17
Yasuɛ x wedrar ak-d Musa d Iliya
1 Awarni setta n wussan Yasuɛ yiwi-dd Buṭrus d Yaɛqub d umas Yuḥanna akides, yiwyi i-ten weḥḥedsen ɣar ijj n wedrar yuɛřa.
2 Uca ittwabeddeř waddud n Yasuɛ qibač nsen: tuɣa aɣembub nnes ittceɛciɛ am tfuct, idweř warruḍ nnes d acemřař am tfawt.
3 Uřa d Musa d Iliya ḍharen asen-dd, ssawařen akides.
4 Buṭrus iṭṭef deg wawař, inna i Yasuɛ: “A Sidi, aqa mliḥ umi i da neǧa! Mařa texsed, ad newwet danita třata n iɛuccuten n tseṭṭa, ijjen i Cek, ijjen i Musa u ijjen i Iliya.”
5 Am tuɣa issawař ɛad, ikka-dd xasen ijj n useynu ittseqsiq, issduriy ten s tiři nnes uca ict n tmijja zeg ujenna tenna: “D wa d Mmi iɛizzen, dayes ufiɣ arḍa inu, sřem ɣares!”
6 Řami sřin imeḥḍaren man aya, wḍan x uɣembub nsen uca ggʷeden aṭṭas.
7 Yusa-dd ɣarsen Yasuɛ, iḥada ten, inna: “Kkarem, war tteggʷedem ca!”
8 Řami ssgeɛɛden tiṭṭawin nsen, war ẓrin ḥed mɣir Yasuɛ.
9 Am dd-hwan zeg wedrar, yumur i-ten Yasuɛ, inna asen: “War ssiwiřem x řewḥiy-a am ɣarwem iǧa ijj nneɣni ař dd ɣa ikkar Mmis n bnadem jar imettinen.”
10 Imeḥḍaren sseqsan t, nnan as: “Mayemmi qqaren imseřmaden n idlisen aqa Iliya ad dd-yas d amezwaru?”
11 Yarra-dd Yasuɛ, inna: “Iliya ad dd-yas d amezwaru, ḥima ad ittwakemmeř marra.
12 Maca Necc ad awem iniɣ, xzar, Iliya aqa yusa-dd, war zzayes steɛtarifen, maca ggin zzayes min xsen. Ammu uřa d Mmis n bnadem ad zzaysen iweddeb.”
13 Řexdenni fehmen imeḥḍaren, belli tuɣa issawař akidsen x Yuḥanna Amseɣḍaṣ.
Yasuɛ issgenfa aḥenjir amaryaḥ
14 Řami dd-usin ɣar řɣaci, yusa-dd ɣares ijj n bnadem, iwḍa as ɣar iḍaren, inna as:
15 “A Sidi, zziǧez i mmi, minzi aqa netta ittbarkikkiḍ, immarni xas řḥar, maɣar aṭṭas n twařawin iwḍa di tmessi u deg waman.
16 Iwyeɣ t ɣar imeḥḍaren nnec, maca nitni war zemmaren ad t ssgenfan.”
17 Yasuɛ yarra-dd, inna: “A jjiř i war yuminen d imufriɣen, mecḥař i ɣa qqimeɣ ɛad akidwem, mecḥař ɛad i ɣa qqimeɣ ṣbareɣ awem? Awyem t-i-dd ɣari!”
18 Xenni iwebbex i-t Yasuɛ uca iffeɣ zzayes cciṭan uca idweř uḥenjir iggenfa zi tsaɛɛet nni.
19 Řexdenni usin-dd imeḥḍaren weḥḥedsen ɣar Yasuɛ, nnan as: “Mayemmi neccin war nzemmar ad t nessgenfa?”
20 Inna asen Yasuɛ: “Zi ssibbet n břa l’iman nwem. S tidett ad awem iniɣ, mařa daywem l’iman anect n ict n tḥebbuct n zzariɛet n uxerdel, ad as tinim i wedrar-a: ‘Muṭṭi ssa!’, xenni ad immuṭṭi, uca war din ittiři ɛad uřa d ict n řḥajjet war d as tzemmarem ɛad.
21 Maca ddarb-a war dd-itteffeɣ mɣir s tẓaǧit d uẓummi.”
Yasuɛ issawař x řmewt d tnukra nnes i twařa wiss tnayen
22 Řami tuɣa ttsaran di Ljalil, inna asen Yasuɛ i imeḥḍaren nnes: “Mmis n bnadem ad immewc deg ifassen n iwdan.
23 Ad t nɣen uca ad dd-ittwassnekkar deg wass wiss třata.” Xenni ceḍnen aṭṭas.
Awař n Yasuɛ x ḍḍariba i Zzawect Tameqqrant
24 Řami dd-usin ɣar Kafarnaḥum, qarrben-dd ayt n ḍḍariba, inni iṭṭfen tnayen n tepyasin n tnayen n ‘jjuzin’ n nnuqart i kuř uzeǧif i ḍḍariba n Zzawect Tameqqrant, ɣar Buṭrus, nnan: “Amseřmad nwem, ma war ittxeǧiṣ tnayen n ‘jjuzin’ nnes i Zzawect Tameqqrant?” Inna: “Wah, ad ten ixeǧes!”
25 Ařami dd-yudef Buṭrus ɣar taddart, izwar as-dd Yasuɛ, inna: “Cimɛun, mammec twařid cek, wi zi ṭṭfen ijeǧiden n ddunect řeɛcur d tenɛacin i izemmen i kuř azeǧif? Ma zi tarwa nsen niɣ zeg ibarraniyyen?”
26 Inna as Cimɛun: “Zeg ibarraniyyen!” Inna as Yasuɛ: “S uya ǧan tarwa d iḥurriyyen!
27 Maca ḥima war ten nessendrif ad ac umureɣ: Ruḥ ɣar řebḥar, nḍar taṣennart uca arzem aqemmum i tesřemt tamezwarut i dd ɣa iffɣen uca ad tafed ict n tepyist n uṣulḍi n ‘ustatir’. Ksi tt uca ewc i-tt xafi u x yixef nnec.”