14
Řmewt n Yuḥanna Amseɣḍaṣ
1 Di řweqt nni isřa Hirudus, řḥakem x ijj n arbaɛ n temmurt, řexbar x Yasuɛ.
2 Inna i yimsexxaren nnes: “Wanita d Yuḥanna Amseɣḍaṣ. Aqa ittwassnekkar-dd zi taddart n imettinen, s uyenni ttwaggent zzayes řeɛjayeb nni.”
3 Minzi Hirudus tuɣa iṭṭef Yuḥanna, icarf i-t, igga i-t di řeḥbes zi ssibbet n Hirudiyya, tenni d tamɣart n Filippus, wenni d umas n Hirudus,
4 minzi Yuḥanna tuɣa iqqar as: “War ɣarek bu ttesriḥ aqa tiwyed tt d tamɣart nnec.”
5 S uya tuɣa ixs ad t ineɣ, maca tuɣa iggʷed zi řɣaci, minzi nitni ḥesben t d anabi.
6 Maca řami dd-yiweḍ wass n wexřaq n Hirudus, tecḍeḥ yeǧis n Hirudiyya zzat i inewjiwen i dinni iqqimen, uca teɛjeb as i Hirudus.
7 S uyenni inna as s ict n tjaǧit ad as iwc marra min i ɣa tᵉttar zzayes.
8 Uca nettat, am tt tuɣa tᵉttwaɛarren zeg yemmas, tenna: “Ewc ayi da x ṭṭebṣi azeǧif n Yuḥanna Amseɣḍaṣ!”
9 Icḍen ujeǧid, maca umi tuɣa ijjuǧ u x ssibbet n yinni akides iqqimen, yumur ad as immewc uzeǧif.
10 Issekk ḥed ɣares, ḥima ad iqess azeǧif i Yuḥanna di řeḥbes.
11 Iwyen-dd azeǧif nnes di ṭṭebṣi, immewc as i tḥenjirt uca nettat tiwyi-t i yemmas.
12 Usin-dd imeḥḍaren nnes, ksin řxecbet, neḍřen tt. Řexdenni ruḥen, xebbaren Yasuɛ.
Lmuɛjiza n usecci amezwaru
13 Řami isřa Yasuɛ man aya, iffeɣ ssenni deg uɣarrabu ɣar ijj n wemcan ixřan, tuɣa-t din weḥḥdes. Isřa řɣaci x man aya, uca ḍfaren t x temmurt zi tneddam.
14 Umi dd-iffeɣ Yasuɛ zi tɣarrabut, iẓra aṭṭas n řɣaci uca iḥinn xasen, issgenfa imehřac nsen.
15 Řami dd-tiweḍ tmeddit, usin-dd ɣares imeḥḍaren nnes, nnan: “Aqa amcan-a ixřa u řweqt teɛdu. Zeɛma sqebbeḍ řɣaci, ḥima ad uyuren ɣar ředcur, ad sɣen min ɣa ccen i yixef nsen.”
16 Maca Yasuɛ inna asen: “Nhřa ma ruḥen, wcem asen kenniw min ɣa ccen.”
17 Nnan as: “War da walu mɣir xemsa n tecnifin d tnayen n iseřman.”
18 Inna: “Awyem ten-dd da ɣari.”
19 Xenni yumur řɣaci ad qqimen x arbiɛ. Xenni iṭṭef xemsa n tecnifin d tnayen nni n iseřman, ixzar ɣar ujenna, ibarek, yarẓa i-tent uca iwca ticnifin nni i imeḥḍaren u imeḥḍaren wcin tent i řɣaci.
20 Marra ccin, jjiwnen. Řexdenni ksin iřeqqwaz iceṭṭen: tuɣa din tenɛac n tsuǧatin ɛemmarent.
21 Inni ccin tuɣa aten di xemsa ařef n yeryazen, břa timɣarin d iḥenjiren.
Yasuɛ iggur x waman n řebḥar
22 Deɣya iziyyar Yasuɛ imeḥḍaren nnes ad nyen di tɣarrabut uca ad as izwaren ɣar ujemmaḍ, am issqebbeḍ Netta řɣaci.
23 Awarni řami issqebbeḍ řɣaci, igeɛɛed ɣar wedrar weḥḥdes, ḥima ad iẓẓaǧ. Řami dd-tiweḍ tmeddit, tuɣa iqqim din weḥḥdes.
24 Aɣarrabu tuɣa tiggʷej x temmurt ‘istadiyyen’ aṭṭas, uca tᵉttwaɛarn zi ssa ɣar diha s řemwaj, minzi asemmiḍ yusa asen-dd deg wudem.
25 Maca deg ḥeṭṭu wiss arebɛa n ǧiřet, yusa-dd ɣarsen Yasuɛ am iggur x waman n řebḥar.
26 Umi t ẓrin imeḥḍaren iggur x waman n řebḥar, nnxeřɛen, nnan: “Wa d řewḥiy aɣeddar!”, uca sɣuyen zi tiggʷudi.
27 Deɣya issiweř-dd ɣarsen Yasuɛ, inna: “Ggem uř, aqa d NECC, war tteggʷedem ca!”
28 Buṭrus yarra-dd xas, inna: “A Sidi, mařa d Cek, weṣṣa ayi ad ɣarek dd-aseɣ x waman.”
29 Inna as: “As-dd!” Uca ihwa-dd Buṭrus zeg uɣarrabu, yuyur x waman, ḥima ad dd-yaweḍ ɣar Yasuɛ.
30 Maca umi iẓra asemmiḍ ijhed, teřqef i-t tiggʷudi uca, am ibda iɣarreq, iřaɣa, inna: “A Sidi, senjem ayi!”
31 Deɣya isswiẓẓeḍ Siditneɣ afus nnes, iṭṭef dayes, inna as: “A cek wenni di iǧa drus n l’iman, mayemmi dayek yudef ccek?”
32 Awarni řami nyin deg uɣarrabu, yarsa usemmiḍ.
33 Inni iǧan deg uɣarrabu, usin-dd ɣares, sejden as, nnan: “S tidett, Cek d Mmis n AREBBI!”
34 Awarni řami ẓwan řebḥar, iwḍen ɣar temmurt n Jinnisaret.
35 Řami t ɛeqřen yeryazen n temmurt nni, ssuffɣen řexbar di marra dcurat i d as dd-innḍen, iwyen-dd ɣares marra inni tuɣa iheřcen aṭṭas,
36 ttaren zzayes ad ten yejj ad ḥadan mɣir abeḥřuř n ujeǧab nnes, u marra inni t iḥadan, dewřen ggenfan.