr amarwas.
31 Řami ẓřin imsexxaren imɛacaren nnes min imsaren, ceḍnen aṭṭas uca ruḥen, nnan tt i bab nsen.
32 Uca iřaɣa-dd xas sidis, inna as: ‘A cek amsexxar aɛeffan, marra min d ac tturseɣ, samḥeɣ ac, minzi tᵉttared ayi.
33 Ma war iǧi zeɛma uřa d cek xak ad ac izziǧez wenni d amsexxar amɛacar nnec am mammec i d ayi tezziǧed cek?’
34 Xenni ixeyyeq sidis, isseɛdu t deg ifassen n imɛaddeben ař ɣa ixeǧeṣ marra min dayes d amarwas.
35 Ammu i ɣa yegg Baba wenni iǧan deg ujenna i kenniw, mařa kenniw war tsimiḥem s wuř kuř ijjen zzaywem i umas ixeṭṭan nnes.”